DIOS MUNANQANÖ KAWANAPAQ
Alli kaqta ruranapaq Jehovä mandamanqantsikta defendishun
Alli kaqta ruranapaqmi Jehoväqa Palabranta patsätsishqa. Tsëmi ollquwan warmi casakurnin imëyaqpis kawakuyänampaq patsätsishqa (Mt 19:4-6, 9). Jinamampis, mana majanwan oqllanakïtam Jehoväqa chipyëpa chikin (1Co 6:9, 10). Manam tsëllatsu, imanö vistikunapaq, y imanö altsapäkunapaqmi Palabranwan yachatsimantsik, y tsëta cäsukurmi wakinkunapita jukläya kantsik (Dt 22:5; 1Ti 2:9, 10).
Mëtsikaq nunakunam Jehovä mandakunqannö kawakïta munayantsu (Ro 1:18-32). Tsëmi tsëllaraq yarqamoq kaqkunata, vistikïninkunachö, altsapäkïninkunachö y portakïninkunachö mas precisaqpaq churayan. Jinamampis, jukwan jukwan kakuyanqampitam gälakuyan y Dios mandakunqannö kawaqkunapitam burlakuyan (1Pë 4:3, 4).
Jehoväpa testïgunkunaqa alli kaqta ruranapaq Jehovä mandamanqantsiktam imëpis defendinantsik (Ro 12:9). Tsëtaqa rurantsik, wakinkunata yachëllapa y respëtuwan Dios chikinqan rurëkunapita willarnin y pë munanqannö kawarninmi. Tsëmi, imanö vistikunapaq kaqta y imanö altsapäkunapaq kaqta manaraq decidirnin, kënö tapukunantsik: “¿Jehovä munanqannöku vistikushaq o Diosta mana reqeqkunanöku? ¿Diospa sirweqnin kanqätaku vistikïnïwan rikätsikïkä?”. Y televisionchö imata rikänapaq kaqta manaraq akrarmi, Jehoväpa rikënimpaq alli o mana alli kanqantaraq rikänantsik, tsëta mana rurarqa mana allimanmi ishkirishwan (Sl 101:3). Mana alliman ishkirishqaqa, ¿imanöraq familiantsikkuna y wakinkuna sientikuyanqa? (1Co 10:31-33).
¿Imanirtaq precisan alli kaqta ruranapaq Diosnintsik nimanqantsikta defendinantsik? Porqui Jesucristum entëru nacionkunatawan mana alli rurëkunata chipyëpa ushakäratsimunqa y Diosta cäsukoqkunallam salvakuyanqa (Eze 9:4-7; 1Jn 2:15-17). Tsëmi alli kaqta ruranapaq Diosnintsik nimanqantsikta imëpis defendinantsik, tsënöpa alli portakunqantsikta rikämarnintsik Diosta alabayänampaq (1Pë 2:11, 12).
¿Imanö kanqätataq vistikïnï y altsapäkïnï rikätsikun?
JEHOVÄPA AMÏGUN KË: OLLQUWAN WARMI NEQ VIDEUTA RIKÄRIR KË TAPUKÏKUNATA CONTESTARIYË:
-
¿Imanirtaq Jehovä nimanqantsikta cäsukunantsik?
-
¿Imanirtaq teytakunaqa wamrankunata pishi kayanqampita yachatsiyanman Jehoväta cäsukuyänampaq?
-
¿Imanötaq jövin kaqkuna y edäna kaqkuna yanapakuyanman wakinkunatapis Jehovä alli këninta rikätsinampaq?
