5 KAQ YACHAKUNËKIPAQ
Bibliataqa kikin Diosnintsikmi qellqatsirqan
Bibliachöqa 66 librukunam kan, y tsëtaqa Jehovä Diosmi noqantsikpaq ruratsimushqa. Tsënö kaptimpis capaz nikanki: “¿Imanötan Bibliataqa qellqayarqan? ¿Pitaq qellqatsirqan?”. Tsëkunata musyanapaqqa, kanan witsanyaq Bibliata katsinantsikpaq Dios imata ruranqantam yachakunantsik.
1 KAQ: Bibliata nunakuna qellqëkäyaptinqa, ¿imanirtan nintsik Diospa Palabran kanqanta?
Bibliata qellqaq nunakunaqa cuarentanömi kayarqan. Tsë nunakunaqa chakrachö trabajaqkuna, mitsikoqkuna, pescadorkuna, gobernaqkuna y maskunam kayarqan. 1513 watachömi qellqar qallayarqan (Jesus manaraq shamuptin), y 98 watachömi ushayarqan (Jesus shamushqanchöna). Rikanqantsiknöpis, mil seiscientus watatanöran qellqar ushayarqan. Tsëqa, ¿imanirtan Bibliachö willakunqankunaqa contranakuntsu? Diospa Palabran karmi (leyi 1 Tesalonicensis 2:13). Tsë nunakunaqa manam kikinkuna pensayanqantatsu qellqayarqan, sinöqa “santu espïritu a yanapaptinmi” Diosnintsik musyatsinqanta qellqayarqan (2 Pëdru 1:21). Diosnintsikqa poderninwanmi tsë nunakunata yanaparqan pë pensanqanta qellqayänampaq (2 Timoteu 3:16).
2 KAQ: ¿Pikunatan Bibliapita yachakuyta puëdiyan?
Bibliachö këkaq alli noticiakunaqa llapan nacionkunachö, markakunachö y imëka idiömata parlaq nunakunatam yanapan (leyi Apocalipsis 14:6). Diosnintsikmi permitishqa mëtsika idiömakunaman Bibliata qellqayänampaq. Biblianöqa manam ni ima librupis kantsu. Tsëmi mëpita karpis o ima idiömata parlarpis yachakuyta puëdiyan.
3 KAQ: ¿Imatatan Jehovä rurashqa Bibliata mana ushakätsiyänampaq?
Bibliata qellqayänampaqqa animalkunapa qaranta y papïru niyanqan plantatam utilizäyarqan, y tsëkunaqa ushakaqllam kayaq. Tsënö kaptimpis, Bibliata qellqaqkunaqa atska copiakunatam rurayarqan. Mëtsikaq nunakunam Bibliata ushakätsita munayashqa, peru wakinkunaqa wanutsiyänan kaptimpis imëkanöpam defendiyashqa. Jehoväqa nunakuna pëpita yachakuyänanta munarmi Bibliata ushakätsiyänanta dejarqantsu. Tsëmi Bibliachö nin: “Teyta Diosnintsik llapan ninqankunaqa manam imëpis ushakantsu” (Isaïas 40:8).
MASLLA YACHAKUSHUN
Bibliata qellqayänampaq, mana ushakätsiyänampaq y llapan nunakunapa Bibliankuna kanampaq Jehovä imata ruranqantam yachakushun.
4 KAQ: ¿Pitaq Bibliata qellqatsirqan?
VIDEUTA rikäyë y leyiyë 2 Timoteu 3:16 ima ninqanta y këkunapaq parlayë:
-
Bibliata nunakuna qellqëkäyaptinqa, ¿imanirtan nintsik Diospa Palabran kanqanta?
-
¿Rasumpatsuraq nunakunata Dios mandarqan Bibliata qellqayänampaq?
Juk secretarium patronnin mandaptin juk cartata qellqan. Secretariu qellqarnimpis manam kikin pensanqantatsu qellqan, sinöqa patronnin ninqantam. Tsënöllam Bibliawampis pasakurqan. Nunakuna qellqarpis, Diosnintsik ninqantam qellqayarqan.
5 KAQ: Bibliataqa manam ushakätsita puëdiyashqatsu
Religionkunachö mandakoqkunaqa manam nunakuna Bibliata leyiyänanta dejayarqantsu, y mëtsikaq autoridäkunam Bibliataqa ushakätsita munayashqa, peru Diospa Palabran kaptinmi puëdiyashqatsu. Wakin nunakunaqa Bibliata mana ushakätsiyänanta munarmi, wanutsita munëkäyaptimpis imëkanöpa defendiyashqa. VIDEUTA rikäyë y këpaq parlayë:
-
Bibliata mana ushakätsiyänampaq defendiyanqanta musyanqëkiqa, ¿yanapashunkiku mas leyita munanëkipaq?
Leyiyë Salmus 119:97 ima ninqanta y këpaq parlayë:
-
¿Imanirtan michäkuykäyaptimpis Bibliata traducita y rurëta dejayashqatsu?
6 KAQ: Bibliataqa pïmëmi katsin
Bibliatanöqa manam ni ima librutapis traduciyashqatsu ni rurayashqatsu. Leyiyë Hëchus 10:34, 35 ima ninqanta y këkunapaq parlayë:
-
¿Imanirtan Diosqa, Bibliata imëka idiömaman traduciyänanta y llapankuna katsiyänanta munan?
-
Bibliapita yachakunqëkipitaqa, ¿imatan mas gustashunki?
Cäsi
llapan
nunakunam
Bibliata idiömankunachö leyita puëdiyan
Bibliataqa
3 mil
idiömapitapis
masmannam traduciyashqa
5 mil millontanönam
Bibliata rurayashqa.
Bibliataqa juk librukunapitapis mas atskatam rurayashqa
WAKIN IMA NIYANQAN: “Bibliaqa unë librum, y nunakunallam qellqayashqa”.
-
¿Qamqa ima ninkitan?
-
¿Imanirtan nishwan Bibliaqa Diospa Palabran kanqanta?
KËTAM YACHAKURQUNKI
Bibliaqa Diospa Palabranmi, tsëmi llapankuna leyiyänanta munar imëka idiömakunaman traduciyänampaq Dios permitishqa.
¿Yarpankiku?
-
Bibliata nunakuna qellqëkäyaptinqa, ¿imanirtan nintsik Diosnintsik pensanqanta qellqayanqanta?
-
¿Ima ninkitan Bibliata mana ushakätsiyanqampaq, imëka idiömakunaman traduciyanqampaq y pïmëpa kapunqampaq?
-
Diosqa reqinëkita munarmi imëkata rurashqa, ¿tsëta musyar imanötan sientikunki?
MASTA YACHAKUY
Unë tiempupita kanan tiempuyaq Bibliawan ima pasanqanta leyi.
“Diospa Palabranqa kananyaqmi këkan” (¡Musyatsikoq!, noviembri 2007)
Bibliata ushakätsita munarpis mana puëdiyanqanta leyi.
Bibliata traduceq nunakuna imä peligrukunapa pasayanqanta rikë.
Bibliataqa mëtsika idiömakunamanmi traduciyashqa y atska copiakunam kan. Tsëqa, ¿imanötan musyantsik Diospa Palabran mana cambiashqa kanqanta?
“¿Bibliachöqa Dios nimanqantsikku këkan?” (jw.org päginachö yarqamoq)
a Santu espïrituqa Diospa poderninmi, y tsëtaqa 7 kaq yachakunëkipaq kaqchömi maslla yachakunki.
