Kuyë wawqilläkuna y panilläkuna:

Teyta Diosta y nuna mayintsikta kuyarmi Jesus kënö nir mandamanqantsikta cumplintsik: “Ëwarnin qatimaqnïkuna kayänampaq llapan nacionpita nunakunata yachatsiyë, [...] y bautizayë” (Mat. 28:19, 20; Mar. 12:28-31). Llapan shonquntsikwan nunakunata kuyarmi, ‘imëyaqpis kawëta chaskiyänampaqnö kaqkunata’ shumaq yanapantsik (Hëch. 13:48).

Unëqa imata ninapaq kaqta dememoria yachakunapaq y nunakunata publicacionkunata qaranapaqmi kallpachakoq kantsik. Peru kananqa nunakunata imanö parlapänapaq kaqtam masqa yachakunantsik. Pëkuna musyëta munayanqampita parlapashqam nunakunaqa kuyanqantsikta rikäyanqa. Cada nunam jukläya kantsik. Tsëmi pitapis parlaparqa, imata musyëta munanqanta y imapaq yarpachakunqanta cuentaman churanantsik. ¡Kë follëtum tsënö ruranapaq yanapamäshun!

Kë follëtuchömi döcita yachakushun. Cada ünuchömi kuyakoq kanapaq y Jesuspa qateqnin kayänampaq nunakunata yachatsinapaq imanö kanapaq kaqta yachakushun. Cada yachakunapaq kaqchömi, Bibliachö willakunqampita yachakushun. Tsëchömi yachakushun nunakunata yachatsirnin, Jesusnö o punta cristiänukunanö ruranapaq. Kananqa manam imata ninapaq kaqta dememoria yachakuykurtsu nunakunata parlapëta munantsik, sinöqa kuyanqantsikta rikäyänantam munantsik. Imanö kanapaq kaqta yachakunqantsikqa yachatsikunqantsikchömi yanapamäshun. Peru wakin yachakunqantsikqa, nunakunata parlapar qallanapaq, watukaq kutinapaq y Bibliapita yachatsinapaqmi mas yanapamäshun.

Cada yachakunëkipaq kaqpita yachakurqa, kawanqëki sitiuchö nunakunata yachatsir imanö ruranëkipaq kaqman pensë. Imanö yachatsikunapaq kaqta musyashqapis, Jehoväta y nunakunata kuyanqantsikmi masqa yanapamäshun. Jehoväta y nunakunata mas kuyanëkipaq kallpachakuy. Tsëmi yanapashunki Jesuspa qateqnin kayänampaq nunakunata yachatsinëkipaq.

Qamkunawan juntu Jehoväta sirwiqa alläpa kushikuypaqmi (Sof. 3:9). ¡Kuyakoq karnin Jesuspa qateqnin kayänampaq nunakunata yachatsiyanqëkichö Jehovä bendicïkuyäshuy!