Jesusqa ‘Jordan mayupa wak tsimpanchömi’ atska tiempupa kashqa karqan (Juan 10:40). Y tsëpitaqa Jerusalentam ëwarqan.

Qateqninkunawan “mëtsikaq nunakunam” pëwan ëwëkäyarqan, y impuestu cobrakoqkuna y jutsasapakunapis (Lücas 14:25; 15:1). Jina Jesuspa contran këkaq fariseukunawan Ley qellqaqkunapis, tsëchömi këkäyarqan. Oqrakashqa üshapaq, oqrakashqa wamrapaq y kapoqyoq nunapaq y Läzarupaq parlaq igualatsikïkunawan Jesus yachatsikunqanmanqa, alleqmi yarpachakuyänan karqan (Lücas 15:2; 16:14).

Itsachi Jesusqa chikeqninkuna pëpaq mana allita parlayanqanman y despreciayanqanman yarparnin, Galilëachö yachatsikunqanta qateqninkunata yapë yarpätsirqan.

Kënömi nirqan: “Ishkitsikoqkuna kanantaqa manam imapis atajanqatsu. Tsënö kaptimpis, ¡allaw ishkitsikoq kaq nuna! [...] Kikikikuna imanö këkäyanqëkita alleq rikäyë. Creikoq mayiki jutsata ruraptinqa, piñapë, y arrepentikuptinqa, perdonëkï. Y cada junaqchö qanchis kuti contrëki jutsata ruraptimpis, qanchis kuti qamman kutimur ‘arrepentikümi’ nishuptikiqa, perdonëkunëkim” (Lücas 17:1-4). Itsachi perdonakoq këpaq Jesus parlanqanqa, tsë asuntupaq tapukunqanta Pëdruta yarpäratsirqan (Mateu 18:21).

¿Jesus yachatsikunqantaqa qateqninkuna cäsukuyarqantsuraq? Pëkunam, “mas markäkuyänäpaq yanapëkayämë” niyarqan. Jesusnam kënö nirqan: “Sitsun markäkïnikikuna ñushta muru niraqllapis kanman, tsëqa möra nishqan montita, ‘¡këpita llupikärir, lamarman plantakäri!’ niyaptikipis, cäsuyäshunkimanmi” (Lücas 17:5, 6). Awmi, wallka markäkïllawanmi alläpa espantëpaqkunata rurëta puëdishwan.

Tsëpitanam, humildi këpaq y precisaq tukïpaq parlarnin apostolninkunata kënö nirqan: “¿Qamkunapita pitaq sirweqnin chakrachö yapyanqampita o mitsinqampita kutiramuptin, ‘këman ras shamï y mësachö mikuri’ ninman? Tsëpa rantinqa, ¿manatsuraq kënö ninqa: ‘Imallatapis cenanäpaq ruramï, y mandilnikita watakurkur sirwimë mikur y upur ushanqäyaq, tsëpitanam qamqa mikunki y upunki’? Pëqa manachi sirweqninta agradecikunqatsu ruranampaq kaqkunallata rurëkaptinqa, ¿aw? Jina tsënölla qamkunapis llapan rurayänëkipaq kaqta rurar usharirqa, kënö niyë: ‘Ni imapaqpis mana sirweq sirwipakoqkunallam kantsik. Ruranqantsikqa ruranapaq kaqkunallam kashqa’” (Lücas 17:7-10).

Diosta sirweqkunaqa, Diospa kaqtam precisaqpaq churayänan y manam qonqayanmantsu Diosta adorë y markanchö këqa alläpa kushikïpaq kanqanta.

Tsëpitanam Betaniapita juk willakoq nuna chärirqan. Pëtaqa Läzarupa paninkuna Marïawan Martam kachashqa kayarqan. Pëmi, “Teytë, ¡rikë!, kuyanqëki amïguïkim qeshyëkan” nir willarirqan (Juan 11:1-3).

Kuyashqa amïgun Läzaru qeshyëkanqampita llakikurnimpis, manam rurëkanqantaqa jaqirqantsu. Tsëpa rantinqa kënömi nirqan: “Kë qeshyaqa manam wanïllachötsu usharinqa, sinöqa Dios alabashqa kanampaqmi këqa kanqa, tsërëkur Diospa Tsurimpis alabashqa kanampaq”. Jesusqa ishkë junaq masmi tsëchö quedakurqan, tsëpitanam qateqninkunata, “Judëa provinciaman yapë ëwashun” nirqan. Peru pëkunaqa, “Maestru, ichikllaran pasarishqa Judëa provincia nunakuna rumiwan tsampiyäshïnikita tïrayanqampita, ¿tsënö këkaptinku yapë kutita munanki?” niyarqanmi (Juan 11:4, 7, 8).

Tsënam Jesusqa kënö nirqan: “Junaqchöqa chunka ishkë (12) hörakunam aktsi kan, ¿aw? Pipis junaqpa aktsinwan pureqqa, manam ni  imawampis trompisantsu, porqui nunakunapaq aktsitam rikan. Peru pipis paqaspa pureqqa, trompisanmi, porqui aktsiqa manam pëchötsu këkan” (Juan 11:9, 10). Itsachi tsënö ninqanwanqa, sagrädu rurëninta ruranampaq Dios dispuninqan tiempu manaraq ushanqanta rikätsikïkarqan. Tsëmi yachatsikurnin sïguirqan.

Tsëpitanam, “amïguntsik Läzaruqa punukashqam quedarishqa, peru riyatsinäpaqmi pë këkanqanman ëwashaq” nirqan. Tsëmi qateqninkunaqa, “Teytë, punïkarninqa kachakärinqachi” niyarqan. Tsënam Jesusqa cläru kënö nirqan: “Läzaruqa wanushqam [...]. Peru pë kaqta ëwashun” (Juan 11:11-15).

Jesusta wanutsita munayanqanta musyarpis, Tomasqa yanaqëtam munarqan. Tsëmi qateq mayinkunata, “noqantsikpis ëwashun pëwan juntu wanunapaq” nirqan (Juan 11:16).