Decäpolis ëwëchömi Jesusqa këkarqan. Mëtsika nunakunam yachatsikunqanta wiyayänampaq y kachakätsinampaq pëman ëwayarqan, peru tsë kutichöqa jatusaq canastapam mikïta apayarqan.

Tsëpitanam Jesusqa qateqninkunata kënö nirqan: “Alläpam ankupä këchö këkaq mëtsika nunakunata, porqui kima junaqpanam noqawan quedakuyashqa, y manam mikuyänampaq imankunapis kayäpuntsu. Mallaqllata wayinkunaman kachëkuptïqa, mallaqëwanmi nänichö ishkiriyanqa, y wakinkunanäqa alläpa karupitam kayan”. Tsënam qateqninkunaqa kënö tapuyarqan: “¿Mëchöraq kë tsunyaq sitiuchöqa kë llapan nunakuna mikuyänampaq pipis tsëtsika tantata tarinman?” (Marcus 8:2-4).

Tsënam Jesusqa kënö nirqan: “¿Ëka tantataq kayäpushunki?”. Pëkunanam kënö niyarqan: “Qanchis tantakuna, y juk ishkë ichisaq pescädukunallam” (Mateu 15:34). Tsënam Jesusqa tsëchö këkaqkunata patsaman täkuyänampaq nirqan. Tsëpitanam tantakunata y pescädukunata tsarirkur Diosta agradecikurirqan y pakirirmi qateqninkunata qorqan nunakunata qoyänampaq. ¡Y llapankunapis pacha juntam mikuyarqan! Sobrantaqa qanchis canastatam ëlluyarqan. Y ollqukunallam chusku waranqanö mikuyarqan, peru warmikunata y wamrakunataqa manam yupayarqantsu.

Tsëpitanam tsëchö këkaqkunata despacharirnin, Jesusqa qateqninkunawan Magadan markayaq barcuwan ëwakuyarqan, tsëqa këkarqan Galilëa qochapa tsimpanchömi. Tsëman chäriyaptinnam, wakin fariseukuna y saduceukunaqa Jesusta pruëbaman churëta munar, ciëlupita juk señalta ruranampaq mañayarqan.

Peru imarëkur tsënö nikäyanqanta cuentata qokurirmi, kënö nirqan: “Ampïriptinmi qamkunaqa kënö niyanki: ‘Usyarinqam, porqui ciëlum pukärishqa’; y patsa waräramuptinnam, ‘kananqa alalanqam y tamyanqam, porqui ciëlum pukëkan, peru pukutarëkanmi’ niyanki. Ciëluta rikärir imanö tiempu kanampaq kaqtaqa tantiyëta yachayankim, peru kanan witsan señalkunata tantiyëtaqa manam yachayankitsu” (Mateu 16:2, 3). Tsëpitanam, manam ni ima señaltapis rikäyankitsu sinöqa Jonasta pasanqan señal-llatam rikäyanki nirqan.

Juk barcuwanmi Jesuswan qateqninkunaqa Betsaida markayaq ëwëkäyarqan. Tsëman viajëkäyanqanchömi qateqninkunaqa cuentata qokuriyarqan juk tantallata apëkäyanqanta. Tsëmi rey Herödisman qaqaq fariseukunawan y saduceukunawan ima pasakushqa kanqanta cuentaman churëkur, Jesusqa kënö nirqan: “Nawikikunata kichëllata katsiyë; cuidakuyë fariseukunapa levadürankunapita y Herödispa levadürampita”. Levadürapaq parlanqanta wiyarirmi, qateqninkunaqa tantata mana apayanqampita  parlëkanqanta pensayarqan. Peru mana entiendishqa kayanqanta, cuentata qokurirmi Jesusqa kënö nirqan: “¿Imanirtaq tanta mana kayäpushunqëkipaq parlayanki?” (Marcus 8:15-17).

Jina kënömi tapurqan: “¿Manaku yarpäyanki pitsqa tantallata pitsqa waranqa (5.000) nunakunapaq pakinqäta, y ëka canastakuna junta sobranqanta ëlluyanqëkita?”. Pëkunanam, “chunka ishkëtam” niyarqan. “Y qanchis tantallata chusku waranqa (4.000) nunakunapaq pakiptï, ¿ëka jatun canastakuna juntatataq sobranqanta ëlluyarqëki?”. Pëkunanam, “qanchistam” niyarqan (Marcus 8:18-20).

Tsëpitanam Jesus kënö nirqan: “¿Imanirtaq cuentata qokuyarqunkitsu tantapaq mana parlapëkäyanqaqta?”. Tsënö nirirnam, “cuidakuyë fariseukunapa y saduceukunapa levadürankunapita” nirqan (Mateu 16:11).

Tsënö niriptinqa, qateqninkunaqa entiendiriyarqanmi. Levadürataqa masata poqutsiyänampaqmi utilizäyan. Tsëmi Jesusqa levadürapaq parlarqa mana alli rurëkunapaq parlëkarqan. Fariseukunapa y saduceukunapa yachatsikïninkuna nunakunata mana alliman chätsiptinmi, Jesusqa cuidakuyänampaq nikarqan (Mateu 16:12).