Shonqunkunachö imanö kayanqampitam, nunakunaqa Jesus ninqanta y ruranqanta cäsukuyarqan. Y tsëqa Galilëachö Simon jutiyoq fariseu nunapa wayinchömi cläru rikakärirqan. Tsë nunaqa Jesustam wayinman mikoq invitarqan, itsachi maslla reqita munarnin. Jesusqa juk kutikunachöpis impuestu cobrakoqkunawan y pescadorkunawanqa mikushqam karqan, y tsë nuna invitaptimpis ëwarqanmi, itsachi tsëman ëwaqkunata yachatsikunanrëkur ëwarqan.

Peru Jesus chäriptinqa, manam costumbri kanqanmannötsu chaskiyarqan. Unë Palestïnachöqa llanqishqa puriyaptinmi chakinkunaqa rakchatakaq y achachaq. Tsëmi pipis jukpa wayinman chäriptinqa, shumaq chaskiyanqanta rikätsikurnin alalaq yakuwan chakinkunata paqayäpoq. Peru Simonpa wayinchöqa manam Jesuspa chakinta pipis paqapurqantsu. Y manam costumbrinkunamannötsu mutsarnin chaskiyarqan. Jina invitädukunata shumaq chaskirmi, peqankunaman pukutaq aceitita jichayäpoq, peru Jesuspamanqa manam jichayäpurqantsu.

Llapan invitädukunam tëkur mësaman kinkishäriyarqan. Y mikïkäyaptinnam, mana invitashqa këkarpis, ‘tsë markachö jutsasapa nir reqiyanqan warmi’ pakëllapa yëkurirqan (Lücas 7:37). Rasumpa kaqchöqa, llapantsikmi jutsasapa kantsik y imallachöpis pantarintsik, peru tsë warmiqa itsachi lluta purikoq rakcha warmi karqan. Itsachi Jesuspa yachatsikïninkunapita musyarqan y “nitipakashqa këkaqkuna[ta]” yanapëta puëdinqanta wiyashqa karqan (Mateu 11:28, 29). Tsëchi Jesusta asheq ëwarqan.

Tëkur mësaman Jesus kinkisharëkaptinnam, tsë warmiqa qepampa yëkurir chakin kaqman qonqurikïkurqan. Tsënam waqar qallëkurqan y Jesuspa chakinta weqinwan oqutarqan y aqtsanwan tsakitsirqan. Jina, chakintam kuyëpa mutsarqan y apanqan pukutaq aceititam jichapurqan. Tsëta rikëkurnam, Simonqa kënö pensarqan: “Kë nuna Diospa willakoqnin rasumpa karqa, musyanmanmi pï y imanö warmi yatëkanqanta, jutsasapa warmi kanqanta” (Lücas 7:39).

Peru Jesusqa imata pensëkanqanta cuentata qokurirmi, kënö nirqan: “Simon, juktam nirita munaq”. Simonnam kënö nirqan: “Maestru, ¡nimë!”. Tsënam Jesusqa kënö nirqan: “Ishkaq nunakunam qellë prestakoq nunapa jaqan kayarqan; juk kaqmi pitsqa pachak (500) denariuta jaqan karqan, peru juknin kaqnam, pitsqa chunkata (50) jaqan karqan. Peru kutitsiyänampaq imankunapis mana kaptinmi, ishkampa jaqa këninkunata chipyëpa perdonëkurqan. Tsëqa, ¿ishkampita mëqantaq pëta mas kuyanqa?”. Simonnam kënö contestarqan: “Mas atska jaqayoqta perdonanqan kaqchi” (Lücas 7:40-43).

Jesusqa alli contestashqa kanqanta nirirmi, warmita rikëkur Simonta kënö nirqan: “¿Rikankiku kë warmita? Wayikimanmi yëkamurqö; peru manam chakïta paqanäpaq yakuta qomarqunkitsu. Peru kë warmiqa weqinwanmi chakïta paqamushqa, y aqtsanwanmi tsakitsimushqa. Manam chaskimarnï mutsamarqunkitsu, peru kë warmiqa yëkamunqä hörapita patsëmi chakïta kuyëpa mutsamushqa. Manam peqäman aceitita jichamurqunkitsu, peru kë warmiqa chakïmanmi pukutaq aceitita jichamushqa”. Rurëninkunapita tsë warmi chipyëpa arrepentikushqa kanqantam Jesusqa cuentata qokurirqan, tsëmi Simonta kënö nirqan: “Kë warmiqa, mëtsika jutsayoq karpis, perdonashqam kashqa, porqui alläpa kuyakunqantam rikätsikushqa.  Peru ichikllata perdonayanqan kaqqa, ichikllam kuyakun” (Lücas 7:44-47).

Jesusqa manam jukwan jukwan oqllanakï alli kanqantatsu nikarqan. Sinöqa, jutsankunapita arrepentikoqkunata y pë shoqananta asheq kaqkunata alläpa kuyanqanta y ankupanqantam rikätsikïkarqan. Tsë warmiqa kushikurqanchi Jesus kënö ninqanta wiyarnin: “Jutsëkikunapita perdonashqanam kanki. [...] Markäkïnikim salvashurqunki; yamëna ëwakï” (Lücas 7:48, 50).