Bautizakoq Juanqa juk watanönam carcelchö llawirëkarqan. Peru alläpa espantëpaq rurëkunata Jesus rurëkanqantaqa wiyarqanmi. Pensari, ¡imanöraq sientikurqan Nain markachö juk viudapa wamranta kawaritsishqa kanqanta wiyarir! Peru Juanqa, kikin Jesus Mesïas kanqanta ninantam munarqan. Tsëmi ishkë qateqninkunata Jesusman ëwar kënö tapuyänampaq mandarqan: “¿Qamku Shamoqpaq Kaq kanki, o juk mastaraqku shuyäyäshaq?” (Lücas 7:19).

¿Imarëkurtaq tsënö tapukurqan? Pëqa Diosta mana jaqipa sirweq nunam karqan. Qepa ishkë watatanö Jesusta bautizariptinmi, jananman santu espïritu urämoqta rikarqan y Tsurinta allipa rikanqanta nirnin Diosta parlaqta wiyashqa karqan. Tsëmi markäkïnin ushakëkanqantaqa mana pensashwantsu. Tsënö kashqa kaptinqa, Jesusqa manachi tsë kutichö Juanpita alläpa alliqa parlanmantsu karqan. Markäkïnin alli këkaptinqa, ¿imanirtaq tsënöqa tapukurqan?

Itsachi Mesïas kanqanta kikin Jesus willananta munarqan, tsëqa alläpachi yanapanman karqan carcelchö llawiranqan witsankuna. Peru Juanqa masta shuyarartsun tsënöqa tapukurqan. Pëqa musyarqanmi Dios Akranqan nunaqa, rey y librakoq kanampaq kaqta Bibliachö këkaq Diospa musyatsikïninkuna willakunqanta, peru Jesusta bautizanqampitaqa, mëtsika killakunanam pasarishqa karqan y pëqa carcel-llachöran këkarqan. Jesuspa qepanta jukraq shamunampaq kaqta y pëchöraq Mesïaspaq parlaq Diospa musyatsikïninkuna cumplikänampaq kaqtam Juan tapukunqanqa rikätsikurqan.

Pë Mesïas kanqantaqa Jesusqa manam defrentitsu Juanpa qateqnikunata willarqan. Tsëpa rantinqa, qeshyayoqkunata kachakätsirmi Dios yanapëkanqanta rikätsirqan. Tsëpitanam nirqan, “ëwayë y rikäyanqëkita y wiyayanqëkita Juanta willayë: wiskukunam rikäyan, cöjukunam puriyan, lepra qeshyayoqkunam kachakäyan, sordukunam wiyayan, wanushqakunam kawariyan y waktsakunam alli willakïkunata wiyëkäyan” (Mateu 11:4, 5).

Juanqa itsachi tsënö tapukurqan tsë witsanyaq ruranqampitapis masta rurananta shuyarar y carcelpita jorqananta munar. Tsënö kaptimpis, rurëkanqan milagrukunapita ima mastapis mana shuyaränampaqmi Jesusqa nirqan.

Juanpa qateqninkuna ewkuyaptinnam, Jesusqa Juanpita parlar Diospa willakoqninkunapitapis mas precisaq kanqanta nunakunata nirqan. Malaquïas 3:1 textuchö ninqannöpis, Jehoväpa ‘willakoqnin’ y Malaquïas 4:5, 6 textuchö Diospa willakoqnin Elïasmi Juanqa karqan. Jesusmi kënö entienditsikurqan: “Manam ni pipis Bautizakoq Juanpita mas precisaqqa sharkushqatsu, peru ciëluchö Gobiernuchö mana alläpa precisaq kaqmi, pëpita mas precisaq” (Mateu 11:11).

Ciëluchö Gobiernuchö mana alläpa precisaq kaq, pëpita mas precisaq kanqanta nirqa, Jesusqa rikätsikïkarqan Diospa Gobiernunchö Juan mana gobernanampaq kaqtam. Cristu chänampaq nänita alistaqmi pëqa karqan, peru ciëluta wakin nunakuna ëwayänampaq nänita Jesus manaraq kichaptinmi, Juanqa wanukurqan (Hebrëus 10:19, 20). Tsënö kaptimpis, Diosman markäkoq nunam karqan, y Diospa Gobiernun mandakur qallaptinmi Patsachö kawanqa.