1, 2. a) Casakuyanqanman ëwarnin, ¿ima tapukïtaraq rurakuntsik, y imanir? b) ¿Ima tapukïkunapa respuestantaraq kë capïtulochö yachakushun?

¿CASAKUYANQANMAN ëwë gustashunkiku? Casi llapan nunakunatam gustan, alläpa shumaq y kushikïpaq kaptin. Casakoqkunapis más alli kaq röpankunatam yakakuyan y alläpa kushishqa kayanqantam rikätsikuyan. Y alläpa kushikïwanmi shuyäyan, shamoq kawëninkunachö kushishqa kawakuyänanta.

² Tsënö kaptimpis yarpänantsikmi, casädokunaqa alläpa hipaki tiempokunapa pasayanqanta. Casakuyanqanman ëwarnimpis: “¿Kushishqallatsuraq imëyaqpis kawakuyanqa?” nishpam tapukuntsik. Imëyaqpis kushishqaqa kawakuyanqa Dios nenqanta wiyakurninllam (leyi Proverbios 3:5, 6). Këkunata wiyakuyanqanmi yanapanqa kushishqa Diosnintsikpa kuyakïninchö imëpis kawakuyänampaq. Tsëpaqmi chusku tapukïkunapa respuestanta Bibliachö rikärishun, tsëtam wiyakunantsik majannaq o majayoq karpis: ¿Imanirtaq casakïta munä? ¿Imanötaq alli majata akräman? ¿Imatataq ruräman casakïta munarqa? ¿Imataq yanapanqa casädokunata kushishqa kawakuyänampaq?

3. ¿Imanirtaq wakinkuna nimashqallaqa casakushwantsu?

³ Wakinqa, majä taririr y casakurirllam kushishqa kawashaq  niyanmi. ¡Pero manam tsënötsu! Jesusman yarpärishun. Peqa willakorqanmi soltero këqa, huk shumaq qarë kanqanta, y manam nerqanllatsu, kikimpis manam casakorqantsu, tsëmi wakinkunatapis animarqan soltero kakuyänampaq (Mateo 19:11, 12). Apóstol Pablupis majannaq kawakïqa atska bendicionkunata apamonqantam willakorqan (1 Corintios 7:32-38). Tsënö willapäkushqa karpis Pabluwan Jesusqa manam casakuyänanta michäyarqantsu, hinamampis Bibliaqa willakun casakuyänanta michäkïqa ‘supëpa munenin’ y yachatsikïnin kanqantam (1 Timoteu 4:1-3). Jehová Diosta shumaq servikuyänampaqmi majannaq këqa alläpa yanapan. Tsëmi wakinkuna nimashqallaqa casakushwantsu.

4. ¿Imanirtaq casado kawakïlla alli wambrakunata wätayänampaq?

⁴ ¿Casakïqa kushikïta apamuntsuraq? Awmi. Casakïqa Teyta Diospa shumaq qarëninmi y kushikïtam apamun (leyi Génesis 2:18). Casado kawakïllam alläpa alli wambrakunata wätayänampaq, tsëchömi wambrakunata kuyarnin, willaparnin, yachatsirnin ishkan shumaq wätayanqa (Salmo 127:3; Efesios 6:1-4). Hina manam tsëllatsu, kanran maskunapis imanir casakuyänampaq.

5, 6. a) Eclesiastés 4:9-12, nenqannö, ¿ishkaq këqa ima allikunatataq apamun? b) ¿Imanötaq casado kawakï tikrarinman hïlowan piltashqa waskanö?

⁵ Kë qallanan capïtulochö rikanqantsik textopita más alleq yachakunapaqqa, rikärishun qepanchö këkaq versïculokunata: “Hukllaqllapitaqa, ishkaqmi más alli kanqa, ishkan trabajarqa más pägotam chaskiyanqa. Huknin ishkiptenqa hukninmi sharkatsenqa. Pero hapallanlla purikar ishkiriptenqa ¿piraq sharkatsenqa? Hinamampis ishkaq punukorqa qoñütsinakuyanqam, pero ¿piraq qoñütsenqa hapallan punukoqtaqa? Hukllaqllataqa venciriyanmanmi, pero manam ishkaqtaqa. Kimapashqa  hïloqa, manam ishkëman rasllaqa rachirinmantsu” (Eclesiastés 4:9-12).

⁶ Kë versïculoqa rikätsimantsik, rasumpëpa kuyanakïpitam. Pero ¿casädokunatapis yanapantsuraq kë willakï? Awmi, casado kawakïchöran reqinakurnin más kuyanakïta puëdeyan, tsëmi ishkaqpaq qepa versïculochö parlanqanqa yanapan casädokunata. Hinamampis huk warmiwan ollqu kuyanakuyanqan sinchi kanampaqqa kanran huk yanapakï más. Tsënöpam Eclesiastés nenqannöpis kima hïlowan piltashqa waskanö casado kawakïpis más sinchi kanqa. Tsëpenqa, ¿mëqantaq tsë sinchiyätseqkaq ‘hïloqa’? Jehová Diosmi. Casädokuna Jehová Diosta cäsokur puntaman churarqa kushishqam kawakuyanqa.

7, 8. a) Casakïta munar hukta hukta munapar kakïkaqkunataqa, ¿ima consëjotataq qorqan apóstol Pablu? b) ¿Casado kawakïpita imataq nin Biblia?

⁷ Hina casado kawakïllachömi warmipis ollqupis majanwan punukur kushikïta tarinman. Tsënö majankunawan kakuyaptinllam Diosnintsikpaqqa alli (Proverbios 5:18). Pero ¿imatataq ruranman ollqupis warmipis ‘casacunan edaninchona car’ pasëpa casakïtana munar hukta hukta munaparqa? Tsënö peqankunata mana tsarëta puëdernenqa mana allimanmi ishkiyanman, tsëmi apóstol Pablu willakorqan: “Sitsun peqequicunata tsareta mana puedeyanquitsu, mejor casaquikuyë jucta jucta munapar mana caquicayänequipaq” (1 Corintios 7:9, 36; Santiagu 1:15).

⁸ Tsënö nirpis, apóstol Pabluqa kënömi willakorqan: “Yarpacachärïqa, casacurir vidata pasarcuyanequillatam”, tsëmi casakïta munarqa alleq yarpäyänan casado kawakïqa mana fácil kanqanta (1 Corintios 7:28). Soltero këkar mana pasayanqan problëmakunatam pasayanqa. Tsëpenqa, ¿imatataq rurayanman casakoqkuna shumaq  kawakuyänampaq? Tsëpaqqa alli majatam akrayänan.

9, 10. a) ¿Imataq nerqan apóstol Pablu Jehoväta mana sirveqkunawan casakï munaqkunapaq? b) ¿Allitsuraq kawayanqa Jehová Diospa consëjonta mana wiyakurnin casakoqkunaqa?

⁹ Casakïta munaqkunapaqmi Teyta Diospa yanapëninwan apóstol Pablu kënö qellqarqan: “Ama juc shonqunolla kayanquitsu Teyta Jesusman mana creicoqcunawanqa” (2 Corintios 6:14). ¿Imataq pasan ishkë animalta yuntarkurnin yapyar qallëkushqa? Huknin más hatun y más kallpasapa kaptenqa manam igualtsu trabajayanqa y pishipätsinakuyanqam. Tsënöllam hina huk cristiano Diosta mana adoraqwan casakuptimpis pasanqa. Manam kushishqatsu kawakuyanqa, hukninmi Teyta Diospa kuyakïninchö kawakïta munanqa, pero hukninqa kikimpa munëninllatam ashenqa. Tsënö kaptenqa manam ishkampis kushishqaqa kawayanqatsu. Tsëmi apóstol Pablu kënö willapäkorqan: “Casacutsun Jesucristuman creicoq nunallawan” nishpa (1 Corintios 7:39).

¹⁰ Pero wakinkunaqa hapallan këta mana munarmi, Biblia consejakonqanta mana wiyakushpa casakuriyan Diosta mana adoraqkunawan, allim kawakuyäshaq nishpa. Pero llakikïpaq kawëmanmi chäyan y cuentata qokuriyan mana alli majata akrayanqampita, Jehová Diospaqnö ni imatapis mana rurëta puëdernin, y hapallan kanqampitapis más hapallanran sientikuriyan. Tsënö kaptimpis, kushikïpaqmi atska wawqikuna y panikuna Jehová Diosman confiakurnin ishkiyashqatsu kë mana alli rurëman (leyi Salmo 32:8). Soltërollaran kakïkäyan, y musyayanmi imëllapis Teyta Diospa markanchö majankuna tariyänanta.

11. ¿Ima yanapakïkunataq kan alli majata tarinapaq? (“ Imakunataq yanapamäshun alli majata akranapaq” neq recuadrota rikäri.)

 ¹¹ Tsënö kaptimpis, alli majata tarinapaqqa, manam Jehová adoraqllatsu kanman, ishkampis alleqmi reqinakuyänan imanö kayanqantapis. Y Jehoväpaq rurëta munayanqanchöpis igualmi kayänan y ishkampis shonqunkunapita patsëmi Diosta kuyayänan. Llapanchö wiyakoq y yachëwan sirweqmi atska kuti qellqamushqa willapäkïkunata, tsëtam Teyta Diosta mañakurirnin yachakuyänan y rurayänan (leyi Salmo 119:105). *

12. ¿Imanötaq wakin markakunachöqa majata ashiyan y unë tiempochö pitaq tsënö rurarqan?

¹² Teytan y mamanmi wakin markakunachöqa wambrankunapaq majan ashiyäpun. Tsëtaqa rurayan wambrankunapaq alli majata akrëta yacharninmi. Unë tiempochöpis tsënö rurayanqanqa allim karqan, tsënöllam kanampis. Tsëta rurarnenqa teytakuna yachakuyanman Abrahán ruranqampitam. Tsurimpaq warmin ashirnenqa manam rikarkantsu shipashpa qellënin kanqanta, ni reqishqa kastapita kanqanta. Tsëpa rantenqa, sirveqnintam mandarqan, Jehová Dios adoraq warmita alleq rikëkur ashimunampaq (Génesis 24:3, 67). *

13-15. a) ¿Huk ollqu, warmita ashinampaq imanötaq Proverbios 24:27 yanapanman? b) ¿Imatataq warmi ruranman casakunampaq listo këkänampaq?

¹³ Casakïtana munëkarqa, “¿listonaku këkä casakunäpaq?”  nishpam tapukushwan. Casakïpaq listona këqa, manam shonquchö ni peqachö listo këllatsu, ni wambra munëllatsu, ni hapallämi kä nïllatsu. Sinöqa más rurëkunamampis yarpänanran.

¹⁴ Puntata yarpärishun casakïta munëkaq jövenman. Kë versïculochö Biblia nenqanmanmi yarpänan: “Trabäjïki katsun chacrachö, tsëchö alleq trabajanëkipaq. Tsëpitam hina wayiki ruranëki” (Proverbios 24:27). ¿Imatataq yachatsimantsik kë texto? Unë tiempochöqa wayiyoq këta munarqa o familiayoq këta munarqa, kënömi tapukoq: “¿Listoku këkä warmita manteninäpaq y wambrakunata wätanäpaq?”. Manaraq casakurmi chacrankunachö alli trabajanan karqan. Hina tsënöllam kanan tiempochö ollqukunapaqpis. Casakïta munarqa familianta manteninampaq listom kanan, kallpanllachöraq kanqanyaqqa alleqmi trabajanan. Tsëmi Biblia nin familianta mana alli manteneq nunaqa Diosman mana confiakoq nunapitapis más peor-ran (leyi 1 Timoteu 5:8).

¹⁵ Warmipis listom këkänan nunanta yanapanampaq. Awmi, Bibliapis alleqmi willakun imanö huk warmi, nunanta yanapanampaq y wayinchö kaqkunata shumaq rikänampaq (Proverbios 31:10-31). Warmipis ollqupis, alleq manaraq pensarnin raslla casakorqa kikimpa munëninllatam ashin, tsëqa upa këmi. ¿Imanir? Manam yarpakachantsu majanta shumaq rikänanman. Tsëmi casakï munaqkunaqa Diospa kaqta puntaman churayänan. ¿Ima ninantaq këqa?, rikärishun.

16, 17. ¿Biblia ima nenqanmantaq yarpakachanman casakïpaq yarpëkaqkuna?

¹⁶ Puntataqa, ollqupis warmipis alleqmi yarpakachäyänan casakurirnin Diosnintsik munanqannö imatapis rurayänampaq. Ollquqa alleqmi musyanan familianta imanö diriginantapis. Manam lluta piñëpa mandakoqtsu kanan, sinöqa Jesus ruranqannömi kuyëpa familianta  diriginan (Efesios 5:23). Tsënöllam hina warmipis casakurir imata ruranantapis alleq musyanan. Tsëmi kënö tapukunan: “¿listoku këkä nunä mandamanqanta ruranäpaq?”, nishpa (Romanos 7:2). Soltera warmiqa, Jehová Diospa y Jesuspa mandädonchönam këkan (Gálatas 6:2). Y casakurnenqa manam ishkaqllapachönatsu, sinöqa kimaqpa mandädonchönam: nunampa mandädonchö. Hina yapëmi tapukunan: “¿Hutsasapa nunapa mandädonchö këta puëdeshaqtsuraq, y yanapashaqtsuraq?” nishpa. Tsënö mana sujetakïta munarqa manam casakunampaq listoraqtsu këkan.

¹⁷ Hinamampis casakoqqa majan munanqantam ruranan, tsëqa manam kikimpa munëninnönatsu kanqa (leyi Filipenses 2:4). Apóstol Pablum kënö qellqarqan: “Imano carpis ollqucuna, imanollam cuerpiquicunata cuyayanqui tsenollam warmiquicunatapis cuyayänequi. Jina qamqunapis warmicuna qowequicunata respetacuyë”. Rikanqantsiknöpis apóstol Pabluqa musyarqanmi ollqupaqqa respetashqa kë alläpa alli kanqanta, y warmipaqna kuyashqa kë (Efesios 5:21-33).

18. ¿Imanirtaq alläpa preciso novio këkar peqankunata alleq tsaräyänan?

¹⁸ Tsëmi novio kayanqan witsëqa, manam kushishqa kakuyänanllapaqtsu, sinöqa alleqmi reqinakuyänan, tsënöpam musyayanqa casakuyänanta o mana casakuyänantapis. Hinamampis, novio kayanqan witsëqa alleqmi peqanta tsaränan. ¿Imanir? Tsë witsëchöqa masmi kuyanakïta munayanqa, y peqankunata mana alleq tsararnenqa mana allimanmi ishkiriyanman. Pero rasumpa kuyanakur, y Jehová Diosta kuyarqa, tsë peligrokunapitam cuidakuyanqa (1 Tesalonicenses 4:6). Tsëmi novio këta qallarqa, peqankunata alleq tsaräyänan, tsë rurëqa alläpa allim casakuyänan o mana casakuyänan kaptimpis.

19, 20. Willakaramï, ¿imataq niyan casado kawakïpita wakin nunakuna y cristiänokuna?

¹⁹ Casado kawëninkuna mana ushakänampaqqa ishkanmi shonqunkunapita patsë munayänan tsënö kanampaq. Wakinqa, televisionchö, librokunachö, rikäyanqannölla y leiyanqannölla casakï kanqantam pensayan. Pero rasumpëpaqa manam tsënötsu, sinöqa Teyta Dios kamanqannömi casakïqa qallananlla y manam ushanantsu (Génesis 2:24). Tsënö kaptimpis kanan tiempo nunakunaqa manam tsënötsu rikäyan casado kawakïta. Wakin markakunachöqa casädokuna kushishqam kawakuyan alli kayanqanyaqlla, pero ima cäsopis kaptenqa rasllam rakikäriyan.

²⁰ Tsënömi, wakin casädokunaqa majayoq këtaqa huk tiempollapaq rikäyan. Tsëmi kushishqa casakuriyan munanqä höram rakikärishaq nishpa. Pero yarpänantsikmi casado kawakïta Biblia piltashqa waskatawan igualatsenqanta. Awmi waskakunaqa más sinchi kanyanqampitam reqishqa kayan. Barcokunachö puritsiyanqan waskaman yarpärishun, mëtsika fuerte vientokuna këkaptimpis manam rachintsu, ni shiwtakantsu. Tsënöllam casado kawakïpis: Teyta Diosqa patsätserqan imëyaqpis tsarakunampaqmi. Tsëmi Jesus nerqan: “Dios juntashqantaqa mana pipis raquinmantsu” nishpa (Mateo 19:6). Noqantsikqa tsëtam wiyakushwan. Tsënö rurashqaqa manam alläpa hipakïkuna kanqatsu casado kawakïchö.

21. ¿Imatataq yachakuyanman casädokuna y pï ruranqantataq qatiyanman?

²¹ Casakïqa atska kushikïtam apamunman. Tsëpaqqa shumaqmi rikashwan majantsikpa alli rurëninta o alli maja këta munar sinchikonqanta, y manam rikashwantsu mana alli rurëninta y hutsasapa kënintaqa. Tsëqa,  ¿hutsasapa kanqanta pasëpatsuraq qonqëkushwan? Manam. Jehoväpis musyanmi hutsasapa kanqantsikta, pero tsënö kaptimpis munantsik alli rurënintsikta rikänantam. Tsëmi salmista nenqannö noqantsikpis nintsik: “Hutsa rurëninkunallata rikaptikeqa, oh Jah, oh Jehová, ¿piraq hutsannaq kanman?” (Salmo 130:3). Tsëmi casädokunaqa yachayanman ankupäkoq o llakipäkoq këta y hutsankunatapis perdonanakïta (leyi Colosenses 3:13).

22, 23. ¿Abrahanwan Sara rurayanqan imatataq yachatsin casädokunata?

 ²² Watakuna pasanqanmannömi casädokunaqa más kuyanakuyanqa. Yarpärishun Abrahanman y Säraman, edäna këkarpis ishkanmi yanapanakur imëkatapis rurayarqan. Säraqa 60 watayoqnönam karqan, manachi fäciltsu karqan Ur nishqan markanta y imëka kaponqankunatapis haqirïkur, carpapita rurashqa wayikunachö tärëqa. Pero tsëtaqa rurarqan qowanta cäsokurnin y respetarninmi, qowan ima nenqantapis yanaparqanmi tsënöpam llapan rurayanqan alli yarqorqan. Awmi, ¡llapanchömi qowanta yanaparqan! Y manam wakinkuna rikäyänanllapaqtsu señorllä nishpa qayarqan, sinöqa shonqumpita patsëmi (Génesis 18:12; 1 Pedru 3:6). Llapan shonqunwanmi respetarqan qowanta.

²³ Tsënö kaptimpis manam llapanchötsu acuerdo kayarqan. Abrahán “mana munanqantam” huk kuti Sara nerqan. Tsënö kaptimpis Jehoväta wiyakurninmi humilde këninwan, rurarqan warmin nenqanta, y tsëqa llapan kastampaqmi alli karqan (Génesis 21:9-13). Kanan tiempo casädokunaqa pëkunapitam yachakuyanman, atska watana o tsëraq casakushqa karnimpis.

24. ¿Imanö casado kawakïtaq Jehová Diosta kushitsin, y imanir?

²⁴ Teyta Diospa markanchöqa atska waranqa casädokunam kayan, tsëchömi rikantsik ollqu respetashqa kanqanta, warmi kuyashqa kanqanta y Jehoväpa munëninta puntaman churayanqanta. Awmi, casado kawakïchöqa kushikïta tarishwanmi. Rikanqantsiknöpis tsënö kushishqa kawakunampaqqa alleqmi majan akranan, listonam këkänan familianta manteninampaq y sinchikunmanmi alli y kushishqa kawakuyänampaq. Tsënö rurarnenqa manam Jehová Diosllatatsu kushitsiyanqa, sinöqa kuyakïninchömi imëyaqpis kawayanqa.