BABILONIAPITA tsë karu Jerusalenyaqqa ëwëkuyänaq atska waranqa nunakunash. Pero manash ni imapis kantsu Jerusalenman chäriyaptenqa. Y manash tsëchöqa ni pï tärantsu. Tsëshi yapëraq llapantapis rurayänan kanaq israelïtakunaqa.

Huk altartash puntallata rurariyänaq. Tsëqa Jehová Diospaq qarë animalninkuna sacrificäyänanshi. Tsë killakunanöllanash templota rurar israelïtakuna qallakïkuyan. Pero mantsakätsitash tïrayan tsë waknin markakunachö chikeqninkuna manana templota rurayänampaq. Tsënash tsë templota rurar haqiriyänampaq, Persia markapa mushoq reynin huk ley qellqaratsinanta lograriyänaq chikeqninkuna.

Babiloniapita israelïtakuna kutiyämonqampitaqa 17 watanash pasarishqa. Tsënash, tsë templota yapë rurar qallëkuyänampaq Teyta Dios kachanaq Ageo y Zacarías shutiyoq profëtankunata. Diostash wiyakuyan y pëpa yanapëninmanshi nunakunapis markäkuyan. Tsëshi, manam rurayankitsu nishpa huk ley niptimpis, pëkunaqa yapë rurar qallëkuyänaq.

Tsënash, Tatenai shutiyoq persiapita huk oficial shamïkur, ‘¿kë templota rurayänëkipaqqa pitaq niyäshorqonki?,’ nishpa tapukunaq. Tsëshi, ‘Jerusalenta ëwar Jehová Diosnikikunapa templonta rurayë niyämarqa Ciro shutiyoq reymi Babiloniachö këkäyaptï,’ nishpash niyan israelïtakuna.

Tsënash, ‘¿rasumpëpaku wanukushqa rey Ciro tsënö nerqan?,’ nishpa cartakurinaq Babiloniaman tsë Tatenai nuna. Y tsëllanash Persia markapa mushoq reynin cartakaramunaq. ‘Awmi, Diosninkunapa templon rurakuyänanta ama michäyëtsu, tsëpa rantinqa yanapëkuyë,’ nishpash mandëkänaq tsë chaskenqan cartachö. Tsënöpash chusku watachö ushariyänaq tsë templota y alläpash kushïkuyänaq israelïtakuna.

Atska watanash pasarinaq tsëpitaqa. Tsë templota rurar ushayanqampitaqa 48 watanönash. Alläpa waktsash Jerusalenchö täraq nunakunaqa kayan y manash shumaqnötsu rikakuyan ni Teyta Diospa templon ni tsë markapis. Tsënash Teyta Diospa templon altsëpaq kanqanta musyarinaq Babiloniachö täraq huk Esdras shutiyoq israelita. Tsëpenqa, ¿imataraq rurarqan musyankiku?

Persiapa reynin Artajerjes rikaqshi ëwanaq Esdras, y tsë alli reyqa atskatash qarënin qoykunaq Jerusalenta apanampaq. Tsënash Babiloniachö täraq israelïtakuna yanapayänampaq Esdras mañakunaq, y ‘ëwayäshaqmi,’ niyänaq 6.000 nunakunanöshi. Örotapis, qellëtapis, imëka väleqtapis apëkuyänaq atskatash.

Y ëwayänan nänichö alläpa mana alli nunakuna kayaptinshi, alläpa yarparëkunaq Esdras. Wanïkatsir llapan oro y qellë apayanqantapis apakuyanmanshi tsë nunakunaqa. Tsëshi dibüjochö rikanqëkinö, Esdrasqa nunakunata ëllïkatsir Jerusalenman yamë chäyänampaq mañakurinaq Jehoväman.

Tsënöshi Jerusalenman alli chäriyänaq chusku killa ëwayanqanchö, allish Jehová pushëkushqa kanaq. ¿Manaku pëman markäkoqkunataqa Jehová yanapanqanta këchöqa yachakuntsik?