PUWAQ watayoqllaraq këkarshi, Israelchö ishkë surchö kastakunapa reynin tikrarinaq Josías. Huk rey kanampaqqa alläpa pishillaraqshi. Tsëshi tsë nacionta gobernanampaq yanapayänaq mayor yachaq nunakuna.

Qanchis watana gobernëkarnash Jehoväta ashir qallëkunaq Josías. David, Jehosafat y Ezequías reykunanöshi llapantapis ruranaq. Wambrallaraq këkarshi mana mantsakushpa allikunata rurëkunaq.

Alläpa unëshi casi llapannö alläpa mana alli kayashqa israelïtakuna. Adorayänaq mana alli dioskunatash. Santokunamanshi qonqurikuyänaq. Tsënash, tsë markapita llapan mana alli rurëkunata Josías nunankunawan ushakätsir limpu qallëkunaq. Alläpa sasash kë llapan rurëqa, atska mana alli dioskuna adoraq nunakuna kayaptin. Këchö Josías nunankunawan santokuna pakikaqta rikëkanqëkinö.

Tsëpitanash Jehoväpa templonta altsayänampaq kimaq nunakunata mandanaq Josías. Y kë llapan rurayanqanta pagayänampaqshi llapan nunakunapita qellëta ëlluratsir qonaq. Tsë templochö uryayanqanyaqshi sumo sacerdote Hilquías tarïkunaq unë Moiseswan Jehová qellqatsenqan oqrakashqa alläpa importante ley librota.

Y Josïasman tsë librota aparayäpuptinshi leiyäpunampaq ninaq. Wiyarirnash, Jehoväpa leyninta nunakuna mana wiyakïkäyanqanta käyirinaq Josías. Tsënash alläpa llakirnin ratashnintapis rachirinaq këchö rikëkanqëkinö. ‘Noqantsikwanqa Jehová alläpa piñashqam këkan, kë librochö leyninkunata mana papänintsikkuna wiyakuyashqanrëkur,’ nishpash nin.

Ima Jehová rurayänantapis musyayänampaqshi sacerdote Hilquïasta Josías kachakunaq. Tsënash, profetiza Hulda nishqan kaqta ëwanaq Hilquïasqa tapukoq. Tsënash: ‘Uli mana alli dioskunata adorayashqa kayaptin y llapan patsa mana allikunawan huntashqa kanqanrëkurmi llapan Jerusalén castigashqa kanqa. Pero qam allita rurashqa kaptikim, wanushqëkichöraq kanqa kë castïgoqa,’ nishpash Hulda Josïasta willatsinaq Jehová nenqannö.