Siria nacionpita soldädukunam juk israelïta warmi wamrata familiampita rakir apakuyarqan, tsënöpam soldädukunata mandaq Naamanpa warmimpa sirweqnin tikrarqan. Naamanpa wayichö santukunata adorayaptin, y familiampita karuchö këkarpis, tsë wamraqa Jehovätam adoraq.

Naamanqa lepra qeshyawan karmi alläpa sufreq. Tsëmi tsë wamraqa yanapëta munar Naamanpa warminta kënö nirqan: “Juk nunam qowëkita o nunëkita yanapëta puëdin. Pëqa Jehoväpa willakoqninmi, Israelchömi täran y Eliseum jutin. Pëmi qowëkita alliyätsita puëdin”.

Tsënam tsë warmiqa qowan Naamanta willarqan. Naamanqa lepra qeshyampita alliyëtam munarqan, tsëmi Eliseuta asheq Israel nacionpa ëwarqan. Y carguyoq nunatanö shumaq chaskinampaq kaqtam Naamanqa pensarqan. Peru Eliseuqa manam kikintsu yarqurqan, sinöqa juk sirweqninllatam mandarqan kënö ninampaq: “Jordan mayuman  ëwëkur siëti kuti yakuman yëkuy, tsëmi alliyanki”.

Tsënö ninqanta mana gustarmi Naamanqa kënö nirqan: “Noqaqa pensarqä yarqaramur Jehovä Diosninman mañakur makintapis leprä janampa pasatsir alliyätsimänampaq kaqtam. Manam pensarqätsu ‘Israelchö mayuman ëwë’ nimänampaq kaqtaqa. Siriachöqa mas alli mayukunam kan. ¿Manatsuraq tsëkunaman mandëkamanman?”. Tsënö nirmi Naamanqa Eliseupa wayimpita cölerashqa yarqurqan.

Sirweqninkunam Naamanta yanapayarqan alliraq pensarinampaq. Kënömi niyarqan: “¿Manatsuraq alliyänëkirëkurqa imëkatapis rurëkunkiman? Tsë nuna mandashunqëkiqa fäcil-llam, nishunqëkita rurëkuy”. Tsënam Naamanqa pëkunata cäsur Jordan mayuman ëwarnin siëti kuti bañakurqan. Y siëti kaq kutichömi sänuna yarqaramurqan. Y alläpa kushishqam Eliseuta agradecikoq kutirqan. Y kënömi nirqan: “Kananqa musyänam rasumpa kaq Diosqa Jehovä kanqanta”. Y sänunam wayinta kutikurqan. Naamanta sänutana rikärirqa, ¿imanöraq sientikurqan tsë israelïta wamra?