Israelïtakunaqa Jehoväta dejarirmi mana väleq santukunata yapë adorar qallëkuyarqan, peru tsë santukunaqa manam ammonïta nunakunapita salvarqantsu. Tsë nunakunaqa mëtsika watakunapam israelïtakunata sufritsiyarqan, tsëmi Jehoväta kënö rogakuyarqan: “Dios Yaya, contrëkim jutsallakuyarqö. Chikiyämaqnïkunapita salvëkalläyämë”. Nïkurmi llapan santunkunata ushakätsiyarqan y Jehoväta yapë adorayarqan. Tsëmi Jehoväqa alläpa sufriyanqanta rikar llakiparqan.

Israelïtakunaqa Ammonïta nunakunawan guërrata rurayänampaq y dirigeqninkuna kanampaqmi pelyëta alli yachaq Jeftëta akrayarqan. Jeftëqa Jehovätam kënö nirqan: “Ammonïta nunakunata vencinäpaq yanapamaptikiqa, kutimuptï chaskimänampaq wayïpita  puntata yarqamoq kaqmi, qampaq kanqa”. Jehoväqa Jeftë mañakunqanta wiyarmi guërrachö venciyänampaq yanaparqan.

Wayinman Jeftë kutikaptinnam, warmi wamranqa panderëtanta tocar y tushur chaskeq yarqurqan, pëqa jukllëlla warmi wamranmi karqan. Tsëta rikärirmi Jeftëqa Jehoväta äninqanta yarpärirqan, tsëmi kënö nirqan: “¡Ay wamrallä! Shonqümi alläpa llakikun, qamta karuman mandanaqpaqmi parlarqö. Jehovä Diostam änirqö y tsë änikunqätam cumplinä”. Tsënam wamranqa kënö nirqan: “Papä, Jehovä Diosta änishqa karqa, tsë änikunqëkinömi noqawan ruranëki. Këllata rogakurishqëki, ishkë killapa amïgäkunawan jirkakunata ëwar, imëpis mana casakunäpaq kaqta waqaramushaq”. Jeftëpa warmi wamranqa llapan kawëninchömi mana dejëpa Jehoväta sirwirqan, y amïgankunaqa wata watam pëta watukaq Silö markaman ëwayaq.