Sinaï jirkachömi Moisesta Jehovä nirqan juk carpa wayita rurayänampaq. Tsë carpa wayiqa Diosta israelïtakuna adorayänampaqmi karqan y tsëtaqa mëpa ëwarpis aparkurmi ëwakuyaq.

Jehoväqa kënömi nirqan: “Israelïtakunata mandë ima qarëllatapis noqapaq apayämunampaq”. Tsënam israelïtakunaqa öruta, plätata, cobrita, alläpa shumaq rumikunata y aläjakunata apayarqan. Y apayarqanmi millwapita granäti hïluta, puka hïluta, lïnupita rurashqa alli kaq hïlutapis. Pëkunaqa manam michatsu kayarqan imëkatam apayarqan, tsëmi Moisesqa “amana carpa wayipaq mas qarëkunata apayämuynatsu” nirqan.

Imëka rurëta yachaq ollqukuna y warmikunam carpa wayita rurar yanapakuyarqan. Jehovämi yanaparqan trabäjunkuna alli yarqunampaq, tsëmi putskar, awar y bordar yanapakuyarqan. Wakinnam örupita imëkata rurar, shumaq rumikunapita adornukunata rurar y qeruta llaqllar yanapakuyarqan.

Jehovä munanqantanömi tsë carpa wayitaqa rurayarqan. Tsëchö ishkë cuartukuna kanampaqmi chowpinman juk shumaq cortïnata churayarqan. Juk cuartutam Sagrädu Sitiu nir reqiyaq, y juknintanam Alläpa Sagrädu sitiu niyaq. Tsë alläpa Sagrädu niyanqan cuartuchömi acacia qerupita y örupita rurashqa Sagrädu Cäja karqan. Y Santu Sitiu niyanqanchönam, örupita rurashqa candelabru, juk mësa y inciensu rupatsiyänan altar karqan. Patiuchönam, cobripita rurashqa jatun lavatoriu, y jatun altar karqan. Israelïtakunaqa Sagrädu Cäjata rikarmi, Dioswan acuerduta rurayanqanta yarpäyaq. ¿Musyankiku tsë acuerdu ima  kanqanta? Tsëqa Diosta cäsukuyänampaq änikuyanqanmi karqan.

Jehoväqa Aarontawan tsurinkunatam sacerdöti kayänampaq akrarqan. Pëkunaqa tsë carpa wayita cuidar y Jehoväpaq qarëkunata rupatsirmi trabajayaq. Y Alläpa Sagrädu sitiumanqa Aaronllam yëkuyta puëdeq, y watachö juk kutillam yëkoq. Tsëmanqa yëkoq kikimpa jutsampita, familiampa jutsampita y israelïtakunapa jutsankunapita Jehoväpaq qarëta rupatsinampaqmi.

Israelïtakuna Egiptupita ëwakuyanqampita juk wata pasanqanchömi tsë carpa wayita rurar ushayarqan, y tsëpitaqa tsëchönam Jehoväta adorayaq.

Tsë höram pukutë urämurnin carpa wayita tsaparkurqan, y Teyta Jehoväpa poderninmi carpa wayiman juntarirqan. Y tsënömi kushishqa këkanqanta rikätsikurqan. Tsë pukutë carpa wayi jananchö pärariptinqa tsë sitiullachömi israelïtakuna quedakuyaq. Peru pukutë shäririptinqa musyayaqnam yarquyänampaq kaqta. Y tsë carpa wayita paskarirmi aparkur pukutëpa qepanta ëwakuyaq.