Israelïtakunaqa Sinaï jirkapita yarqurirmi Paran niyanqan tsunyaq sitiupa pasayarqan, y Cades niyanqan sitiumanmi chäyarqan. Tsëchömi Moisesta Jehovä kënö nirqan: “Israelïtakunata äninqä Canaanchö markakunata rikapakoq ëwayänampaqmi 12 ollqukunata mandanëki. Tsëpaqmi kastankunachö dirigeq ollqukunata cada kastapita akranëki”. Tsënam Moisesqa 12 nunakunata akrarir kënö nirqan: “Canaan markaman ëwayë y rikapakayämuy tsë sitiukuna murunapaq alli o mana alli kanqanta, nunakuna kallpasapa o kallpannaq kayanqanta, y markakuna murallashqa o mana murallashqa kanqanta”. Tsënam tsë 12 rikapakoqkunaqa tsë sitiuman ëwayarqan, y tsë ëwaqkunachömi Josuëwan Calebpis kayarqan.

Tsë rikapakoqkunaqa 40 junaqtam kutiyarqan. Hïguskunata, granadïllakunata y üvaskunatam chätsiyarqan, y kënömi niyarqan: “Canaan markaqa alli sitium, peru tsëchö nunakunaqa kallpasapam kayan, y markankunapis jatusaq y alli murallashqam kayan”. Peru Calebqa kënömi nirqan: “¡Vencita puëdishunmi ¡Aku ëwashun!”. ¿Imanirtan Calebqa tsënö nirqan? Josuëwan Calebqa Jehovämanmi llapan shonqunkunawan confiakuyarqan. Peru wakin kaq rikapakoqkunaqa kënömi niyarqan: “Ama ëwashuntsu, pëkunaqa noqantsikpitapis mas kallpasapam kayan y puntankunachöqa chukllushnöllam kantsik”.

Tsëmi israelïtakunaqa ëwëta munayarqantsu, y quejakurmi kënö ninakuyarqan: “Egiptuman kutikunapaq juk pushamaqnintsikta akrashun. ¿Imaqtaq Canaan markaman ëwashun? Tsëchöqa wanutsimäshunmi”. Peru Josuëwan  Calebqa kënömi niyarqan: “Ama Jehoväpa contran churakäyëtsu ni tsë markakunachö nunakunata mantsayëtsu, Jehovämi yanapamäshun”. Peru israelïtakunaqa manam cäsuyarqantsu, tsëpa rantiqa wanuratsitam munayarqan.

Tsënam Jehoväqa Moisesta kënö nirqan: “¿Imëyaqraq israelïta mayikikuna respetayämanqatsu? Mëtsika milagrukunata rikëkarpis, pëkunaqa manam noqaman confiakuyantsu. Tsëmi wanuyänampaq 40 wata kë tsunyaq sitiuchö llapankunata dejarishaq. Y israelïtakunata äninqä sitiumanqa wamrankuna, Josuë y Calebllam chäyanqa”.