Jesus ciëluta kutikunqampita chunka junaqllatam qateqninkunaqa santu espïrituta chaskiyarqan. Tsëqa pasakurqan 33 wata Pentecostes fiestachömi. Tsë junaqqa më tsëpita nunakunam tsë fiestata celebrar Jerusalenchö këkäyarqan. Jesuspa qateqninkunaqa cientu veintinömi llapankuna juntu juk wayïpa altusninchö këkäyarqan. Tsënam illaqpita shukukuy vientunöraq ciëlupita bunrurümur tëkäyanqan wayi junta wiyakarqan. Y qallunö ninakuna yurirmi wakpa këpa rakikar cada ünupa jananman churakarqan. Llapankunam santu espïrituta chaskiyarqan, y tukuyläya idiömata parlarmi qallëkuyarqan.

Jerusalenman juk nacionkunapita ëwaq nunakunaqa, tsë büllata wiyarirmi ima pasakunqanta rikaq tsë wayiman ëwayarqan. Y Jesuspa qateqninkuna tukuyläya idiömakunachö parlayaptinmi espantakuyarqan. Tsëmi kënö niyarqan: “Kë llapan parlëkaq nunakunaqa, Galilëapita nunakunam kayan, ¿aw? Tsëqa, ¿imanöpatan wiyëkantsik cada ünu parlanqantsik idiömachö parlayanqanta?”.

Pëdruqa apostolkunawan sharkurmi fuertipa kënö nirqan: “Qamkunam qeruman warkutsir Jesusta wanutsiyarqëki, peru Jehoväqa kawaritsimushqam. Kananqa ciëluchö Diospa derëcha kaq lädunchönam këkan.  Tsëmi änikunqan santu espïrituta Teytapita chaskishqa kar, kë rikëkäyanqëkita y wiyëkäyanqëkita mandamushqa”.

Tsëta wiyëkurnam shonqunkunachö alläpa llakikur Pëdrutawan wakin apostolkunata, kënö nir tapuyarqan: “¿Imatataq rurayäshaq?”. Tsënam Pëdruqa pëkunata kënö nirqan: “Arrepentikuyë, y jutsëkikunapita perdonashqa kayänëkipaq, cada ünu Jesucristupa jutinchö bautizakuyë, tsëqa Teyta Dios qarakunqan santu espïritutam chaskiyanki”. Y tsë junaqqa 3.000 nunakunam bautizakuyarqan. Tsë junaqpitam Jesusman creikoqkuna Jerusalenchö mëtsikaq tikrayarqan. Apostolkunaqa santu espïritu yanapaptinmi atska congregacionkunata patsätsiyarqan. Tsënömi Jesus mandakunqankunata llapan creikoqkunata yachatsiyarqan.