Jesuswan apostolninkunaqa, Cedron Urampa pasarirmi Olïvus jirkachö këkaq Getsemanï huertaman chäriyarqan. Pullan paqasnam karqan, y jatun killam karqan. Tsënam Jesusqa kënö nirqan: “Teyta Diosman mañakoq ëwanqäyaq, këchö quedakuyë. Y mana punukarlla këkäyë”. Tsënö nirirmi mas washaman ëwëkur, alläpa llakikurnin qonqurikuykur Jehoväman kënö mañakurqan: “Qampa munëniki rurakätsun”. Tsënam Jehoväqa juk angelta mandarqan Jesusta yanapanampaq. Tsëpitanam Jesusqa kima apostolninkuna këkäyanqanman kutirqan, y punuykaqtam tarirqan. Tsëmi kënö nirqan: “¡Riyakuyë! Manam punuyanëki höratsu. Rikäyë chikimaqnïkunaman entregayämänan höram chäramushqa”.

Tsë höram Jüdasqa Jesus kaqman chärirqan, y pëwan ëwaqkunaqa espädankunawan y garrutinkunawanmi chäyarqan. Jüdasqa Jesuswan y wakin apostolkunawan, tsë huertaman atska kuti ëwashqa karmi tsëchö këkäyanqanta musyarqan. Y soldädukunatam nishqa karqan Jesus pï kanqanta musyatsinampaq. Tsëmi Jesusman witïkur, “¡Maestru! nir mutsëkurqan”. Tsënam Jesusqa, “Jüdas, ¿mutsarku Nunapa Tsurinta traicionanki?” nirqan.

Jesusqa ichik mas puntaman witïkurmi pëkunata, “¿pitataq ashiyanki?” nir tapurqan. Tsënam “Nazaretpita Jesustam” niyarqan. Y pëqa “noqam kä” nirqanmi. Tsënam llapankuna qepaman kutir patsaman ishkiriyarqan. Jesusqa yapëmi “¿pitataq ashikäyanki?” nir tapurqan. Tsënam pëkunaqa, yapë kënö niyarqan: “Nazaretpita Jesustam ashikäyä”. Jesusnam kënö nirqan: “Nirqönam noqa kanqäta. Noqata ashimarqa kë nunakuna ëwakuyänanta dejëkuyë”.

Tsënam Simon Pëdruqa espädanta sutaramur, mandakoq sacerdötipa sirweqnin Malcupa derëcha kaq rinrinta roqurapurqan. Peru Jesusqa herïdanta yatëkurmi sänaratsirqan. Y Pëdrutam kënö nirqan: “Espädëkita sitiunman kutitsi. Espädawan pelyaptikiqa, espädawanmi  wanutsiyäshunki”. Tsënam soldädukunaqa Jesusta tsaririr makimpita pankayarqan, y apostolninkunaqa qeshpirmi ëwakuyarqan. Tsëpitanam tsë nunakunaqa sacerdöti Anasman Jesusta apayarqan. Anasnam tapupärirnin mandakoq kaq sacerdöti Caifasman mandarqan. ¿Y imatataq apostolkunaqa rurayarqan?