Tiempu pasariptinqa Belsasarnam Babiloniata gobernarqan, y juk kutim nunankunapaq fiestata ruratsirqan. Tsë nacionchö yanapaqnin autoridäkunatam invitarqan, y llapan invitädunkunaqa milmi kayarqan. Nabucodonosor Jerusalen templupita apanqan örupita y pläta metalpita rurashqa cöpakunata apapuyänampaqmi sirweqninkunata mandarqan. Y tsë cöpakunawan upyarmi santunkunata alabar kayarqan. Peru illaqpitam juk maki yurirkur palaciu perqachö qellqar qallëkurqan.

Belsasarqa alläpam mantsakarqan, tsëmi brüjukunata qayëkatsir kënö nirqan: “Kë perqachö qellqarëkaqta leyimoq kaqtam, Babiloniachö mandakoq kanampaq churashaq, pëpitaqa ishkaqllam mas respetashqa kayanqa”. Peru manam ni mëqampis leyita ni imapaq kanqanta willëta puëdiyarqantsu. Tsënam gobernaqpa maman chärir kënö nirqan: “Daniel jutiyoq nunam Nabucodonosorta willaq suëñunqankuna imapaq kanqanta. Pëmi willashuynikita puëdin tsë palabrakuna ima ninan kanqanta”.

Daniel chäriptinmi Belsasar kënö nirqan: “Perqachö qellqarëkaqta leyir ima ninan kanqanta willamaptikiqa, örupita wallqatam wallqatsishqëki y mandakoq kanëkipaqmi churashqëki, qampa puntëkiman mas respetashqaqa ishkaqllam kayanqa”. Tsëmi Danielqa kënö nirqan: “Perqachö qellqarëkaqtaqa leyimushaqmi y ima ninan kanqantapis willashqëkim. Peru qaramänëkipaq kaqqa qampaq kakutsun o pitapis qarëkuy. Teytëki Nabucodonosorqa alläpa orgullösum karqan, tsëmi humildi këta Jehovä yachatsirqan. Qamqa musyarqëkinam pëta ima pasanqanta, peru manam Jehoväta respetarqunkitsu. Templumpita apayämunqan cöpakunawanmi vïnuta upyarqunki. Tsëmi Diosqa MENË, MENË, TEQUEL y PARSIN neq palabrakunata qellqatsishqa. Tsëchöqa nin, Media y Persia nunakuna Babiloniata ushakätsiyänampaq kaqtam. Y gobiernuykim ushakanqa”.

Babiloniaqa jatusaq perqakunayoqmi karqan y jatun mayum yëkuyänanta permiteqtsu, tsëmi ushakätsiyänampaqqa fäciltsu karqan. Peru tsë paqasllam Media y Persia soldädukunaqa Babiloniaman yëkuyarqan.  Persiata gobernaq Cïruwan soldädunkunam tsimpayänampaq mayuta juk lädupa jitariyarqan. ¡Y Babiloniapa punkunkunaqa kichëllam këkarqan! Tsëmi yëkuykur llapankunata wanutsiyarqan, entëru markata kayayarqan y Babiloniata gobernaqtapis wanuratsiyarqanmi. Tsëpitaqa Cïrunam Babiloniata gobernarqan.

Gobernar qallanqan watam Cïruqa kënö nirqan: “Jehovämi nimashqa Jerusalenchö templuta ruranäpaq. Yanapakuyta munaq judïukuna Jerusalen markëkikunaman kutikuyë”. Tsëmi Jerusalenta ushakätsiyanqampita 70 wata pasanqanchö mëtsikaq judïukuna markankunaman kutikuyarqan, tsënömi Jehovä ninqan cumplikarqan. Gobernanti Cïruqa templupita Nabucodonosor apakunqan örupita y pläta metalpita väsukunata kutitsiyänampaqmi mandakurqan. ¿Cuentata qokurqunkiku Diosta sirweqkunata Cïru yanapanampaq Jehovä imanö permitinqanta?