Nabucodonosormi juk montita o qeruta suëñurqan, y rikanqäkunaqa mantsanëpaqmi karqan. Tsëmi entëru Babiloniachö yachaq nunakunata qayëkatsir tapurqan, suëñunqan imapaq kanqanta. Peru manam ni mëqampis ima nita puëdiyarqantsu, tsëmi Danielta qayatsirqan.

Danieltam kënö nirqan: “Cämächö punuykarmi suëñurqä patsa chowpinchö alläpa jatun monti o jatun qeru shëkaqta. Y puntampis ciëluyaqmi charqan. Shumaq raprakunayoq y atska frütayoqmi karqan. Tsëpa jawanchömi animalkuna llantukuyaq, y pishqukunam rämankunachö qeshunkuna rurayaq. Tsënam, Diospa juk willakoqnin ciëlupita shamur kënö nirqan: ‘¡Tsë montita o qeruta mutuskir rämankunata walluyë! Peru matsuyoqllaraq o watsiyoqllaraq këkaq troncuntaqa, qewakunawan juntu kanampaq fiërruwan y cobriwan alli watarkur dejëkuyë. Tsë montipa shonqunqa jukläyam tikranqa, chukaru animalpa shonqunnömi kanqa. Y qanchis tiempukunam tsënö kanqa. Tsënöpam nunakuna musyayanqa Llapanta Gobernaq Poderösu Dioslla Gobernanti kanqanta. Pëqa munanqan kaqtam pitapis gobernanampaq churan’”.

Jehovämi Danielta musyatsirqan tsë suëñu imapaq kanqanta, y Danielqa alläpam mantsakarqan. Tsëmi gobernaqta kënö nirqan: “Tsë suëñunqëki chikishoqnikikunata pasanan kaptinqa ima alliraq këkunman, peru qamtam pasashunki. Tsë mutuyanqan montiqa qammi kanki. Manam gobernantinatsu kanki y chukaru animalkunanömi qewata mikunki. Matsuyoqllaraq o watsiyoqllaraq këkaq troncunta dejayänampaq mandakushqa kayaptinmi, qampis gobernaq kutinki”.

Juk wata pasariptinmi Nabucodonosorqa Babiloniachö palaciumpa altunchö purikarqan, y entëru Babilonia markata rikärirmi kënö nirqan: “¡Imanö shumaq markatam ruratsirqö! ¡Noqanöqa manam pipis kantsu!”. Parlar manaraq ushaptinmi ciëlupita kënö parlapämoqta wiyarqan: “¡Nabucodonosor! Kanampitaqa mananam gobernantinatsu kanki”.

Tsë höram Nabucodonosorqa juiciunta oqrarirqan, y chukaru animalnömi tikrarirqan. Tsëmi gobernanan wayipita ëwakurqan, y chukaru animalkunawanmi juntu kawarqan. Aqtsampis pichakpa plümannö y shillumpis pishqupa shillunnömi jatunyarqan.

 Siëti wata pasariptinnam Nabucodonosorqa ciëluman rikëkur juiciunman kutirqan, y Jehovä permitiptinmi Babiloniapa gobernantin yapë karqan. Tsëmi kënö nirqan: “Kananqa ciëluchö këkaq Poderösu Jehovä Diostam alabä y respetä. Orgullösu kaqkunataqa pëqa sitiunmanmi churan. Kananqa allim musyä Jehovä Gobernaq kanqanta, y munanqan kaqta pitapis gobernanampaq churanqanta”.