ISRAELPA y Judäpa reyninkuna kanqan witsanmi atska profëtakuna kayarqan. Pëkunaqa mana mantsakoq y alli markäkïyoqmi kayänan karqan Dios ninqankunata willakuyänampaq. Pasanampaq kaqkunata willakuyanqanta rikärishun:

1. Jerusalén ushakänampaq. Diospa profëtankuna Isaïaswan Jeremïasnäqa, atska watakuna pishikaptinmi willakuyarqan Jerusalenta ushakätsiyänampaq y tsë markapita nunakunata apakuyänampaq kaqtapis. Jina tsë markawan Dios imanir piñakunqantapis willakuyarqanmi. Jehoväpa markantukurpis, juk dioskunata adorakur, tukï mana allikunata rurar y chikinakurmi kawakïkäyarqan (2 Reyes 21:10-15; Isaías 3:1-8, 16-26; Jeremías 2:1–3:13).

2. Rasun kaq adoración yapë patsakänampaq. Diospa markan Babiloniachö kanqampita 70 wata pasariptinmi, markankunata kutir Jerusalenpa templonta altsayänan y rasun kaq Diosta adorar qallayänan karqan (Jeremías 46:27; Amós 9:13-15). 200 watanö pishikaptinmi, profeta Isaïasqa willakurqan Ciro jutiyoq nuna Babiloniata ushakätsinampaq, y israelïtakuna markankunaman kutikuyänanta jaqirinampaq kaqta. Jina tsë markaman Ciro imanö yëkunampaq kaqtapis willakurqannam (Isaías 44:24–45:3).

3. Mesias shamunampaq y kawënimpaq. Mesïasqa Belen jutiyoq markachömi yurinan karqan (Miqueas 5:2). Alläpa humilde nuna karmi Jerusalenmampis juk ashnun montashqalla yëkunan karqan (Zacarías 9:9). Nunakunata shumaq y kuyëpa tratëkaptimpis, atskaqmi chikiyarqan (Isaías 42:1-3; 53:1, 3). Jina alläpa jiparmi o ñakarmi wanunan karqan. ¿Tsëllachöku Mesias ushakänan karqan? Manam, kawariramurmi wanïnimpa chaninta Jehoväpa nöpanman aparqan, tsënöpa llapan nunakuna jutsankunapita perdonashqa kayänampaq (Isaías 53:4, 5, 9-12).

4. Mesïaspa gobiernompaq. Jutsasapa nunakunaqa manam gobernëta yachayantsu, pero Mesïasmi sïqa yachan. Jinamampis, Yamë Kawakïta apamoq Príncipe niyänanmi karqan (Isaías 9:6, 7; Jeremías 10:23). Patsata gobernamuptinqa, jinantinchömi nunakunawan animalkunapis yamë kawakuyanqa (Isaías 11:3-7). Tukïläya qeshyakunam ushakärinqa (Isaías 33:24). Y mananam wanïpis kanqanatsu (Isaías 25:8). Awmi, atska wanushqa nunakunam kawariyämunqa (Daniel 12:13).

(Isaías, Jeremías, Daniel, Amós, Miqueas y Zacarías librokunapita jorqashqam.)