Pasayanqankunata cuentakuyanqan

¿Imanötan juk shipashqa wamra kanqampita sufrishqa karpis kananqa kushishqa kawakun? ¿Imanötan pelyallaman yarpaq y polïticaman mëtikoq nuna kananqa Diosta kushishqa sirwin? Cuentakuyanqanta leyirishun.

“Wamra karqa alläpa kuyayämänantam munarqä” (INNA LEZHNINA willakunqan)

1981 WATAM YURIRQAN

PËQA RUSIAPITAM

WAMRA KËKAR SUFRINQAN

UNË IMANÖ KANQÄ: Teytäkunaqa sordum kayarqan, y noqapis sordam yurirqä. 6 watayoq këkaptïmi papänïwan mamänï divorciakuriyarqan, manaraq divorciakuyaptinqa kushishqam kawakurqä. Wamrallaraq këkarpis imakuna pasakuykanqantaqa entiendirqämi, tsëmi alläpa llakikurqä. Papänï divorciakurirqa, mayor kaq turïwanmi Troick markachö quedakurqan, peru noqaqa mamänïwanmi Cheliabinsk markaman ëwakurqä. Y tiempuwanqa mamänïqa yapëmi casakurirqan. Mamänïpa qowanqa o runanqa alläpam upyaq y ishkätam seguïdu maqayämaq.

1993 watam kuyashqa mayor kaq turï mayuchö tullpukarnin wanurqan. Tsëmi llapäkunapis alläpa llakikuyarqä. Mamänïqa upyarmi qallëkurqan, y maqamaqmi. Tsëmi munarqä mas alli kawakuyta y masqa kuyayämänanta. Y mëtsika iglesiamanmi consolayämänanta munarnin ëwarqä, peru manam ni mëqampis yanapayämarqantsu.

¿IMANÖTAN BIBLIACHÖ YACHAKUNQÄ YANAPAMASHQA? Treci watayoq këkaptïmi, escuëlachö estudiaq mayïqa Jehoväpa testïgun karnin Biblia willakunqan nunakunapita cuentamaq. Noëpitawan Jobpita willamanqanmi masqa gustamaq, aja o sasa tiempupa pasëkarpis Diosllatam pëkunaqa sirwiyarqan. Ichik tiempullachömi Jehoväpa testïgunkunawan Bibliapita yachakurqä y reunionkunaman ëwar qallëkurqä.

Diospa Palabranchöqa imëkatam yachakurqä. Peru masqa kushikurqä Diospa jutin ima kanqanta musyarmi (Salmus 83:18). Bibliachö willakunqannölla, ’ushanan tiempuchö’ imakuna pasakunampaq kaqta musyëqa alläpa espantakuypaqmi karqan (2 Timoteu 3:1-5). Wanushqakuna kawariyämunampaq kaqta musyarpis alläpam kushikurqä, ¡turïqa kawarimunqam! (Juan 5:28, 29).

Tsënö kaptimpis, manam llapankunatsu decidinqäpita kushikuyarqan. Mamänïwan qowanqa o runanqa Jehoväpa testïgunkunawan estudiänätam michäyämaq y mana estudianäpaqmi kutin kutin niyämaq. Peru yachakuykanqäqa alläpam gustamaq, tsëmi mana dejanäpaq decidirqä.

Familiä michäkuyanqanta aguantëqa manam fäciltsu karqan. Llakikuypaqqa karqan, Testïgukunapa reunionninkunaman ëwayanqa menor kaq turïpis mayuchö tullpukarnin wanunqanmi. Peru Testïgukunaqa kuyayämarmi tsë mana allikunapa pasëkanqä höra yanapayämarqan. Imëpis tsënö kuyayämänantam munarqä. Tsëmi cuentata qokurirqa, rasumpa religion kayanqanta y 1966 watam Jehoväta sirwinäpaq bautizakurirqä.

¿IMAKUNACHÖTAN YANAPAMASHQA? Seis watanam alläpa kuyakoq Dmitry jutiyoq nunawan casädu këkä. Ishkäkunam San Petersburgo markachö këkaq Jehoväpa testïgunkunapa sucursalninchö yanapakuyä. Y tiempuwanqa mamänïwan qowanqa o runanqa manam michämashqanatsu.

¡Jehoväta reqinqätaqa alläpam agradecikü! Pëta sirwinqäpitaqa kushishqam kawakü.

“Imëkata musyëta munarmi yarpachakurqä” (RAUDEL RODRÍGUEZ RODRÍGUEZ willakunqan)

1959 WATAM YURIRQAN

PËQA CÜBAPITAM

POLÏTICUKUNAPA CONTRAN CHURAKAQ

UNË IMANÖ KANQÄ: Cüba nacionpa La Habäna markanchömi yurirqä y alläpa pobri markachömi winarqä. Tsëchöqa imë hörapis pelyarllam kayaq. Tsëmi pelyëta yachakuyta munarnin jövin kanqäpita yüdu niyanqan pelyata yachakurqä y juk pelyakunatapis.

Alli estudianti kaptïmi, teytäkunaqa universidäman ëwanäpaq niyämarqan. Tsëchömi cuentata qokurqä nacionnïchö leykuna cambianan precisanqanta, tsëmi autoridäkunapa contran churakarqä. Estudiaq mayïwanmi armanta suwayänäpaq juk policïata peqanchö o umanchö fuertipa maqayarqä. Tsërëkurmi carcelman apayämarqan y wanunäpaqmi condenayämarqan. ¡Mana creipaqmi karqan, 20 watayoqllaraq këkarmi wanunäna karqan!

Carcelchö këkarmi pensarqä, juk grüpu soldädukuna wanutsiyämaptin mana mantsapakunapaq. Tsënö kaptimpis, “¿imanirtan kë Patsachöqa imëka sufrimientu kan? ¿Kë kawëllatsuraq llapan?” nirmi pensarqä.

¿IMANÖTAN BIBLIACHÖ YACHAKUNQÄ YANAPAMASHQA? Tiempuwanqa manam wanutsiyämarqantsu, peru 30 watapa carcelaränäpaqmi condenayämarqan. Tsëchömi Jehoväpa testïgunkunata reqirqä, pëkunaqa creenciankunarëkurmi tsëchö carcelarëkäyarqan. Mana mantsakushpa y tranquïlu kayanqanmi mana creipaqqa karqan. Mana kaqpita condenashqa këkäyaptimpis, pëkunaqa manam cölerashqatsu ni llakishqatsu kayarqan.

Testïgukunaqa nunakunapaq Diosnintsik imakunata ruramunampaq kaqtam yachatsiyämarqan. Bibliachömi rikätsiyämarqan, kë Patsantsik alläpa Shumaq Patsaman tikrariptin imëka mana allikuna ushakärinampaq kaqta y alli nunakuna imëyaqpis kawakuyänampaq kaqta (Salmus 37:29).

Yachatsiyämanqanqa alläpam gustamaq, peru pëkunanö këqa manam fäciltsu karqan. Polïticaman mana mëtikunäpaq y qayapäyamaptin upällalla këta mana puëdinäpaq kaqmanmi pensar qallëkurqä. Tsëmi Bibliata japallä yachakunapaq churapakarqä. Y Jehoväpa testïgunkunalla punta cristiänukunanö portakuyanqantam cuentata qokurqä.

Bibliapita yachakunqämannömi cambiukunata ruranä karqan. Parlakurninqa imëpis llutam parlakoq kä, tsëmi cambianä karqan. Cigärru shoquytam dejanä karqan y polïticamanqa manam mëtikunänatsu karqan. Tsëkunata dejëqa manam fäciltsu karqan, peru Jehovä yanapamaptinmi ichikllapa ichikllapa cambiukunata rurar qallëkurqä.

Geniüta dominëqa manam fäciltsu karqan, tsëmi geniüta dominanäpaq Jehovä yanapëkamänampaq mañakü. Proverbius 16:32 textum alläpa yanapamashqa, tsëchöqa nin: “Alli puëdeq nunapitapis, pacienciayoq nunam mas alliqa, juk markata venceq nunapitapis geniunta tsarëta yachaq nunam mas alliqa”.

Carcelchö këkarmi, 1991 wata juk cilindru yakuchö Testïgu kanäpaq bautizakurqä. Qateqnin watanam wakin prësukunawan libri yarqurqä, peru Espäña nacionchö familiäkuna kaptinmi tsëman mandayämarqan. Y chärirqa reunionkunamanmi ëwar qallëkurqä, y wawqi panikunaqa mëtsika watapa reqiyämaqnömi alläpa kushishqa chaskiyämarqan. Pëkunam yanapayämarqan allina kawakunäpaq.

¿IMAKUNACHÖTAN YANAPAMASHQA? Kananqa warmïwan y warmi wamräkunawanmi Diosta kushishqa sirwï. Alläpam kushikü mëtsika nunakunata Bibliapita yachatsir. Höra höraqa yarpä, jövin këkaptï wanutsiyämänampaq condenayämanqanmanmi, peru tsëpita kananyaq imëkata yachakunqätaqa alläpam agradecikü. Manam kawëkällatsu, sinöqa shuyarëkä Shumaq Patsachö y mëtsëchöpis alli kawakuy kanampaq kaqta y nunakuna manana wanuyänampaq kaqtam (Apocalipsis 21:3, 4).

[Willakuy]

“Diospa jutin ima kanqanta musyarirqä alläpam kushikurqä”

[Fötu]

Sordukunata qowäwan o runäwan Bibliapita yachatsiqa alläpam gustayäman