Salmus 78:1-72
-
Teyta Dios yanapëkaptin israelïtakunaqa markäkuyantsu o yärakuyantsu
Maskil.* Asaf+ qellqanqan salmus.
78 Marka mayilläkuna, kananmi shumaq yachatsiyashqëki,parlanqäta cäsuyämë.
2 Kananqa noqam yachatsiyashqëki. Qamkunaqa manam musyayankitsu unë witsankuna pasanqanta.
Tsëkunatam kananqa shumaq entienditsiyashqëki.+
3 Papänïkuna willayämashqa kayaptinmi tsëkunata musyayä.+
4 Tsëkunatam tsurikikunata willayäshaq,qepa yureqkunatam musyatsiyäshaq.+
Teyta Jehovä imëka allikunata ruranqanta,+poderösu kanqanta y espantëpaq ruranqankunatam willayäshaq.+
5 Teyta Diosmi leykunata patsätsirqan Jacobpa y Israelpa kastankunapaq.
Unë kastantsikkunatam mandarqan tsëkunapita tsurinkunata yachatsiyänampaq.+
6 Tsëkunata yachatsiyaptinmi qepa yurikoq nunakuna,qepa yurikoq tsurinkuna musyayänan karqan.+
Y pëkunapis tsurinkunatam yachatsiyänan karqan.+
7 Tsënö yachatsiyaptinmi Teyta Diosman confiakuyänan karqan,Teyta Dios llapan ruranqankunatam yarpäyänan karqan.+
Y mandakunqankunatam cäsukuyänan karqan.+
8 Tsënö yachatsiyaptinmi unë kastankunanöqa kayanmantsu karqan.
Unë kastankunaqa mana cäsukoq y munëninkunallata rurakoqmi kayarqan.+
Janan shonqullam Teyta Diosta kuyayaq,+ tsëpitaqa qonqëkuyaqmi.
9 Efrainpa kastankunaqa flechanankunayoq këkarpis,guërra junaqqa qeshpirmi ëwakuyaq.
10 Teyta Dios ruranqan acuerdutaqa manam cumpliyarqantsu,+Leytapis manam cäsukuyarqantsu.+
11 Pëkunaqa, Teyta Dios imëka ruranqankunatam qonqëkuyarqan,+espantëpaq milagrukunata ruranqanta rikashqa këkarpis manam yarpäyarqantsu.+
12 Unë kastëkikunam rikäyarqanEgiptuchö këkaq Zoan markachö+ espantëpaqkunata Teyta Dios ruranqanta.+
13 Pasayänampaqmi lamar yakuta ishkëman rakirqan,yakuqa ishkan lädunkunachömi jatusaq perqakunanö tikrarqan.+
14 Junaqpam pukutëwan pusharqan,y paqaspanam ninawan aktsir pusharqan.+
15 Yakunäyaptinmi tsunyaq jirkachö qaqata pakirqan,tsëmi jatun qochapita yakuta upoqnö, yakunëninkunapis pasanqanyaq yakuta upuyarqan.+
16 Qaqapitam mëtsika yakuta yarqatsimurqan,tsëmi mëtsika mayunöraq* yakuqa ëwarqan.+
17 Tsënö yanapëkaptimpis pëkunaqa masran jutsata* rurayarqan,manam Llapanta Gobernaq Poderösu Diosta tsunyaq sitiuchö cäsuyarqantsu.+
18 Munayanqanllata mikuyta munarmi shonqunkunachöqa Teyta Diosta mana kaqpaq churayarqan.+
19 Teyta Diospa contran parlarmi kënö niyarqan:
“¿Imanöraq kë tsunyaq sitiuchöqa mikuyta qaramäshun?”.+
20 Tsëpitanam kënö niyarqan:
“Musyantsikmi mayutanöraq*+ qaqapita yakuta yarqatsimunqanta.
Peru ¿mëpitaraq mikuytaqa qaramäshun?
¿Mëpitaraq llapantsikpaqqa ëtsata apamunqa?”.+
21 Tsënö niyanqanta wiyarmi Teyta Jehoväqa cölerarqan.+
Jacobpa kastankunatam ninawan ushakätsirqan,+Israelpa kastankunatam castigarqan.+
22 Pëkunaqa manam Teyta Diosman markäkuyarqantsu o yärakuyarqantsu,+manam ichikllapis creiyarqantsu salvëta puëdinampaq kaqta.
23 Tsënö kayaptimpis, Teyta Diosqa pukutëtam mandarqan,y ciëlu punkutam kicharqan.
24 Mikuyänampaqmi ciëlupita mikuyta shikwatsimurqan,kutin kutinmi manä mikuyta shikwatsimurqan.+
25 Pacha junta mikuyänampaqmi+ ciëlupita mikuyta shikwatsimurqan.*+
26 Poderösu karmi inti o rupay yarqamunan lädupita y sur lädupita fuertipa vientutsimurqan.+
27 Ëtsatam mëtsikata shikwatsimurqan,lamar kuchunchö arënatanömi, codornizkunata mëtsikata shikwatsimurqan.
28 Campamentunkuna këkanqanmanmi shikwarqan,carpa* wayinkunapa entëru lädunmanmi shikwarqan.
29 Tsëmi pëkunaqa melanäyanqanyaq mikuyarqan,tsënömi Teyta Diosqa munayanqanta qararqan.+
30 Peru ëtsanëninkunapis manaraq pasaptinmi,ëtsankuna amukushqallaraq këkäyaptin Teyta Diosqa cölerarqan.
31 Tsënö cölerarmi+ Teyta Diosqa mas kallpayoq nunakunata wanutsirqan,+Israelchö jövin kaqkunatam ushakätsirqan.
32 Tsënö rurëkanqanta rikëkarpis pëkunaqa masran jutsata* rurayarqan.+
Imëkata rurëkanqanta rikëkarpis manam pëman markäkuyarqantsu o yärakuyarqantsu.+
33 Tsëmi pükëkoq cuenta llapankunata ushakätsirqan.+
Mana pensayanqan desgraciakunapa pasarmi ushakäyarqan.
34 Peru wakinkunata wanutsir qallëkuptinqa yapëmi ashiyaq,+arrepentikurmi Teyta Diosta yapë ashiyaq.
35 Qaqa cuenta+ kanqanta yarparkur y salvaqninkuna+ kanqanta yarparkurmi,Llapanta Gobernaq Poderösu Diostaqa ashiyaq.
36 Tsënö këkarpis pëkunaqa Teyta Diostam ulipäyarqan o llullapäyarqan,janan shonqullam imëkatapis niyaq.
37 Manam llapan shonqunkunawantsu Teyta Diosta sirwiyarqan,+y manam ruranqan acuerdutapis cumpliyarqantsu.+
38 Tsënö këkäyaptimpis Teyta Diosqa llakiparqanmi,*+jutsa* rurayanqankunata perdonarmi ushakätsirqantsu.+
Mëtsika kuti cölerashqa karpis,+manam castigarqantsu.
39 Tsënöqa ushakätsirqantsu nunalla kayanqanta yarparmi,+vientunö pasareqlla kayanqanta musyarmi.
40 Mëtsika kutim tsunyaq sitiukunachö Teyta Diosta cäsuyarqantsu,+mëtsika kutim tsunyaq sitiukunachö Teyta Diosta llakitsiyarqan.+
41 Manam Teyta Diosman ichikllapis confiakuyarqantsu,+tsënömi Israelpa Limpiu Diosninta llakitsiyarqan.
42 Poderösu kanqantam qonqëkuyarqan,y manam yarpäyarqantsu chikeqninkunapita salvanqan junaqta.+
43 Manam yarpäyarqantsu Egiptuchö señalkunata ruranqanta,+Zoan markachö milagrukunata ruranqanta,
44 ni yakuta upuyta mana puëdiyänampaq,Nïlu mayuta* yawarman tikratsinqantapis.+
45 Manam yarpäyarqantsu, egipciu nunakunata kaninampaq kanikoq jatusaq chuspikunata mandanqanta,+ni mëtsika rachakkunata* mandanqanta.+
46 Chakrachö mikuykunata ushanampaqmi mallaqashqa chukllushkunata* mandarqan,tsëkunam llapan murukuyanqanta ushayarqan.+
47 Üvasninkunatam runtu tamyawan ushakätsirqan,+sicömoru hïgusninkunatam ruminö runtuwan ushakätsirqan.
48 Cargakuyänan animalninkunatam runtuwan wanutsirqan,+y wakin animalninkunatapis räyuwanmi* ushakätsirqan.
49 Alläpa cölerarmi castigar sufritsirqan,mëtsika angelkunatam mandarqan castiganampaq.
50 Y cölerarmi castigarqan,y imëka qeshyawanmi sufritsirqan y wanutsirqan.
51 Tsëpitanam llapan mayor tsurinkunata Egiptuchö wanutsirqan,+Campa carpa* wayinkunachö punta yurikoqkunatam llapanta ushakätsirqan.
52 Tsëpitanam juk mitsikoq üshankunata pushamoqnö,+sirweqnin israelïtakunata Egiptupita yarqatsimurqany tsunyaq jirkapam pushamurqan.
53 Shumaq cuidarmi pushamurqan,tsëmi israelïtakunaqa ni imata mantsayarqantsu.+
Teyta Dios lamar yakuwan tsaparkuptinmi chikeqninkunaqa ushakäyarqan.+
54 Tsëpitanam pëkunapaq akranqan* markaman pusharqan.+
Tsë markakunata entreganampaqqa,kikinmi poderösu kar tsëchö nunakunata vencirqan.+
55 Israel kastakunapa puntampitam,tsë markakunachö täkoq* nunakunata qarqurqan.+
Tsëpitanam markankunata y chakrankunatapis medir medir herencian entregarqan,+y wayitapis entregarqanmi.+
56 Peru israelïtakunaqa, Llapanta Gobernaq Poderösu Diosta mana kaqpaq churarmi cäsuyarqantsu.+
Mandakunqankunatapis manam cumpliyarqantsu.+
57 Pëkunaqa Teyta Diostam dejariyarqan,y unë kastankunanömi contran churakäyarqan.+
Flechakuyänan makwa arcunömi confiakuypaqtsu kayarqan.+
58 Kutin kutinmi sagrädu altu sitiunkunachö santukunata adorar+y qerupita rurashqa santukunata adorar cöleratsiyarqan.+
59 Tsëkunata rurayanqanta rikarmi Teyta Diosqa alläpa cölerarqan.+
Tsëmi israelïtakunataqa dejarqan.
60 Tsëpitanam nunakunawan juntu+ kanqan Silö markachö carpa* wayintapis dejarqan,+
61 Sagrädu Cäjanta chikeqninkuna apakuyänantam permitirqan,poderösu kanqanta rikätsikoq cäjata apakuyänantam dejarqan.+
62 Sirweqninkuna* kayaptinmi cölerar,espädawan wanutsiyänampaq dejarirqan.+
63 Ollqu jövinkunatapis ninam usharqan.
Tsëmi casakuyanqankunachö cantayanqan cancionkunatapis, ollquwan manaraq kashqa* shipashkunapaq cantayarqannatsu.
64 Sacerdötikunatam espädawan wanutsiyarqan,+y warminkunaqa manam waqayarqantsu.+
65 Tsënam Teyta Jehoväqa, punukashqanö këkanqampita riyarkamurqan o rikcharkamurqan.+
Juk puëdeq nuna+ vïnuta upurir punukashqa këkanqampita riyarkamoqnömi rikcharkamurqan.
66 Chikeqninkunaqa mantsarmi qeshpir ëwakuyarqan,+pëkunataqa pasëpam* penqakatsirqan.
67 Josëpa kastankunataqa despreciarqanmi,Efrainpa kastankunatapis manam akrarqantsu.
68 Tsëpa rantinqa Judäpa kastankunatam akrarqan,+kuyanqan Sion jirkatam akrarqan.+
69 Tsëchömi ciëlutanö mana ushakaqta,+y patsatanö mana ushakaqta sagrädu sitiun ruratsirqan.+
70 Sirweqnin Davidtam akrarqan,+pëtaqa pushamurqan üshakunata mitsikuykaptinmi,+
71 wawayoq üshakunata cuidëkaptin.
Tsëpitam Jacobpa kastankunata, Israelpa kastankunata cuidanampaq churarqan.+
Tsë nunakunaqa Teyta Diospa herencianmi kayarqan.+
72 Davidqa llapan voluntäninwanmi pëkunata cuidarqan,+y imanö yanapëtapis allim yacharqan.+
Nötakuna
^ Tsë palabra ima ninan kanqanqa manam musyëllatsu. Rikäri “Bibliachö palabrakunata entiendinapaq” neqta.
^ Kënöpis niyanmi: riunöraq.
^ Kënöpis niyanmi: pecäduta.
^ Kënöpis niyanmi: riutanöraq.
^ O “angelkunapa mikunanta shikwatsimurqan”.
^ Kënöpis niyanmi: toldu.
^ Kënöpis niyanmi: pecäduta.
^ Kënöpis niyanmi: ankuparqanmi; kuyaparqanmi.
^ Kënöpis niyanmi: pecädu.
^ Kënöpis niyanmi: riuta.
^ Kënöpis niyanmi: lachakkunata; säpukunata.
^ Kënöpis niyanmi: churqapikunata.
^ Capazchi, “alläpa fuerti fiebriwan”.
^ Kënöpis niyanmi: toldu.
^ O “sagrädu”.
^ Kënöpis niyanmi: täraq; päraq.
^ Kënöpis niyanmi: toldu.
^ O “Herenciankuna”.
^ O “ollquwan manaraq oqllanakushqa”.
^ Kënöpis niyanmi: jankatmi.
