Salmus 128:1-6
Jerusalenman witsëkar cantayanqan.
128 Teyta Jehoväta respetaqkuna,*y pë munanqannö kawakoqkunaqa+ kushishqam kayan.+
2 Alli trabajarnin tarinqëkikunatam mikunki,kushishqam kawakunki y imëkayoqmi kanki.+
3 Wayikichö warmikiqa, alli wayoq üvasnömi atska wamrayoq kanqa,+y tsurikikunam entëru lädupa tseqllimushqa olïvusnö mësëkichö jamaräyämunqa.
4 Respetaq* nunataqa,tsënömi Teyta Jehovä bendicinqa.+
5 Teyta Jehovämi Sion jirkapita bendicishunki.
Kawëkarqa Jerusalen markatam imëkayoq kanqanta rikanki,+
6 y willkëkikunatapis rikankim.
Israelchö alli kawakuyë.
Nötakuna
^ Hebreu idiömachöqa “mantsaqkuna” ninmi. Rikäri “Bibliachö palabrakunata entiendinapaq” neqta.
^ Hebreu idiömachöqa “Mantsaq” ninmi. Rikäri “Bibliachö palabrakunata entiendinapaq” neqta.
