Mateu 9:1-38
9 Tsëpitanam Jesusqa barcuwan qochata tsimpar imëpis päranqan markanman yëkurqan.+
2 Tsëchömi kuyukuyta mana puëdeq nunata kirmawan pë kaqman apayämurqan. Tsë nunakuna markäkoq o yärakoq kayanqanta rikëkurnam, Jesusqa kuyukuyta mana puëdeq nunata kënö nirqan: “¡Ama yarpachakuytsu hïju! Jutsëkikunapita* perdonashqanam kanki”.+
3 Tsënam wakin Ley qellqaqkunaqa, “kë nunaqa Diostam ofendikan” ninakuyarqan.
4 Imata pensëkäyanqanta musyarmi Jesusqa kënö nirqan: “¿Imanirtan shonquykikunachö mana allikunata pensayanki?+
5 Mä niyämë, ¿imatan mas fäcil? ¿‘Jutsëkikunapita* perdonashqanam kanki’ niku, o, ‘sharkur puri’ niku?+
6 Tsënö kaptimpis, Nunapa Tsurinqa jutsayoqkunata* perdonanampaq carguta chaskinqanta musyayänëkipaqmi...”. Tsënö nikarmi kuyukuyta mana puëdeq nunata, “sharkuy, kirmëkita aparkur wayikita ëwakuy” nirqan.+
7 Tsënam tsë nunaqa sharkur wayinta ëwakurqan.
8 Tsëta rikëkurnam, mëtsika nunakunaqa alläpa mantsakäyarqan, y tsëta rurayänampaq nunakunata carguman churanqampitam Teyta Diosta alabayarqan.
9 Tsëpita ëwakurnam, impuestu cobrakuyänan wayichö Mateu jutiyoq nuna tëkaqta rikarqan, tsënam Jesusqa, “qatimaqnï kë” nirqan, y Mateunam sharkur* qepanta ëwarqan.+
10 Mateupa wayinchö mikuykaptinnam, impuestuta cobraqkuna y jutsasapakuna* atskaq chäyarqan, y Jesuswan y qateqninkunawan juntum mikuyarqan.+
11 Tsëta rikarnam fariseukunaqa Jesuspa qateqninkunata kënö tapuyarqan: “¿Imanirtan maestruykikunaqa impuestuta cobraqkunawan y jutsasapakunawan* juntu mikun?”.+
12 Tsëta wiyëkurnam Jesusqa kënö nirqan: “Sänu këkaqkunaqa manam doctorta wanayantsu,* peru qeshyëkaqkunam sïqa.+
13 Tsëmi, ëwar yachakuyë kënö ninqan ima ninan kanqanta: ‘Llakipäkoq* kayänëkitam munäqa, manam noqapaq animalkunata pishtayämunëkitatsu’.+ Noqaqa manam allita ruraqkunarëkurtsu shamurqö, sinöqa jutsata* ruraqkunarëkurmi”.
14 Tsëpitanam Juanpa qateqninkunaqa pëman witïkur kënö tapuyarqan: “¿Imanirtan noqakuna y fariseukunaqa ayunayä, peru qatiräshoqnikikunaqa ayunayantsu?”.+
15 Tsënam Jesusqa nirqan: “Casakuychöqa, noviu pëkunawanraq këkaptinqa noviupa amïgunkunaqa manam llakishqaraqtsu këkäyan+ ¿aw? Peru noviu pëkunawan manana kaptinmi sïqa,+ llakikur ayunayanqa.
16 Manam pillapis mushoq tëlawanqa janan kaq makwa röpanta remendanmantsu, tsëta ruraptinqa, mushoq tëla qentikarmi tsë makwa röpata masraq rachiskatsinqa.+
17 Llullu vïnutapis manam makwa qara porongukunamantsu winayan, tsëta rurayaptinqa, qara porongukuna pashtarmi imapaqpis väliyanmannatsu, y vïnupis jichakärinmanmi. Tsëpa rantinqa, llullu vïnutaqa mushoq qara porongumanmi winayan, tsënöpam ni mëqampis ushakantsu”.
18 Tsëkunata nikaptinnam, juk gobernador shamur puntanman qonqurikuykur kënö nirqan: “Warmi wamralläqa wanushqanachi këkan, peru shamur makikita pëman churëkullaptikiqa kawarkamunqam”.+
19 Tsënam Jesusqa sharkur* tsë nunawan ëwarqan, y qateqninkunapis qepantam ëwayarqan.
20 Y illaqpitam döci watapana yawar ëwëwan qeshyëkaq warmi,+ qepampa witïkur janan röpampa kuchunta yatëkurqan.+
21 Tsëtaqa rurarqan kikinllachö, “janan kaq röpanllatapis yatëkurninqa, alliyarkushaqmi” nirmi.
22 Tsënam Jesusqa tsë warmiman tumëkur kënö nirqan: “¡Ama yarpachakuytsu hïja! Markäkurmi o yärakurmi qeshyëkipita alliyarqunki”.+ Y tsë höram tsë warmiqa alliyärirqan.+
23 Tsëpitanam gobernadorpa wayinman yëkurqan, y flauta tocaqkunata y mëtsika nunakunata waqëkaqta rikëkurmi,+
24 Jesusqa kënö nirqan: “Këpita yarquyë, wamraqa manam wanushqatsu këkan, sinöqa punuykanllam”.+ Tsëta niptinnam nunakunaqa pëpita burlakurnin asikuyarqan.
25 Y nunakuna wayipita yarquriyaptinllam, Jesusqa wayiman yëkur wamrata makipita aptarkurqan,+ tsënam wamraqa sharkamurqan.+
26 Tsë pasanqantaqa, tsë kinrë markakunachö y estanciakunachömi musyariyarqan.
27 Tsëpita ëwakuykaptinnam, ishkaq wisku o qapra nunakuna Jesuspa qepanta ëwar+ fuertipa, “Davidpa Tsurin, llakipëkayämë”* niyarqan.
28 Juk wayiman yëkuriptin tsë ishkaq wisku nunakuna pëman witiriyaptinmi Jesusqa kënö tapurqan: “¿Markäkuyankiku o yärakuyankiku nawikikunata alliyätsita puëdinqäman?”.+ Tsënam pëkunaqa, “awmi Teytë” niyarqan.
29 Tsënam, nawinkunata yatëkur,+ “markäkoq o yärakoq kayanqëkimannö munayanqëki rurakätsun” nirqan.
30 Y tsë höram nawinkuna alliyaskirqan. Tsënam Jesusqa alli cläru, “ama pitapis këta willayankitsu” nirqan.+
31 Tsënö nikaptinmi pëkunaqa, wayipita yarquskirlla tsë kinrë markakunachö y estanciakunachö pë ruranqanta willakuyarqan.
32 Tsë nunakuna ëwakuykäyaptinnam, demoniuyoq karnin müduyashqa* nunata Jesusman apayämurqan.+
33 Tsë demoniuta qarquriptinnam, tsë müdu* nunaqa parlar qallëkurqan.+ Tsënam nunakunaqa mantsakar, “Israelchöqa manam imëpis kënöqa pasashqatsu”+ niyarqan.
34 Peru fariseukunaqa, “demoniukunata gobernaq yanapaptinmi pëqa demoniukunata qarqun” niyarqanmi.+
35 Tsëpitanam Jesusqa llapan markakunapa y caserïukunapa ëwar, Diosta adorayänan wayikunachö yachatsikurqan, Diospa Gobiernumpita alli noticiakunata willakurqan y imëkawan sufreqkunata y qeshyëkaqkunatam alliyätsirqan.+
36 Mitseqninnaq üshakunatanö sufrikaqta rikar+ y mana cäsuyanqanta* rikarmi nunakunata alläpa llakiparqan.*+
37 Tsënam qateqninkunata kënö nirqan: “Rikäyanqëkinöpis, cosechëpaqqa mëtsikam kan, peru peonkunaqa wallkaqllam kayan.+
38 Cosëchanman mas peonkunata mandamunampaq chakrapa Duëñunta rogakuyë”.+
Nötakuna
^ Kënöpis niyanmi: Pecäduykikunapita.
^ Kënöpis niyanmi: Pecäduykikunapita.
^ Kënöpis niyanmi: pecäduyoqkunata.
^ Kënöpis niyanmi: ichirkur.
^ Kënöpis niyanmi: pecädu ruraqkuna.
^ Kënöpis niyanmi: pecädu ruraqkunawan.
^ Kënöpis niyanmi: necesitäyantsu.
^ Kënöpis niyanmi: Ankupäkoq; Kuyapäkoq.
^ Kënöpis niyanmi: pecäduta.
^ Kënöpis niyanmi: ichirkur.
^ Kënöpis niyanmi: ankupëkayämë; kuyapëkayämë.
^ Kënöpis niyanmi: upayashqa.
^ Kënöpis niyanmi: upa.
^ O “dejashqa këkaqta”.
^ Kënöpis niyanmi: ankuparqan; kuyaparqan.
