Mateu 8:1-34
8 Jirkapita urarkamuptinnam mëtsikaq nunakuna qepanta ëwayarqan.
2 Tsënam lepra qeshyayoq nuna chärir puntanman qonqurikuykur kënö nirqan: “Teytë, noqaqa musyämi qam munarninqa alliyätsimëta* puëdinqëkita”.+
3 Tsënam Jesusqa yatëkur, “¡alliyänëkita* munämi!” nirqan.+ Y tsë höram lepra qeshyan ushakärirqan.+
4 Tsëpitanam Jesusqa nirqan: “Ama pitapis willankitsu,+ tsëpa rantinqa, alliyanqëkita musyayänampaq sacerdötikunaman ëwë,+ y Moises mandakunqannö+ qarëta apë”.
5 Capernaumman yëkuriptinnam, soldädukunata mandaq nuna Jesusman witïkurnin rogakur+
6 kënö nirqan: “Teytë, sirwimaqnïmi mana kuyukuyta puëdir wayichö cämarëkan, y alläpam sufrikan”.
7 Pënam nirqan: “Wayikiman chëkurnam alliyätsimushaq”.
8 Soldädukunata mandaq nunanam kënö nirqan: “Teytë, noqalläqa manam wayïman yëkamunëkipaqnötsu kallä, peru alliyänampaq nïkuptikillam sirwimaqnïqa alliyärinqa.
9 Noqapis autoridäyoqkunapa mandädunchömi kä, y atska soldädukunam mandädüchöpis kayan, tsëmi juk kaqta ‘¡ëwakuy!’ niptï ëwakun, y juknin kaqta ‘¡shamuy!’ niptï shamun, y sirwimaqnïpis ‘¡këta rurë!’ niptïqa ruranmi”.
10 Tsëta wiyëkurnam Jesusqa espantakur qepanta ëwaq nunakunata kënö nirqan: “Manam Israelchöqa pënö Diosman alläpa markäkoqtaqa o yärakoqtaqa ni juk nunallatapis rikashqätsu.+
11 Tsëmi qamkunata noqa nï:* inti o rupay yarqamunan lädupita y jeqanan lädupitam mëtsikaq shayämunqa, y Teyta Diospa Gobiernunchömi Abrahanwan, Isaacwan y Jacobwan juntu mësaman jamakuyanqa;+
12 peru Gobiernuta chaskiyänampaq derëchuyoq kaqkunaqa,* ampirëkaqmanmi o tsakëkaqmanmi* qarqushqa kayanqa. Tsëchömi waqayanqa, y cölerarmi kirunkunatapis ruchuchütsiyanqa”.+
13 Tsëpitanam Jesusqa soldädukunata mandaqta kënö nirqan: “Wayikita kutikuy, markäkoq o yärakoq kanqëkimannö munanqëki rurakätsun”.+ Y tsë höram sirweqnin alliyaskirqan.+
14 Pëdrupa wayinman chärirnam Jesusqa Pëdrupa suegranta+ fiebrir cämarëkaqta tarirqan.+
15 Y makinta Jesus yatëkuptinmi fiebrin pasarirqan,+ tsënam pëqa sharkur atiendir qallëkurqan.
16 Inti o rupay jeqëkaptinnam, nunakunaqa demoniuyoq kaqkunata Jesusman apayämurqan; y Jesusqa tsë mana alli espïritukunatam nunakunapita qarqurqan, y llapan sufrikaqkunatam alliyätsirqan.
17 Tsënöqa karqan Teyta Diospa willakoqnin Isaïas kënö willakunqan cumplikänampaqmi: “Pëmi qeshyantsikta y nanënintsikta apakurqan”.+
18 Mëtsika nunakunata lädunchö rikëkurmi Jesusqa qateqninkunata mandarqan qochapa wak tsimpanman ëwayänampaq.+
19 Tsënam Ley qellqaq nuna pëman witïkur, “Maestru, mëta ëwaptikipis qepëkitam shamushaq” nirqan.+
20 Tsënam Jesusqa kënö nirqan: “Atoqkunapaqa machënin kanmi, y pishqukunapapis qeshun kanmi, peru nunapa Tsurimpaqa, manam wayinllapis kantsu tsëchö jamarinampaq”.*+
21 Tsënam juk qateqninqa, “Teytë, puntataqa papänïtaraq pampëkamushaq” nirqan.+
22 Jesusnam nirqan: “Qamqa imëpis qepäta shamuy, wanushqakunataqa wanushqa mayinkuna pampakuyätsun”.+
23 Barcuman yëkuskiptinnam, qateqninkunapis qepanta yëkuyarqan.+
24 Tsënam qochachö fuertipa vientur qallëkuptin, yaku laqcheqsar barcuman yëkur qallëkurqan; peru Jesusqa punuykarqanmi.+
25 Tsënam qateqninkunaqa pëman ëwëkur, “¡Teytë, salvëkayämë! ¡Kananqa ushakäshunchi!” nir riyatsiyarqan o rikchatsiyarqan.
26 Pënam “markäkuynin o yärakuynin pisheq nunakuna, ¿imanirtan alläpa mantsakäyanki?”+ nirqan. Tsëpitanam sharkur* vientuta y qochata qayapëkurqan, y tsë höram llapan calmakärirqan.+
27 Tsënam qateqninkunaqa mantsakar kënö niyarqan: “¿Imanö nunatan kë nunaqa? Vientupis y qochapis pëtaqa cäsuyantaq”.
28 Qochapa wak tsimpan Gadära kinrëmanmi chäriyarqan. Tsëchömi sepultürakunapita shamuykaq demoniuyoq ishkë nunakunawan tinkurqan.+ Alläpa lïsu kayaptinmi, tsë nänipa puritaqa llapampis mantsayaq.
29 Y illaqpitam fuertipa kënö niyarqan: “¿Imatataq noqakunapita munanki, Diospa Tsurin?+ ¿Manaraq tiempu chämuptinku+ sufritsiyämaq shamurqunki?”.+
30 Pëkunapita ichik karuchönam, mëtsika kuchikuna mikur këkäyarqan.+
31 Tsënam demoniukunaqa kënö rogakuyarqan: “Qarquyämänëki kaptinqa, tsë mëtsika kuchikunaman yëkuyänäpaq mandëkayämë”.+
32 Y “¡ëwayë!” niptinnam demoniukunaqa ishkan nunakunapita yarqur kuchikunaman yëkuyarqan. Tsënam kuchikunaqa jirkampita qochaman jeqarkuyarqan, y tsëchömi llapan wanuyarqan o wañuyarqan.
33 Kuchi mitseqkunanam qeshpir ëwakuyarqan, y markaman chëkurmi llapan pasakunqanta y demoniuyoq nunakunawan ima pasanqanta willakuyarqan.
34 Tsënam tsë markapita nunakunaqa Jesusta asheq yarqayämurqan, y tarïkurnam, markankunapita ëwakunampaq rogayarqan.+
Nötakuna
^ Griëgu idiömachöqa “limpiamëta” ninmi.
^ Griëgu idiömachöqa “limpiu kanëkita” ninmi.
^ Kënöpis niyanmi: niyaq.
^ Griëgu idiömachöqa “Gobiernupa tsurinkunaqa” ninmi.
^ Kënöpis niyanmi: tutapëmanmi.
^ Griëgu idiömachöqa “peqanta jamaratsinampaq” ninmi.
^ Kënöpis niyanmi: ichirkur.
