Mateu 18:1-35
18 Tsë kutichömi qateqninkuna Jesusman witïkur kënö niyarqan: “Tsëqa, ¿pitan Diospa Gobiernunchö mas carguyoq?”.+
2 Tsënam juk wamrata qayëkur pëkunapa lädunman shëkatsir*
3 kënö nirqan: “Noqam qamkunata nï:* imanö pensayanqëkita cambiar wamrakunanö mana karqa,+ manam imëpis Diospa Gobiernunchö kayankitsu.+
4 Kë wamranö humildi kaqmi, Diospa Gobiernunchöqa mas carguyoq kanqa,+
5 y pï nunapis kë wamratanö jutïchö chaskeqqa, noqatapis chaskimanmi.
6 Peru noqaman markäkoq o yärakoq pishi wamranö kaqkunata creikunqanta dejatseq kaqpaqqa,* ashnu tumatsinqan juknin kaq rumi mulinuta kunkanman warkurkur lamarman jitarkuyanqanmi mas alliqa kanqa.+
7 ¡Allaw nuna mayinkunata mana alliman chätseqkuna! Awmi, wakinkunata mana alliman chätseqkunaqa imëpis kanqam, peru ¡allaw tsëta ruraqkuna!
8 Tsëmi makiki o chakiki mana allikunata ruratsishuptikiqa, roqur karuman jitëkuy.+ Ishkan makikiwan o ishkan chakikiwan mana ushakaq ninachö* ushakanqëkipitaqa, juk makiyoqllapis o juk chakiyoqllapis kawëta chaskinqëkim mas alliqa kanqa.+
9 Tsënölla nawiki mana allikunata ruratsishuptikipis, jipir karuman jitëkuy. Ishkan nawikiwan rawrëkaq o lunyëkaq Gehënachö* ushakanqëkipitaqa, juk nawiyoqllapis kawëta chaskinqëkim mas alliqa kanqa.+
10 Cuidädu pishi wamranö kaqkunata mëqantapis despreciayankiman, noqam qamkunata nï,* ciëluchö këkaq angelninkunaqa Teytäpa cärantam imëpis rikëkäyan.*+
11 *
12 ¿Ima niyankitan? Juk nunapa cien üshankunapita juk oqrakaptinqa,+ ¿manatsuraq noventa y nuëvi kaqta jirkachö dejëkur oqrakashqa kaqta asheq ëwanqa?+
13 Noqam qamkunata nï,* tarïkurqa noventa y nuëvi üshankunapaq kushikunqampitapis, tsë üshampaqmi mas kushikunqa.
14 Tsënöllam ciëluchö këkaq Teytäpis,* pishi wamranö kaqkunapita mëqanllapis mana alliman chäyänanta munantsu.+
15 Tsëmi creikoq mayiki contrëki jutsata* ruraptinqa, ëwar japallanwan parlar+ imachö mana allita ruranqanta nï. Ninqëkita wiyakuptinqa, allita ruranampaqmi creikoq mayikita yanaparqunki.+
16 Peru mana wiyashuptikiqa, jukta o ishkaqta pusharkur pëwan parlaq ëwë, tsënöpa ishkaq o kimaq willakuyanqanwan* ima asuntupis cläru quedanampaq.+
17 Peru pëkunatapis mana wiyakuptinqa, dirigeqkunata* willë. Y pëkunatapis mana wiyakuptinqa, Teyta Diosman mana creeq nunakunanö*+ y impuestu cobraqkunanö qampaq katsun.+
18 Noqam qamkunata nï,* imatapis kë patsachö watayanqëkiqa, ciëluchöqa watashqanam kanqa, y imatapis kë patsachö paskayanqëkiqa, ciëluchöqa paskashqanam kanqa.
19 Tsënöllam qamkunata nï,* qamkunapita ishkaq ima asuntupaqpis mañakuyänëkipaq acuerdu kayaptikiqa, ciëluchö këkaq Teytä permitiptinmi mañakuyanqëkita chaskiyanki.+
20 Mëchöpis ishkaq o kimaq jutïchö juntarëkäyaptinqa,+ noqapis pëkunapa chowpinchömi* këkä”.
21 Tsënam Pëdruqa Jesusman witïkur kënö nirqan: “Teytë, creikoq mayï conträ jutsata* ruraptinqa, ¿ëka kutitan perdonäman? ¿Qanchis kutiku?”.
22 Jesusnam nirqan: “Manam qanchis kutilla perdonanëkipaqtsu neq, sinöqa setenta y siëti kuti perdonanëkipaqmi.+
23 Tsëmi Teyta Diospa Gobiernunqa, sirweqninkuna debiyanqanta cobraq gobernaqnö.
24 Cobrakur qallëkuptinmi, diez mil talentuta* debeq nunata pëman apayämurqan.
25 Peru paguëta mana puëdiptinmi tsë gobernaqqa, debinqanta pagakunampaq pëta, warminta, tsurinkunata y llapan imëkanta rantikuyänampaq mandakurqan.+
26 Tsënam sirweqninqa puntanman qonqurïkur, ‘shuyëkallämë, llapantam pagallashqëki’ nirqan.
27 Tsënam gobernaqqa sirweqninta llakiparnin* debinqanta mana cobrarlla ëwakunanta dejëkurqan.+
28 Tsëpita yarquskirllam tsë sirwipakoqqa cien denariuta* debeq sirwipakoq mayinwan tinkurirqan, y kunkampita aptarkurmi, ‘llapan debimanqëkita pagamë’ nirqan.
29 Tsënam sirwipakoq mayinqa puntanman qonqurikuykur, ‘shuyëkallämë, pagallashqëkim’ nir rogakurqan.
30 Tsënö nikaptimpis pëqa manam cäsurqantsu. Tsëpa rantinqa, llapan debinqanta paganqanyaqmi prësutsirqan.
31 Tsëta musyëkurnam sirwipakoq mayinkunaqa alläpa cölerar, llapan pasanqanta gobernaqta willaq ëwayarqan.
32 Tsënam gobernaqqa qayëkatsir nirqan: ‘¡Malafë nuna! Noqaqa rogamaptikim debimanqëkita cobrarqoqtsu.
33 ¿Manaku qamta llakipanqaqnölla* sirwipakoq mayikita llakipankiman karqan?’.+
34 Tsëmi gobernaqqa alläpa cölerar carcelchö guardiakunata entreguëkurqan, y llapan debinqanta paganqanyaqmi prësurätsirqan.
35 Tsënöllam ciëluchö këkaq+ Teytäpis rurayäshunki creikoq mayikikunata rasumpa mana perdonayaptikiqa”.+
Nötakuna
^ Kënöpis niyanmi: ichïkatsir.
^ Kënöpis niyanmi: niyaq.
^ Griëgu idiömachöqa “ishkitseqpaqqa” ninmi.
^ Tsënö nirqa, ushakëpaqmi parlëkan. Rikäri “Bibliachö palabrakunata entiendinapaq” neqchö “Gehëna” neqta.
^ Rikäri “Bibliachö palabrakunata entiendinapaq” neqta.
^ Kënöpis niyanmi: niyaq.
^ O “Teytä këkanqanmanmi imëpis yëkuyta puëdiyan”.
^ Kënöpis niyanmi: niyaq.
^ O capazchi “Teytëkipis”.
^ Kënöpis niyanmi: pecäduta.
^ O “testïgukuna willakuyanqanwan”.
^ Griëgu idiömachöqa “congregacionta” ninmi. Tsënö nirqa, congregacionta dirigeqkunapaqmi parlëkan.
^ Griëgu idiömachöqa “juk nacion nunakunanö” ninmi.
^ Kënöpis niyanmi: niyaq.
^ Kënöpis niyanmi: niyaq.
^ Kënöpis niyanmi: pullanninchömi.
^ Kënöpis niyanmi: pecäduta.
^ Tsë 10 mil talentuqa, 60 millon denarium karqan. Rikäri “Masllata musyanapaq” neqchö B14 kaqta.
^ Kënöpis niyanmi: ankuparnin; kuyaparnin.
^ Kënöpis niyanmi: ankupanqaqnölla; kuyapanqaqnölla.
