Mateu 17:1-27
17 Tsëpita joqta junaq pasariptinnam Jesusqa Pëdruta, Santiäguta y Santiägupa wawqin Juanta pusharkur pëkunallawan juk jatun jirkaman ëwarqan.+
2 Pëkunapa puntanchömi Jesusqa jukläya tikrarirqan. Cäranqa intinöran o rupaynöran chipaparqan, y janan kaq röpankunapis aktsinöran chipaparqan.*+
3 Tsë höram Moisesta y Elïasta Jesuswan parlëkaqta rikäyarqan.
4 Tsënam Pëdruqa Jesusta kënö nirqan: “Teytë, ¡alläpa allim këchö këkanqantsikqa! Munaptikiqa, kima carpakunata* armaramushaq, jukta qampaq, jukta Moisespaq y juktana Elïaspaq”.
5 Y manaraq parlar ushaptinmi, chipapëkaq pukutë llapankunata tsaparkurqan, y pukutë rurimpita kënö nimoqtam wiyayarqan: “Pëmi kuyë Tsurï, pëpaqmi alläpa kushikü.+ Pëta wiyayë”.+
6 Tsëta wiyëkurnam Jesuspa qateqninkunaqa urkunkunapis patsaman chanqanyaq qonqurikuyarqan, y alläpam mantsakäyarqan.
7 Tsënam Jesusqa pëkunaman witïkur y yatëkur kënö nirqan: “Sharkuyë. Ama mantsakäyëtsu”.
8 Y ñukirkurqa* manam pitapis rikäyarqannatsu, sinöqa Jesusllatanam.
9 Jirkapita urëkämurnam Jesusqa qateqninkunata kënö mandarqan: “Nunapa Tsurin kawarimunqanyaq, ama rikäyanqëkita pitapis willayankitsu”.+
10 Peru qateqninkunaqa kënömi tapuyarqan: “Tsëqa, ¿imanirtan Ley qellqaqkunaqa Elïasraq puntata shamunampaq kaqta niyan?”.+
11 Tsënam pëqa kënö nirqan: “Rasunmi, Elïasmi puntata shamur imëkata punta kanqanman kutitsinan.+
12 Tsënö kaptimpis, këtam qamkunata nï:* Elïasqa shamushqanam, peru pëkunaqa manam reqiyashqatsu, sinöqa munayanqantam pëwan rurayashqa.+ Tsënöllam Nunapa Tsurintapis sufritsiyanqa”.+
13 Tsë höram qateqninkunaqa Bautizakoq Juanpaq parlëkanqanta cuentata qokuyarqan.
14 Nunakuna këkäyanqanman chäriyaptinnam,+ Jesus kaqman witïkurnin puntanman qonqurikuykur juk nuna kënö nirqan:
15 “Teytë, tsurilläta llakipëkullë,* atäkiwan qeshyarmi kutin kutin ninaman o yakumampis ishkin.+
16 Qatiräshoqnikikunamanmi apamurqö, peru manam alliyätsita puëdiyashqatsu”.
17 Tsënam Jesusqa nunakunata kënö nirqan: “¡Mana markäkoq o yärakoq y llutankunata ruraq nunakuna!+ ¿Imëyaqraq qamkunawan këkäshaq? ¿Imëyaqraq qamkunata aguantayashqëki? Këman apayämuy”.
18 Jesus qayapëkuptinmi tsë demoniuqa wamrapita yarquskirqan, y tsë höram wamraqa alliyärirqan.+
19 Tsëpitanam qateqninkunaqa pëkunalla Jesusman ëwëkur kënö tapuyarqan: “¿Imanirtan noqakunaqa tsë demoniuta qarquyta puëdiyarqötsu?”.
20 Tsënam pëqa nirqan: “Mana alläpa markäkoq o yärakoq karninmi. Noqam qamkunata nï,* markäkuyanqëki mostäza murunöllapis kaptinqa, kë jirkata ‘washaman ëwë’ niyaptikipis, tsëmanmi ëwanqa, y imëkatam rurëta puëdiyanki”.+
21 *
22 Galilëa provinciachö llapankuna juntarëkäyaptinmi Jesusqa qateqninkunata kënö nirqan: “Nunapa Tsurinqa nunakunapa makinmanmi entregashqa kanqa,+
23 y wanutsiyanqam, peru kima junaqtam kawarimunqa”.+ Tsëta niptinnam, qateqninkunaqa alläpa llakikuyarqan.
24 Capernaumman chäriyaptinnam, impuestupita ishkë dracma* qellëta cobrakoqkuna Pëdruman witïkur kënö niyarqan: “¿Manaku maestruykiqa impuestupita ishkë dracma qellëta pagakun?”.+
25 Pëdrunam, “awmi, pagakunmi” nirqan. Peru wayiman yëkuriptinnam, manaraq imatapis parlaptin Jesus kënö nirqan: “¿Ima ninkitan Simon? ¿Pikunatataq patsachö gobernaqkuna imëka impuestuta* cobrayan? ¿Tsurinkunata o juk nunakunataku?”.
26 Pënam, “juk nunakunatam” nir contestarqan. Tsënam Jesusqa kënö nirqan: “Tsënö kaptinqa, manam tsurikunaqa impuestuta pagayantsu.
27 Peru mana parlamänapaq,* qochaman ëwar anzuëluta jitë,+ y puntata tsarinqëki* pescädupa shiminchömi pläta qellëta* tarinki, tsëta noqapita y qampita paguëkuy”.
Nötakuna
^ O “aktsinömi yuraq tikrarqan”.
^ Kënöpis niyanmi: toldukunata.
^ Kënöpis niyanmi: peqankunata pallarkurqa; umankunata pallarkurqa.
^ Kënöpis niyanmi: niyaq.
^ Kënöpis niyanmi: ankupëkullë; kuyapëkullë.
^ Kënöpis niyanmi: niyaq.
^ Griëgu idiömachöqa “didracmakuna” ninmi. Rikäri “Masllata musyanapaq” neqchö B14 kaqta.
^ Tsënö nirqa, cada nuna paganqan impuestupaqmi parlëkan.
^ O “wakinkunata mana ishkitsinapaq”.
^ Kënöpis niyanmi: achkunqëki.
^ Griëgu idiömachöqa “estater” ninmi. Capaz tsënö nirqa 4 dracma qellëpaq parlëkan. 4 junaqkunanö trabäjupita pägum kaq. Rikäri “Masllata musyanapaq” neqchö B14 kaqta.
