Juan 16:1-33
16 Tsëkunataqa qamkunata nirqö,* creikuyta mana dejayänëkipaqmi.
2 Diosta adorayänan wayipitam qarquyäshunki.+ Rasumpa kaqchöqa, ichikllachönam wanutsiyäshoqniki o wañutsiyäshoqniki kaqkunaqa,+ Teyta Diosta sirwir tsëta rurëkäyanqanta pensayanqa.
3 Tsëtaqa, Teytata ni noqata mana reqiyämashqa karmi rurayanqa.+
4 Tsëkunataqa qamkunata nirqö,* tsëkuna pasaptin ninqäta yarpäyänëkipaqmi.+
Qamkunawan juntu kashqa karmi tsëkunataqa puntallapitana qamkunata nirqötsu.*
5 Peru kananqa mandamaqnï kaqmanmi ëwakü;+ y manam mëqëkipis, ‘¿mëtataq ëwakunki?’ nir tapuyämankitsu.
6 Sinöqa tsëkunata qamkunata nishqa kaptïmi,* shonquykikuna alläpa llakishqa këkan.+
7 Rasunllatam qamkunata nï,* biennikikunapaqmi ëwakü. Mana ëwakuptïqa, manam yanapayäshoqniki santu espïritu qamkunaman shamunqatsu;+ peru ëwakurqa, qamkunamanmi mandamushaq.
8 Tsë yanapakoq shamurqa, llapan nunakunatam cläru rikätsinqa jutsa* y alli rurë ima kanqanta, y Teyta Dios imanö juzganqanta.
9 Puntataqa, pëkuna noqaman mana markäkuyaptinmi o yärakuyaptinmi,+ jutsa* ima kanqanta rikätsikunqa;+
10 tsëpitanam alli rurë ima kanqanta rikätsikunqa. Tsëqa rikakunqa Teytaman ëwakuptï qamkuna manana rikäyämaptikim;
11 tsëpitanam, Teyta Dios imanö juzganqanta rikätsikunqa. Tsëqa rikakunqa kë munduchö nunakunapa gobernaqnin juzgashqa kaptinmi.+
12 Qamkunata ninäpaqqa* imëkaran kan, peru llapantaqa manam entiendita puëdiyankimantsu.
13 Tsënö kaptimpis, rasumpa kaqta musyatsikoq santu espïritu shamurmi,+ llapan rasumpa kaqta yachatsiyäshunki. Tsë yanapakoqqa* manam kikinllapitatsu parlanqa, sinöqa Teyta Diospita wiyanqantam, y llapan pasakunampaq kaqtam willayäshunki.+
14 Noqapita llapan wiyanqanta willayäshurnikim,+ tsë yanapakoqqa alabamanqa.+
15 Llapan musyanqantam Teytaqa willamashqa.+ Tsëmi qamkunata nirqö* santu espïrituqa noqapita wiyanqanta willayäshunëkipaq kaqta.
16 Ichikllachönam rikäyämankinatsu,+ y ichikllachönam yapë rikäyämanki”.
17 Tsëta wiyëkurnam wakin qateqninkunaqa kënö ninakuyarqan: “¿Ima nitataq munan ‘Ichikllachönam rikäyämankinatsu, peru ichikllachönam yapë rikäyämanki’ nir, y ‘Teytamanmi ëwakü’ nirqa?”.
18 Kënöpis niyaqmi: “¿Ima nitataq munan ‘Ichikllachönam’ nirqa? Manam musyantsiktsu imapaq parlëkanqanta”.
19 Tapuyta munayanqanta musyarmi Jesusqa kënö nirqan: “¿‘Ichikllachönam rikäyämankinatsu, peru ichikllachönam yapë rikäyämanki’ nishqa kaptïku tsëpaq tapunakur këkäyanki?
20 Rasunllatam qamkunata nï,* qamkunaqa waqayankim y llakikuyankim, peru kë munduchö nunakunaqa kushikuyanqam; qamkunaqa sufriyankim, peru sufrirpis tsëpitaqa kushikuyankim.+
21 Wamran yurinampaq höra chashqa kaptinmi warmiqa alläpa nanatsikun, peru wamran yuriskiptinqa, kë munduman juk wamrata apamunqampita alläpa kushikurmi imanö sufrinqantapis yarpannatsu.
22 Tsënöllam qamkunapis alläpa llakishqa këkäyanki, peru noqaqa yapëmi rikäyashqëki, y shonquykikunaqa alläpam kushikunqa,+ y tsë kushikuyanqëkitaqa manam ni pï ushakätsinqatsu.
23 Tsë junaqqa, manam ni imatapis tapuyämankinatsu. Rasunllatam qamkunata nï,* jutïchö Teytata+ imatapis mañakurqa chaskiyankim.+
24 Kananyaqqa manaran jutïchö imatapis mañakuyarqunkiraqtsu. Kushikuyänëkipaq mañakuyë, y chaskiyankim.
25 Tsëkunataqa igualatsikuykunawanmi qamkunata nirqö.* Peru ichikllachönam igualatsikuykunawantsu parlapäyashqëki, sinöqa alli clärum Teytapita yachatsiyashqëki.
26 Tsë junaqqa jutïchömi Teytata mañakuyanki; tsëta nirqa manam qamkunarëkur mañakunäpaq kaqtatsu nikä.
27 Qamkunaqa kuyayämarqunkim+ y Teyta Diospa jutinchö shamunqätam creiyarqunki,+ tsëmi qamkunataqa kikin Teyta kuyayäshunki.
28 Teytapa jutinchömi nunakunaman shamurqö. Kananqa nunakunata dejëkurmi Teytaman ëwakü”.+
29 Qateqninkunanam niyarqan: “Kananqa clärum parlamunki, manam igualatsikuykunawannatsu.
30 Kananqa musyayämi llapanta musyanqëkita, y tapupäyäshunëkita mana wananqëkita.* Tsëmi Teyta Diospita shamunqëkita creiyä”.
31 Tsënam Jesusqa nirqan: “¿Kananqa creiyankiku?
32 Këta wiyayë, chëkämunnam höra, y rasumpa kaqchöqa, höranam japalläta dejaramar wakpa këpa cada ünu wayikikunaman ëwakuyänëkipaq.+ Tsënö kaptimpis, Teyta noqawan kaptinmi, japallätsu këkä.+
33 Tsëkunataqa qamkunata nirqö,* noqarëkur yamë këta tariyänëkipaqmi.+ Kë munduchöqa imëkatam sufriyanki, peru ¡valienti kayë! Noqaqa vencishqämi kë munduchö imëka mana allikunata”.+
Nötakuna
^ Kënöpis niyanmi: niyarqoq.
^ Kënöpis niyanmi: niyarqoq.
^ Kënöpis niyanmi: niyarqaqtsu.
^ Kënöpis niyanmi: kayapteqmi.
^ Kënöpis niyanmi: niyaq.
^ Kënöpis niyanmi: pecädu.
^ Kënöpis niyanmi: pecädu.
^ Kënöpis niyanmi: niyänaqpaqqa.
^ “Yanapakoq” nirqa, Jesusqa santu espïritupaqmi nunapaqnö parlëkarqan, peru tsë kallpaqa manam nunatsu. Griëgu idiömachö santu espïritu nirqa, manam ollqupaqnötsu ni warmipaqnötsu parlëkan.
^ Kënöpis niyanmi: niyarqoq.
^ Kënöpis niyanmi: niyaq.
^ Kënöpis niyanmi: niyaq.
^ Kënöpis niyanmi: niyarqoq.
^ Kënöpis niyanmi: necesitanqëkita.
^ Kënöpis niyanmi: niyarqoq.
