Jonas 4:1-11
4 Tsëqa manam ni ichikllapis Jonasta gustarqantsu, y alläpam cölerëkurqan.
2 Tsëmi Teyta Jehoväman kënö nir mañakurqan: “Teyta Jehovä, ¡markällachöraq këkarmi noqaqa musyarqä kënö pasakunampaq kaqta! Noqaqa musyarqänam qamqa alläpa alli, llakipäkoq,*+ mana cölerakoq y rasumpa kuyakoq kanqëkita, y nunakunata castiguëta mana munanqëkita, tsëmi Tarsis naciontapis ëwakurqä.+
3 Tsëqa Teyta Jehovä jukllana wanuykatsimë o wañuykatsimë. ¡Imapaqnatan kawashaqpis!”.+
4 Tsënam Jehoväqa, “¿rasumpa kaqtaku tsëläya cölerashqa këkanki?” nirqan.
5 Tsënam Jonasqa Nïnivi markapita yarquskir, inti o rupay yarqamunan lädupa ëwakurqan. Nïnivi markapa amänunchö juk sitiuta ashïkurmi tsëchö jamakurqan. Tsëpitanam ramädata rurëkur, Nïnivi markata imapis pasananta rikëta munar tsë rurinman jamakurqan.+
6 Jehovä Diosqa, Jonas alli sientikunanta munar, y achachëpita tsapänanta munarmi calabäzu plantata yuritsirqan. Jonasqa tsë plantapaq alläpam kushikurqan.
7 Peru Teyta Diosqa, waränin junaqmi manaraq patsa waraptin tsë calabäzu plantata kaptunampaq kuruta mandarqan. Tsënam tsë plantaqa tsakiskirqan.
8 Inti o rupay yarqamunan höram Teyta Diosqa inti o rupay yarqamunan lädupita achachaq vientuta vientuykatsirqan. Peqanman o umanman inti o rupay fuertipa chaptinmi Jonasqa upayarqan, y wanuytapis o wañuytapis munarmi kutin kutin, “¡imapaqnataq kawashaqpis!” nirqan.+
9 Tsënam Teyta Diosqa Jonasta, “¿rasumpa kaqchöku calabäzurëkur tsëläya cölerashqa këkanki?” nirqan.+
Y Jonasqa, “ari rasumpa kaqchömi cölerashqa këkä, tsëmi wanuytapis munä” nirqan.
10 Tsënam Teyta Jehoväqa kënö nirqan: “Qamqa mana muruykar y mana winatsishqa këkarmi, juk paqasllachö yureq y waränin paqasllachö ushakäreq calabäzu plantapaq llakishqa këkanki.
11 Tsëqa, ¿manatsuraq noqaqa masraq llakipäman* jatun Nïnivi markachö nunakunata?+ Tsë markachöqa cientu veinti milpitapis masmi nunakuna kayan, y manam musyayantsu ima alli y ima mana alli kanqanta. Tsë markachöqa mëtsika animalkunapis kanmi”.+
