Filipensis 1:1-30
1 Cristu Jesuspa sirweqninkuna Pablupita y Timoteupita, Filïpuschö+ Cristu Jesuspa qateqnin limpiu nunakunapaq, anciänukunapaq* y siervu ministerialkunapaq:*+
2 Teytantsik Dios y Señornintsik Jesucristu qamkunawan alläpa alli këkuyätsun y yamë kayänëkipaq yanapëkuyäshuy.
3 Qamkunata cada yarpäyarnikim Teyta Diosnïta imëpis agradecikü
4 qamkunapaq cada rogakunqächö. Tsënö rogakurqa kushishqam rurä,+
5 qallanan junaqpita kananyaq alli noticiakunata willakur yanapakuyaptiki.*
6 Këpitam següru këkä: qamkunachö alli rurëta qallaq Teyta Diosmi, Cristu Jesus juzganan junaqyaq+ tsë rurëta ushayänëkipaq yanapayäshunki.+
7 Qamkunataqa llapëkitam shonqüchö katsiyaq, tsëmi llapëkipaq tsënö pensanqäqa allilla. Qamkunaqa prësurëkaptï,+ y ley ninqampita välikur alli noticiakunata defendirmi yanapayämarqunki.+ Tsënömi qamkunapis y noqapis Teyta Dios alläpa alli kanqanta rikarquntsik.
8 Teyta Diosqa musyanmi qamkunata alläpa llakiyanqaqta,* y Cristu Jesus kuyayäshunqëkinölla noqapis alläpa kuyayanqaqta.*
9 Këtam imëpis mañakü: imatapis mas alli musyayanqëkimannö+ y mas alli entiendiyanqëkimannö,+ mas y mas kuyakoq kayänëkipaq.+
10 Tsënöpa imakuna mas väleq kanqanta segurakur,+ Cristu juzganan junaqyaq llapanchö alli këkäyänëkipaq y creikuyanqanchö jukkunapaq atäjuta mana churayänëkipaq*+
11 y imanö kawakuyanqëkichö y portakuyanqëkichö alli kaqta rurayänëkipaq Jesucristu yanapayäshuptiki,+ Teyta Dios alläpa respetashqa y alabashqa kanampaq.
12 Wawqikuna y panikuna, noqa pasanqäkunaqa alli noticiakuna mëtsëman chänampaq yanapakushqa kanqanta musyayänëkitam munä,
13 awmi, Römata gobernaqpa soldädunkuna y wakinkunapis musyayanmi, Cristuta sirwinqärëkur+ prësu këkanqäta.+
14 Y kananqa Señorta sirweq cäsi llapan wawqikuna y panikunam, noqa prësu kanqärëkur mas kallpayoq tikrayashqa, y Diospa palabrampita mana mantsakushpa parlayänampaqmi mas valienti tikrayashqa.
15 Rasunmi wakinqa envidiakur y pleytuta ashirmi Cristupita willakuykäyan, peru wakinqa alli shonqunwanmi rurëkäyan.
16 Ultimu kaqkunaqa, alli noticiakunata defendinäpaq carguta chaskishqa kanqäta musyarmi, kuyakoq kayanqanta rikätsikur Cristupita willakuykäyan;+
17 peru wakinqa prësu këkar problëmayoq kanäta munarmi, alli shonquwan rurayänampaq rantin pleytuta ashirlla tsëkunata rurëkäyan.
18 ¿Imatataq tsëwan lograyashqa? Imanö karpis, janan shonqulla kar o alli shonquwan karpis Cristupitam willakuykäyan, tsëmi alläpa kushikü. Rasumpa kaqchöqa, kushikurmi sïguishaq.
19 Noqaqa qamkuna rogakuyaptiki y Jesucristupita chaskinqantsik santu espïritu yanapamaptinmi,+ tsëqa salvacionman chätsimänampaq kaqta musyä.+
20 Tsëqa imapitapis penqakuyta mana munanqänö y shuyaranqänömi këkan. Segürum këkä, kawar o wanurpis, noqaqa* Cristuta llapampita mas puntaman churanäpaq imëpis ruranqänölla mana mantsakushpa parlar sïguinäpaq kaqta.+
21 Noqapa cäsuchöqa, kawarqa Cristupaqmi kawä,+ y wanurqa kikïpa biennïpaqmi wanü.+
22 Peru kë cuerpuchö kawar sïguinä kaptinqa, Cristupaqmi mas trabajashaq.* Tsënö kaptimpis, imata akranäpaq kaqtaqa manam willakütsu.
23 Kë ishkëmi shonqüchö rakikashqata katsiman, ëwar Cristuwan juntu këtam munä+ y tsëqa mas allim.+
24 Tsënö kaptimpis, qamkunapa biennikikunapaq kë cuerpuchö kawar sïguinämi mas alli.
25 Tsëman confiakurmi, Teyta Diosta sirwiyanqëkichö mas alli kayänëkipaq y markäkoq o yärakoq kar kushishqa kayänëkipaq, kawar sïguinäpaq kaqta y llapëkiwan sïguinäpaq kaqta musyä.
26 Tsënöpa qamkunawan yapë këkaptï, Cristu Jesuspa qateqnin kar noqarëkur alläpa kushikuyänëkipaq.
27 Cristupita alli noticiakunata willakoqnö portakuyë,+ tsënöpa qamkunawan këkaptï o mana këkaptïpis, qamkunapita wiyanäpaq, alli aguantar juk pensëyoqlla* kayanqëkita, juknölla* kayanqëkita,+ alli noticiakunaman markäkur o yärakur kallpachakur këkäyanqëkita,
28 y chikiyäshoqnikikunata ni ichikllapis mana mantsayanqëkita. Tsëmi rikätsikun pëkuna ushakäyänampaq kaqta,+ peru qamkunaqa salvakuyänëkipaq kaqta,+ y Teyta Diosmi tsë cläru kananta permitin.
29 Qamkunaqa manam Cristuman markäkuyänëkillapaqtsu o yärakuyänëkillapaqtsu akrashqa kayarqunki, sinöqa përëkur sufriyänëkipaqwanmi.+
30 Tsëmi qamkunapis pasanqä pruëbapa pasëkäyanki,+ y musyayanqëkinöpis kananyaqmi tsëkunapa pasëkä.
Nötakuna
^ O “cristiänukunata yanapaqkunapaq”.
^ O “cristiänukunata dirigeqkunapaq”.
^ O “alli noticiakunata mëtsëman chänampaq yanapakuyaptiki”.
^ Kënöpis niyanmi: kuyanqäta.
^ Kënöpis niyanmi: llakinqäta.
^ Griëgu idiömachöqa “jukkunata mana ishkitsiyänëkipaq” ninmi.
^ O “noqaqa cuerpüwan”.
^ Tsënö nirqa, Cristu väleqpaq churashqa kanampaq trabajanampaqmi parlëkan.
^ Griëgu idiömachöqa “espïrituyoqlla” ninmi.
^ O “juk yarpëyoqlla”.
