Ezequiel 34:1-31
34 Teyta Jehovämi yapë parlapämarqan y kënömi nimarqan:
2 “Nunapa tsurin, kananqa Israelchö mitsikoqkuna imanö kayanqanta willakuy. Israelchö mitsikoqkunata kënö nï: ‘Llapanta Gobernaq Teyta Jehovämi kënö niyäshunki: “Israelchö mitsikoqkuna, qamkunaqa imëka mana allipam pasayanki,+ qamkunaqa üshakunata qonqëkurmi mikurlla kakuyanki, ¿manaku yarpäyanki üshakuna mallaqäyanqanta?+
3 Qamkunaqa wiran wiranta mikoqllapaq, millwampita röpata rurëkur vistikuyllapaq y mas wiran* kaqkunata pishtëllapaqmi kayanki,+ peru üshataqa mallaqtam katsiyankim.+
4 Manam dëbil kaqkunata yanapayarqunkitsu, ni qeshyëkaqkunata jampiyarqunkitsu, ni pakikushqa kaqkunapa herïdankunata watapuyarqunkitsu, ni manam kastankunapita rakikashqakunata kutitsiyämurqunkitsu, ni oqrakashqa kaqkunatapis ashiyämurqunkitsu.+ Tsëta rurayänëkipa rantinmi, qamkunaqa mana llakipëpa* imëka mana allikunata rurayarqunki y sufritsiyarqunki.+
5 Tsënam pëkunaqa, mitseqninkuna mana kaptin mëtsëpa ëwakuyarqan,+ y chukaru animalkunam mikur ushayarqan.
6 Üshäkunaqa jatusaq jirkakunachö y taksha jirkakunachömi oqrakashqa puriyarqan. Entëru patsachömi mëtsëchö kayarqan, peru manam ni pï ashirqantsu.
7 Tsëmi Teyta Jehoväqa, qamkuna mitsikoqkunata kënö niyäshunki:
8 ‘Noqa kawëkaq Llapanta Gobernaq Jehovämi nï: “Üshäkunataqa, mitseqninkuna mana kaptinmi chukaru animalkuna mikur ushayashqa. Peru qamkunaqa, cuidayänëkipaq churëkaptïmi* ashiyarqunkitsu, kikikikunallam pacha junta mikur kakuyarqunki, peru üshäkunataqa mallaqätsiyarqunkim”’.
9 Mitsikoqkuna, tsënö kayanqëkipita Teyta Jehovä niyäshunqëkita wiyayë.
10 Llapanta Gobernaq Teyta Jehovämi kënö nin: ‘Kananqa mitsikoqkunapa contranmi churakarqö. Llapan üshäkunapitam cuentata mañashaq y mananam pëkuna mitsiyänanta* ni mikur kakuyänanta permitishaqtsu.+ Pëkunapitam librashaq y mananam üshäkunata mikuyanqanatsu’”.
11 Llapanta Gobernaq Teyta Jehovämi kënö nin: “Noqam këchö këkä, kananqa kikïmi üshäkunata ashishaq y cuidashaq.+
12 Oqrakashqa üshankunata tarïkur juk mitsikoq alli qewakunachö mitsinqannömi, noqapis üshäkunata cuidashaq.+ Alläpa yana pukutë kanqan junaq oqrakashqa üshäkunatam mëtsëpita kutitsimushaq.+
13 Mëtsë markakunapita y mëtsë nacionkunapitam markankunaman kutitsimushaq. Y Israel jirkakunachö,+ yaku kuchunkunachö y nunakuna kawayanqan markakunachömi mitsishaq.
14 Alli qewakunachömi mitsishaq, Israelchömi altu jirkakunachö alli qewakunaqa kan.+ Alli qewakuna kanqan sitiuchömi punuyanqa.+ Israel jirkakunachömi mas allin kaq qewakunata mikuyanqa”.
15 “Llapanta Gobernaq Teyta Jehovämi kënö nin: ‘Üshäkunataqa kikïmi mitsishaq,+ y jamayänampaqmi alli sitiukunaman apashaq.+
16 Oqrakashqa kaqkunatam ashimushaq,+ kastankunapita rakikashqa kaqkunatam kutitsimushaq y pakikushqa kaqkunapa herïdankunatam watapushaq y dëbil këkaqkunatam yanapashaq. Peru mas kallpasapa y wiran kaqkunataqa ushakätsishaqmi. Pëkunataqa juzgarmi castigashaq’”.
17 “Kananqa üshäkuna wiyayämë, Llapanta Gobernaq Jehovämi kënö niyäshunki: ‘Üshakunata, carnërukunata y chïvukunatapis* juzgashaqmi.+
18 ¿Imanirtan alli qewata mikuykarpis conformakuyankitsu? ¿Imanirtan sobraq kaq qewataqa jarukacharkuyanki? Mas limpiu kaq yakuta upurirpis, ¿imanirtan chakikikunawan jarur putkayätsiyanki?
19 Y üshäkunaqa, ¿jaruyanqëki qewatatsuraq mikuyanqa y chakikikunawan putkatäyanqëki yakutatsuraq upuyanqa?’”.
20 Tsëmi Llapanta Gobernaq Teyta Jehoväqa kënö niyäshunki: “Kananqa kikïmi juzgayashqëki, wira* kaq üshakunata y uyu kaq üshakunatapis juzgashaqmi.
21 Qamkunaqa tanqarmi ushayarqunki, y qeshyëkaqkunatam waqrëkikunawan takar karu karuta qarqayämurqunki.
22 Üshäkunataqa salvashaqmi, üshäkunataqa manam mas mikuyanqanatsu.+ Llapan üshakunatam juzgashaq.
23 Y juk mitsikoqllatanam mitsinampaq churashaq,+ sirwimaqnï Davidta.+ Pëmi cuidanqa, pëmi mitseqninkuna kanqa y alli qewakunachömi mitsinqa.+
24 Noqa Jehovänam Diosninkuna kashaq,+ y sirwimaqnï Davidmi mandaqninkuna kanqa.+ Noqa Jehovämi tsëta parlarqö.
25 Y pëkunawanmi alli kawakuyänampaq juk acuerduta rurashaq.+ Jirkakunachöpis següru kawayänampaq y monti kuchunkunachöpis següru punuyänampaqmi+ tsë nacionchö këkaq chukaru animalkunata ushakätsishaq.+
26 Pëkunata y entëru jirkäkunatam bendicishaq+ y tiempunchömi tamyatsishaq, y mëtsika bendiciontam tamyatanöraq chaskiyanqa.+
27 Tukuyläya plantakunam alli wayunqa, patsachöqa imëkam wayunqa.+ Üshäkunaqa, imatapis mana mantsapakuypam kawakuyanqa. Nunakunapa podernimpita y sufritsiyäshunqëkipita librariptïmi, musyariyanqa noqa Jehovä kanqäta.+
28 Manam nacionkunapis ni chukaru animalkunapis imanayanqanatsu, segürum kawakuyanqa y manam ni pï mantsakätsinqatsu.+
29 Noqam jatunyätsishaq juk plantanö reqishqa kayänampaq. Mananam mallaqëpita wanuyanqanatsu,+ ni juk nacion nunakunapis sufritsiyanqanatsu.+
30 ‘Tsënam musyayanqa Israel nunakunapaqa, Jehovä Diosninkuna noqa kanqäta y pëkunawan këkanqäta y pëkunapis sirwimaqnïkuna kayanqanta’+ ninmi Llapanta Gobernaq Teyta Jehovä”’.
31 ‘Y qamkunaqa üshäkunam kayanki, cuidanqä üshäkuna,+ qamkunaqa nunallam kayanki y noqam Diosnikikuna kä’ ninmi Llapanta Gobernaq Teyta Jehovä”.
Nötakuna
^ Kënöpis niyanmi: weran.
^ Kënöpis niyanmi: ankupëpa; kuyapëpa.
^ Kënöpis niyanmi: churëkäyapteqmi.
^ O “cuidayänanta”.
^ Kënöpis niyanmi: orqu cabrakunatapis.
^ Kënöpis niyanmi: wera.
