Exodu 38:1-31
38 Ushakanqanyaq rupatsina qarëkunata rupatsiyänampaqmi acacia qerupita cuadrädu altarta rurayarqan. Largunqa ishkë metrunömi* karqan, anchunnam ishkë metrunö,* y altunnam juk metrunö* karqan.+
2 Tsëpitanam altarpa chuskun esquïnanchö waqrakunata rurayarqan. Altarwan esquïnankunachö ëwaq waqrakunaqa juk piëzallam kayarqan. Y tsë altarpa jananmanmi cobrita laqayarqan.+
3 Y altarchö utilizäyänampaqmi cobripita baldikunata, lampakunata, tazonkunata, largu chakiyoq trinchikunata y sartenkunata rurayarqan.
4 Y altarman churayänampaqmi cobripita rejïllata rurayarqan. Tsë rejïllaqa altarpa rurinchömi tinku ëwaq, y altarpa pullannimpam churayarqan.
5 Y chuskun esquïnanman churayänampaq argöllakunata rurëkurmi rejïllapa lädunmampa churayarqan. Tsënöpa argöllakuna rurimpa listonkunata ulluratsir altarta puritsiyänampaq.
6 Tsë listonkunataqa acacia qerupita rurëkurmi cobrita jananman laqayarqan.
7 Y altarta puritsiyänampaqmi, ishkan lädunchö ëwaq argöllakunapa tsë listonkunata ullutsiyarqan. Tsë altartaqa tablakunawanmi cäja niraqta rurayarqan, y jawanqa kichararqanmi.
8 Tsëpitanam cobripita espëjukunata* tsulluratsir jatun lavatoriuta+ y tätsiyänampaq armazonta rurayarqan. Tsë espëjukunaqa carpa* wayipa yëkunanchö turnuypa yanapakoq warmikunapam karqan.
9 Carpa* wayipa entëru lädumpam patiuta cercayarqan.+ Patiupa izquierda* lädunqa cuarenta y cincu metrusnömi* karqan.+ Tsë lädunta cercayänampaqmi lïnupita rurashqa alli kaq hïluwan bayëtakunata awayarqan.
10 Y tsë bayëtakunata warkuyänampaqmi cobripita veinti listonkunata, y tsëkunata jawiyänampaq* veinti täcukunata rurayarqan. Jawiyanqan listonkunamanmi plätapita ganchukunata y argöllakunata churayarqan.
11 Patiupa derëcha lädumpis cuarenta y cincu metrusnömi* karqan, tsëta cercayänampaqmi bayëtakunata rurayarqan. Tsë bayëtakunata warkuyänampaqmi cobripita veinti listonkunata y tsëkunata jawiyänampaq* veinti täcukunata rurayarqan. Jawiyanqan listonkunamanmi plätapita ganchukunata y argöllakunata churayarqan.
12 Carpa* wayipa qepanqa* veintidos metrusnömi* karqan, tsëta cercayänampaqmi bayëtakunata rurayarqan. Tsë bayëtakunata warkuyänampaqmi chunka listonkunata rurayarqan, y tsëkunata jawiyänampaqnam* chunka täcukunata. Y jawiyanqan listonkunamanmi plätapita ganchukunata y argöllakunata churayarqan.
13 Carpa* wayiman yëkuyänan läduqa veintidos metrusnömi* karqan, y tsëta cercayänampaqpis bayëtakunatam rurayarqan.
14 Punkupa derëcha lädunman churayänampaqmi qanchis metrunö* bayëtakunata juntayarqan. Tsë bayëtakunata warkuyänampaqmi kima listonkunata, y tsëkunata jawiyänampaq* kima täcukunata rurayarqan.
15 Tsënöllam punkupa izquierda lädunman churayänampaqpis qanchis metrunö* bayëtakunata juntayarqan. Tsë bayëtakunata warkuyänampaqmi kima listonkunata rurayarqan, y tsëkunata jawiyänampaqnam* kima täcukunata.
16 Entëru patiuta cercayänampaq bayëtakunataqa, lïnupita rurashqa alli kaq hïluwanmi awayarqan.
17 Patiupa entëru lädumpa jawiyanqan* listonkunapaq argöllakunata y ganchukunataqa plätapitam rurayarqan,+ täcukunatanam cobripita. Y listonkunapa jananmanmi plätata laqayarqan.
18 Y patiupa yëkunanman churayänampaqmi azul hïluwan, millwapita granäti hïluwan, puka hïluwan y lïnupita rurashqa alli kaq hïluwan bayëtata awayarqan. Tsë bayëtapa largunqa isqun metrunömi karqan,* y anchunnam ishkë metrunö* karqan. Patiuta cercayänampaq awayanqan wakin bayëtakunapis tsë medïdallam kayarqan.+
19 Tsë bayëtakunata warkuyänampaqmi cobripita chusku listonkunata, y tsëkunata jawiyänampaq* chusku täcukunata rurayarqan. Plätapitam ganchukunata rurayarqan, y listonkunaman y argöllankunamanmi plätata laqayarqan.
20 Carpa* wayita tsapaq bayëtakunata y patiuchö ëwaq bayëtakunata watayänampaqqa cobripitam estäcakunata rurayarqan.+
21 Tsë llapantam carpa* wayita rurayänampaq utilizäyarqan.+ Moisesqa llapan utilizäyanqanta apuntayänampaqmi mandakurqan. Levïtakunaqa Moises mandakunqannömi rurayarqan,+ y sacerdöti Aaronpa tsurin Itamarmi+ pëkunata dirigirqan.
22 Judä kastapita Bezalelmi,+ Teyta Jehovä Moisesta mandanqannölla tsë llapanta rurarqan. Bezalelqa Urïpa tsurin y Hurpa willkanmi karqan.
23 Y Dan kastapita Ahisamacpa tsurin Oholiabmi+ yanaparqan. Pëqa imëka rurëtam yachaq. Azul hïluwan, millwapita granäti hïluwan, puka hïluwan, lïnupita rurashqa alli kaq hïluwanmi awëta y bordëta yachaq.
24 Sagrädu sitiuta rurayänampaqqa, mil kïlus* örum yëkurqan. Tsëqa israelïtakuna apayanqan qarëmi karqan.*+ Tsë örutaqa sagrädu sitiuchö këkaq pësakunata churëkurmi pesayarqan.
25 Llapan censashqa ollqukuna apayanqan plätaqa, tres mil cuatrocientus cuarenta kïlusmi* karqan. Tsë plätataqa sagrädu sitiuchö këkaq pësakunata churëkurmi pesayarqan.
26 Veinti watayoqpita witsëpa censashqa ollqukunaqa, seiscientus tres mil quinientus cincuentam kayarqan.+ Y cada ünum seis grämus* plätata apayarqan. Tsë apayanqan plätataqa, sagrädu sitiuchö këkaq pësakunata churëkurmi pesayarqan.+
27 Carpa* wayichö shätsiyanqan* marcukunapaq y cortïnata tsaraq columnakunapaq täcukunataqa, tres mil cuatrocientus veinti kïlus* plätapitam rurayarqan. Tsë llapan plätawanmi cien täcukunata rurayarqan. Cada täcutam treinta y cincu kïlusnö* plätapita rurayarqan.+
28 Y bayëtakunata listonkunaman warkuyänampaqmi veinti kïlus* plätawan ganchukunata rurayarqan. Y listonkunapa jananmanmi tsë plätata laqayarqan, y tsëpitam listonkunata juntayarqan.
29 Israelïtakuna apayanqan cobriqa,* dos mil cuatrocientus veinti kïlusmi* karqan.
30 Tsë cobriwanmi carpa* wayipa yëkunanman churayanqan marcukunapaq täcukunata rurayarqan. Y tsë cobrillawanmi rurayarqan altarta, rejïllanta, altarchö utilizäyänampaq kaqkunata,
31 patiuta cercarnin jawiyanqan listonkunapaq täcukunata, patiupa yëkunanman jawiyanqan listonkunapaq täcukunata, y carpa* wayita tsapaq bayëtakunata y patiuchö ëwaq bayëtakunata watayänampaq estäcakunata.+
Nötakuna
^ Hebreu idiömachöqa “5 cödus” ninmi. 1 cöduqa 44,5 centïmetrusmi karqan. Rikäri “Masllata musyanapaq” neqchö B14 kaqta.
^ Hebreu idiömachöqa “5 cödus” ninmi. 1 cöduqa 44,5 centïmetrusmi karqan. Rikäri “Masllata musyanapaq” neqchö B14 kaqta.
^ Hebreu idömachöqa “3 cödus” ninmi. 1 cöduqa 44,5 centïmetrusmi karqan. Rikäri “Masllata musyanapaq” neqchö B14 kaqta.
^ Unë witsanqa, broncipita, cobripita, lätapita, plätapita, örupita y tsënö mëtalkunapitam espëjukunata rurayaq.
^ Kënöpis niyanmi: toldu.
^ Kënöpis niyanmi: Toldu.
^ Hebreu idiömachöqa “sur” ninmi.
^ Hebreu idiömachöqa “100 cödus” ninmi. 1 cöduqa 44,5 centïmetrusmi karqan. Rikäri “Masllata musyanapaq” neqchö B14 kaqta.
^ Kënöpis niyanmi: shakutsiyänampaq.
^ Hebreu idiömachöqa “100 cödus” ninmi. 1 cöduqa 44,5 centïmetrusmi karqan. Rikäri “Masllata musyanapaq” neqchö B14 kaqta.
^ Kënöpis niyanmi: shakutsiyänampaq.
^ Kënöpis niyanmi: Toldu.
^ Hebreu idiömachöqa “inti o rupay jeqanan läduta” ninmi.
^ Hebreu idiömachöqa “50 cödus” ninmi. 1 cöduqa 44,5 centïmetrusmi karqan. Rikäri “Masllata musyanapaq” neqchö B14 kaqta.
^ Kënöpis niyanmi: shakutsiyänampaqnam.
^ Kënöpis niyanmi: Toldu.
^ Hebreu idiömachöqa “50 cödus” ninmi. 1 cöduqa 44,5 centïmetrusmi karqan. Rikäri “Masllata musyanapaq” neqchö B14 kaqta.
^ Hebreu idiömachöqa “15 cödus” ninmi. 1 cöduqa 44,5 centïmetrusmi karqan. Rikäri “Masllata musyanapaq” neqchö B14 kaqta.
^ Kënöpis niyanmi: shakutsiyänampaq.
^ Hebreu idiömachöqa “15 cödus” ninmi. 1 cöduqa 44,5 centïmetrusmi karqan. Rikäri “Masllata musyanapaq” neqchö B14 kaqta.
^ Kënöpis niyanmi: shakutsiyänampaqnam.
^ Kënöpis niyanmi: shakutsiyanqan.
^ Hebreu idiömachöqa “5 cödus” ninmi. 1 cöduqa 44,5 centïmetrusmi karqan. Rikäri “Masllata musyanapaq” neqchö B14 kaqta.
^ Hebreu idiömachöqa “20 cödus” ninmi. 1 cöduqa 44,5 centïmetrusmi karqan. Rikäri “Masllata musyanapaq” neqchö B14 kaqta.
^ Kënöpis niyanmi: shakutsiyänampaq.
^ Kënöpis niyanmi: Toldu.
^ Kënöpis niyanmi: toldu.
^ Hebreu idiömachöqa “29 talentus y 730 siclus” ninmi. 1 talentuqa 34,2 kïlusmi karqan, y 1 siclunam 11,4 grämus karqan. Rikäri “Masllata musyanapaq” neqchö B14 kaqta.
^ O “puntaman y qepaman kuyutsiyanqan qarëmi karqan”.
^ Hebreu idiömachoqa “100 talentus y 1.775 siclus” ninmi. 1 talentuqa 34,2 kïlusmi karqan, y 1 siclunam 11,4 grämus karqan. Rikäri “Masllata musyanapaq” neqchö B14 kaqta.
^ Hebreu idiömachöqa “mediu siclu” ninmi. 1 sicluqa 11,4 grämusmi karqan. Rikäri “Masllata musyanapaq” neqchö B14 kaqta.
^ Kënöpis niyanmi: Toldu.
^ Kënöpis niyanmi: ichïtsiyanqan.
^ Hebreu idiömachöqa “100 talentus” ninmi. 1 talentuqa 34,2 kïlusmi karqan. Rikäri “Masllata musyanapaq” neqchö B14 kaqta.
^ Hebreu idömachöqa “1 talentu” ninmi. 1 talentuqa 34,2 kïlusmi karqan. Rikäri “Masllata musyanapaq” neqchö B14 kaqta.
^ Hebreu idiömachöqa “1.775 siclus” ninmi. 1 sicluqa 11,4 grämusmi karqan. Rikäri “Masllata musyanapaq” neqchö B14 kaqta.
^ O “puntaman y qepaman kuyutsiyänan qarëqa”.
^ Hebreu idiömachöqa “70 talentus y 2.400 siclus” ninmi. 1 talentuqa 34,2 kïlusmi karqan, y 1 siclunam 11,4 grämus karqan. Rikäri “Masllata musyanapaq” neqchö B14 kaqta.
^ Kënöpis niyanmi: toldu.
^ Kënöpis niyanmi: toldu.
