Exodu 13:1-22
13 Y Teyta Jehoväqa Moisestam kënö nirqan:
2 “Israelïtakunapa mayor ollqu wamrankunaqa noqapaqmi kanqa, tsëmi mayor ollqu wamrankunataqa noqapaq rakinëki. Punta yureq orqu* animalninkunapis noqapaqmi kanqa”.+
3 Tsëpitanam Moisesqa israelïtakunata nirqan: “Kanan paqasmi Jehovä Diosnintsikqa alläpa puëdeq kanqanta rikätsikur+ Egiptuchö esclävu kayanqëkipita salvayäshunki, tsëmi levadürayoqtaqa imatapis mikuyänëkitsu. Kanan paqas pasakunampaq kaqtaqa imëpis yarpäyänëkim.+
4 Kanan paqasmi Egiptupita yarquyanki, tsëmi kë Abib* killataqa+ imëpis yarpäyänëki.
5 Teyta Jehoväqa unë kastantsikkunatam änirqan+ cananeu, hitïta, amorreu, heveu y jebuseu nunakunapa+ markakunapa duëñun kanapaq kaqta. Tsë markakunachöqa lichipis, mielpis mëtsikam kan.+ Y tsë markakunachöna këkarpis, kanan paqas pasakunqanta y kë killataqa imëpis yarpäyänëkim.
6 Qanchis junaqpam levadürannaq tantata mikuyänëki,+ y qanchis kaq junaqqa Teyta Jehoväta alabayänëkipaqmi juntakäyänëki.
7 Qanchis junaqmi täkuyanqëki* markakunachö levadürannaq tantallata mikuyänëki,+ y manam levadürayoq masata o levadürayoqtaqa imatapis katsiyänëkitsu.+
8 Tsë paqasmi wamrëkikunata niyänëki: ‘Këtaqa rurëkantsik Egiptupita Teyta Jehovä salvayämanqanta yarparmi’.+
9 Tsë paqas pasakunqanta yarpäyanqëkiqa makikikunachö y urkuykikunachö señalnömi kanqa.+ Tsëmi yanapayäshunki Teyta Jehovä mandakunqampita imëpis parlayänëkipaq, y Jehovä Diosnintsik alläpa puëdeq kanqanta rikätsikur Egiptupita salvayäshunqëkita yarpäyänëkipaq.
10 Tsë mandakunqantaqa pë mandakunqan tiempuchömi cada wata rurayänëki.+
11 Teyta Jehoväqa cananeu nunakunapa markakunapa duëñun kayänëkipaqmi qamkunata y unë kastëkikunata äniyäshurqëki.+ Tsë markakunachöna këkäyaptikipis,
12 mayor ollqu wamrëkikuna y animalnikikunapa punta yureq orqu* wawankunapis Teyta Jehoväpaqmi kanan.+ Tsë llapanqa Teyta Jehoväpaqmi kanqa.
13 Punta yureq orqu* ashnupa rantinqa juk üshatam Teyta Diospaq pishtayänëki. Tsëta mana rurarqa, kunkanchö wirurmi tsë ashnuta wanutsiyänëki. Y mayor ollqu wamrëkikunapitam chaninta pagakuyänëki.+
14 ‘¿Imanirtan këta rurëkantsik?’ nirnin wamrëkikuna imëllapis tapuyäshuptikiqa, kënö niyanki: ‘Këtaqa rurëkantsik Jehovä Diosnintsik alläpa puëdeq kanqanta rikätsikur Egiptuchö esclävu kayanqäpita salvayämanqanta yarparmi.+
15 Egiptuchö gobernaqqa chukru shonqu karmi yarqayämunäta munarqantsu,+ tsëmi Teyta Jehoväqa egipciukunapa mayor ollqu tsurinkunata y animalninkunapa punta yureq orqu* wawankunata wanuratsirqan.+ Tsëmi llapan animalkunapa punta yureq orqu wawankunata Teyta Jehoväpaq pishtantsik, y mayor ollqu wamrakunapita chaninta pagakuntsik’.
16 Y tsë llapanta rurayanqëkiqa makikikunachö y urkuykikunachö señalnömi kanqa,+ y tsëmi yanapayäshunki Jehovä Diosnintsik alläpa puëdeq kanqanta rikätsikur Egiptupita salvayäshunqëkita yarpäyänëkipaq”.
17 Israelïtakuna ëwakuyänanta Egiptuchö gobernaq dejariptinmi, israelïtakunaman pensar Teyta Diosqa kënö nirqan: “Pelyayänampaq kaqta rikarninqa, capazchi Egiptuman kutikuyta munayanqa”. Tsëmi tsunyaq sitiuta ëwayänampaq filisteukunapa markampa pasaq nänipa mas amänu kaptimpis, tsëpatsu pusharqan.
18 Tsëpa rantinqa, Puka lamarman ëwaq nänipam pusharqan.+ Israelïtakunaqa pelyaman ëwaq soldädukunanömi shumaq ordenädu Egiptupita yarquyarqan.
19 Josëqa Israelpa tsurinkunatam kënö nishqa karqan: “Teyta Diosnintsik kë nacionpita apakuyäshuptikiqa, tullükunata aparkur ëwakuyanki”,+ y tsëta cumpliyänampaqmi juratsirqan. Tsëmi Moisesqa Egiptupita yarqurnin Josëpa tullunkunata apakurqan.
20 Israelïtakunaqa Sucot sitiupita yarqurmi Ezam sitiuman chäyarqan, y tsëchömi carpankunata* armayarqan. Ezam sitiupitaqa tsunyaq sitiunam qallaq.
21 Teyta Jehoväqa pëkunata pusharmi puntankunata ëwarqan. Junaqpaqa shëkaq* pukutëwanmi pusharqan,+ y paqaspanam shëkaq ninawan. Tsëmi paqaspa y junaqpapis israelïtakunaqa ëwëkäyarqanlla.+
22 Tsë pukutëqa llapan junaqkunam israelïtakunapa puntanta ëwarqan, y ninanam llapan paqaskuna pusharqan.+
Nötakuna
^ Kënöpis niyanmi: mächu.
^ Kënöpis niyanmi: täräyanqëki; pärayanqëki.
^ Kënöpis niyanmi: mächu.
^ Kënöpis niyanmi: mächu.
^ Kënöpis niyanmi: mächu.
^ Kënöpis niyanmi: toldunkunata.
^ Kënöpis niyanmi: ichirëkaq.
