Esdras 7:1-28
7 Tiempu pasariptinnam Persia nacionchöqa Artajerjesna+ gobernarqan. Tsë witsanmi Esdrasqa*+ Babiloniapita Jerusalenman kutirqan. Esdraspa papäninmi Seräya+ karqan, Seräyapa papäninmi Azarïas karqan, Azarïaspa papäninmi Hilquïas+ karqan,
2 Hilquïaspa papäninmi Salum karqan, Salumpa papäninmi Sadoc karqan, Sadocpa papäninmi Ahitub karqan,
3 Ahitubpa papäninmi Amarïas karqan, Amarïaspa papäninmi Azarïas karqan, Azarïaspa+ papäninmi Merayot karqan,
4 Merayotpa papäninmi Zerahïas karqan, Zeharïaspa papäninmi Uzï karqan, Uzïpa papäninmi Buquï karqan,
5 Buquïpa papäninmi Abisüa karqan, Abisüapa papäninmi Finehas karqan,+ Finehaspa papäninmi Eleazar karqan+ y Eleazarpa papäninmi mandakoq sacerdöti Aaron karqan.+
6 Esdrasqa Babiloniapitam kutirqan. Pëqa Israelpa Diosnin Jehoväpa Leynintam alli copiëta yachaq, tsë Leytaqa Moiseswanmi Teyta Dios qellqatsishqa karqan.+ Jehovä Dios yanapaptinmi, Esdrastaqa gobernantipis llapan mañakunqanwan yanaparqan.
7 Tsëmi wakin israelïtakuna, sacerdötikuna, levïtakuna,+ cantaqkuna,+ punkuchö täpakoqkuna+ y templuchö yanapakoqkunapis*+ Jerusalen markaman kutiyarqan. Tsëqa karqan Artajerjes qanchis watapana gobernanqan witsanmi.
8 Y Esdrasqa Jerusalenman charqan, qanchis watapa y pitsqa killapa Artajerjes gobernëkaptinmi.
9 Esdrasqa Babiloniapita yarqurqan, wata qallaq killapa punta junaqninchömi y Jerusalenmanqa charqan pitsqa kaq killapa punta kaq junaqninchömi. Kuyakoq Teyta Diosnin yanapaptinmi allilla charqan.+
10 Esdrasqa llapan shonqunwanmi Jehovä Diospa Leyninta yachakurqan y cäsukurqan.+ Tsënöllam ninqankunata y mandakunqankunata israelïtakunata yachatsirqan.+
11 Sacerdöti Esdrasqa leykunatam copiëta alli yachaq y allim musyaq israelïtakunapaq Jehovä Dios qellqatsinqan leykunata y mandamientukunata. Pëtam gobernanti Artajerjesqa kënö neq cartata entregarqan:
12 * “Ciëluchö këkaq Diospa Leyninta copiëta alli yachaq sacerdöti Esdras, noqam, llapan gobernantikunapitapis mas puëdeq Artajerjes+ qampaq salüduta apatsimü.
13 Noqam mandakurqö llapan israelïtakuna, sacerdötikuna y levïtakunapis munarqa, mandakunqä markakunapita qamwan Jerusalenta kutikuyänampaq.+
14 Qanchis yanapamaqnïkunawanmi mandëkäyaq Judäta y Jerusalenta ëwarnin Diosnikipa Leyninta cumplikäyanqanta o mana cumplikäyanqanta rikämunëkipaq. Qammi tsë leytaqa katsinki.
15 Tsënöllam noqapis y yanapamaqnïkunapis rakiyanqä pläta metalta y öruta Jerusalenchö këkaq Israelpa Diosnimpaq apanëkita munayä.
16 Y Babilonia provinciachö nunakuna entregayäshunqëki llapan pläta metalta, öruta y voluntäninkunapita nunakuna y sacerdötinkuna entregayäshunqëki qarëkunatapis Diospa templunman apanki.+
17 Tsë qellëwanmi mana qonqëllapa törukunata,+ carnërukunata,+ mallwa üshakunata,+ gränupita rurashqa qarëkunata+ y vïnuta rantinëki.+ Y tsë llapantam Jerusalenman chëkur, Diospa templunchö këkaq altarchö rupatsinëki.
18 Y sobraq pläta metaltawan örutaqa, Diosnikikuna munanqanmannö sacerdöti mayikikunawan dispuniyanki.
19 Tsënölla Jerusalenchö templuman Diosnikipaq churanki utilizäyänampaq chaskinqëki väsukunata, tazonkunata y wakin cösaskunata.+
20 Diosnikipa templunchö imapis pishiptinqa gobernantita pagayanqan impuestupita gastanki.+
21 Noqa Artajerjesmi Eufratis mayu* tsimpanchö* këkaq tesorërukunata mandarqö, sacerdöti Esdrasta+ llapan mañakunqanta jinan höra entregayänampaq. Pëqa ciëluchö këkaq Diospa Leyninta copiëta alli yachaqmi.
22 Këkunatam entreguëta puëdiyan: pläta metaltam tres mil cuatrocientus kïlusta,* trïgutam dieciseis mil kïlusta,* vïnutam dos mil doscientus litrusta*+ y aceititam dos mil doscientus litrusta.*+ Tsëpita mastaqa manam entregayänantsu. Y kachitaqa+ llapan mañakunqantam entreguëta puëdiyan.
23 Ciëluchö këkaq Diospa templumpaq llapan mandakunqantaqa+ empëñu empëñum rurayänan. Tsënöpam noqawan, tsurïkunawan y mandakunqä nunakunawampis Dios cölerakunqatsu.+
24 Tsënöllam mandarqö Diospa templunchö trabajaq sacerdötikunata, levïtakunata, müsica tocaqkunata,+ punkuchö cuidakoqkunata, templuchö yanapakoqkunata*+ o wakin trabajaqkunata impuestuta*+ ni peäjita manana cobrayänampaq.
25 Qamtaqa Esdras, Diosmi yanapashurqunki yachaq kanëkipaq. Tsëmi Eufratis mayu* tsimpanchö* llapan nunakunata juzgayänampaq gobernadorkunata y juezkunata churanëki. Pëkunaqa Diosnikipa leyninkunata alli yachaq nunakunam kayänan. Y pï nunapis Diospa leyninkunata mana musyaptinqa qamkunam yachatsiyänëki.+
26 Diosnikipa Leyninta y gobernanti mandakunqanta pï nunapis mana cäsukuptinqa, tsë höram wanutsiyänan o markampita qarquyänan o multata pagatsiyänan o carcelatsiyänan”.
27 ¡Unë kastäkunapa Diosnin Jehovä alabashqa këkullätsun! Teyta Jehovämi gobernantita pensaratsirqan Jerusalenchö templunta shumaqta tikratsinampaq.+
28 Teyta Diosmi alläpa kuyakoq karnin yanapamashqa.+ Tsëmi Pë munaptin gobernantipis, consejaqnin nunakunapis+ y dirigentikunapis yanapayämashqa. Teyta Jehovä yanapamaptinmi mana mantsëpa Israelchö wakin mandakoqkunata qayatsirqä Jerusalenta ëwayänäpaq.
Nötakuna
^ Tsë jutiqa, ‘yanapakoq’ ninanmi.
^ O “netineukunapis”.
^ Esdras 7:12-26 textutaqa arameu idiömachömi qellqayarqan.
^ Kënöpis niyanmi: riu.
^ O “inti o rupay jeqanan lädunchö”.
^ Hebreu idiömachöqa “100 bätus” ninmi. 1 bätuqa 22 litrusmi karqan. Rikäri “Masllata musyanapaq” neqchö B14 kaqta.
^ Hebreu idiömachöqa “100 bätus” ninmi. 1 bätuqa 22 litrusmi karqan. Rikäri “Masllata musyanapaq” neqchö B14 kaqta.
^ Hebreu idiömachöqa “100 cörus” ninmi. Rikäri “Masllata musyanapaq” neqchö B14 kaqta.
^ Hebreu idiömachöqa “100 talentus” ninmi. 1 talentuqa 34,2 kïlusmi karqan. Rikäri “Masllata musyanapaq” neqchö B14 kaqta.
^ Hebreu idiömachöqa kima cläsi impuestupaqmi parlan: cada nuna derëchunta paganqan impuestupaq, imatapis rantir pagayanqan impuestupaq y viajërukuna pagakuyanqan impuestupaq.
^ O “netineukunata”.
^ Kënöpis niyanmi: riu.
^ O “inti o rupay jeqanan lädunchö”.
