Apocalipsis 6:1-17
-
Orqu Üsha punta joqta sëllukunata kichan (1-17)
-
Yuraq cawallun montashqa venceq kaq (1, 2)
-
Nina color cawalluta montarëkaq yamë këta ushakätsin (3, 4)
-
Yana cawalluta montarëkaq mallaqëta apamun (5, 6)
-
Oqi color cawalluta montarëkaqpa jutinqa Wanuymi (7, 8)
-
Wanutsiyanqan kaqkunapa yawarninta altar jawanchö rikan (9-11)
-
Alläpa fuerti terremötu (12-17)
-
6 Orqu* Üshatam rikarqä+ qanchis sëllukunapita juk kaqta kichaqta,+ y chuskun querubinkunapita juknin kaqtam+ räyu pashtaqnö fuertipa, “¡yarquy!” neqta wiyarqä.
2 Tsë höram yuraq cawalluta rikarqä.+ Tsë cawalluta montarëkaqqa flechakunantam këkätsirqan. Corönatam chaskirqan,+ y vencirirmi vencir ushaq yarqurqan.+
3 Orqu* Üsha ishkë kaq sëlluta kichariptinnam, ishkë kaq querubinta,+ “¡yarquy!” neqta wiyarqä.
4 Tsënam nina color cawallu yarqaramurqan. Tsë cawalluta montarëkaqqa patsachö nunakuna wanutsinakuyänampaqmi, patsapita yamë këta ushakätsinampaq autoridäta y jatun espädata chaskirqan.+
5 Orqu* Üsha kima kaq sëlluta kichariptinnam,+ kima kaq querubinta, “¡yarquy!” neqta wiyarqä.+ Tsënam yana cawalluta rikarqä. Tsë cawalluta montarëkaqqa makinchömi balanzata katsirqan.
6 Chuskun querubinkunapa chowpinkunapita* parlëkaqnö kënö ninqantam wiyarqan: “Juk kïlu* trïguta juk denariuchö,*+ y kima kïlu* cebädata juk denariuchö; y ama aceiti de olïvata ni vïnuta lluta perditsiyëtsu”.+
7 Orqu* Üsha chusku kaq sëlluta kichariptinnam, chusku kaq querubinta,+ “¡yarquy!” neqta wiyarqä.
8 Tsënam oqi color cawalluta rikarqä. Tsë cawalluta montarëkaqpa jutinqa Wanuymi karqan, y Sepultüranam* qepanta ëwëkarqan. Y jatun espädawan, mallaqëwan,+ wanutsikoq qeshyawan y patsachö chukaru animalkunawan, patsachö nunakunapita chusku kaq partita wanutsinampaqmi autoridäta chaskirqan.+
9 Orqu* Üsha pitsqa kaq sëlluta kichariptinnam, Teyta Diospa palabranta cäsukuyanqanrëkur y willakur kayanqanrëkur+ wanutsiyanqan+ kaqkunapa yawarninta* altar jawanchö* rikarqä.+
10 Pëkunaqa fuertipam kënö niyaq: “Limpiu y rasumpa kaq Llapanta Gobernaq Señor,+ ¿imëyaqtan patsachö kawaq nunakunata juzganëkipaq y yawarnïkunapita vengakunëkipaq shuyaranki?”.+
11 Cada ünum largu yuraq röpata chaskiyarqan.+ Y sirwipakoq mayinkuna y pëkunanölla wanuyänampaqna këkaq wawqinkuna completashqa kayanqanyaqmi, wallka tiempullana shuyäriyänampaq niyarqan.+
12 Y Orqu* Üsha joqta kaq sëlluta kichanqantam rikarqä. Tsënam alläpa fuerti terremötu karqan, intipis o rupaypis millwapita* rurashqa chukru tëlanömi yana tikrarirqan, y killapis yawarnömi puka tikrarirqan,+
13 y fuerti vientu kuyutsiptin manaraq poqushqa hïguskuna hïgus plantapita jeqayanqannömi, ciëluchö estrëllakunapis patsaman jeqarkayämurqan.
14 Ciëlupis röllunö wankukarmi illakärirqan,+ y llapan jirkakuna y llapan islakunam, sitiunkunapita kuyuriyarqan.+
15 Tsënam patsachö gobernaqkuna, alli carguyoq nunakuna, soldädukunapa mandaqninkuna, rïcu kaqkuna, puëdeq kaqkuna, llapan sirwipakoq kaqkuna y llapan libri kaqkuna machëkunaman y jirkakunachö qaqakunaman qeshpir ëwakuyarqan.+
16 Y kutin kutinmi jirkakunata y qaqakunata kënö niyan: “Janäkunaman jeqarkayämuy,+ y gobernar täkunachö tëkaqpa rikënimpita+ y Orqu* Üshapa cölerampita tsapëkayämë.+
17 Pëkuna cölerakuyanqan alläpa mantsëpaq junaqmi chämushqa,+ y ¿piraq shëkar* këta puëdinman?”.+
Nötakuna
^ Kënöpis niyanmi: Mächu.
^ Kënöpis niyanmi: Mächu.
^ Kënöpis niyanmi: Mächu.
^ Kënöpis niyanmi: pullanninkunapita.
^ O “litru; quënici”. Rikäri “Masllata musyanapaq” neqchö B14 kaqta.
^ Tsëqa plätapita Röma qellëmi karqan, y juk junaqchömi ganayaq. Rikäri “Masllata musyanapaq” neqchö B14 kaqta.
^ O “litru”.
^ Kënöpis niyanmi: Mächu.
^ O “Hädesnam”. Rikäri “Bibliachö palabrakunata entiendinapaq” neqta.
^ Kënöpis niyanmi: Mächu.
^ O “almankunata”. Tsënö nirqa, capazchi kawëta rikätsikoq altarchö jicharëkaq yawarpaq parlëkan. Rikäri “Bibliachö palabrakunata entiendinapaq” neqchö “Alma” neqta.
^ Kënöpis niyanmi: qopinchö.
^ Capazchi cabrapa millwampita.
^ Kënöpis niyanmi: Mächu.
^ Kënöpis niyanmi: Mächu.
^ Kënöpis niyanmi: ichirëkar.
