Apocalipsis 2:1-29
2 Ëfesu congregacionchö+ angelman këta qellqë:+ derëcha makinchö qanchis estrëllakunata katseq y örupita qanchis candelabrukunapa chowpinchö* purikaqmi këta nin:+
2 ‘Musyämi llapan ruranqëkita, alli trabajanqëkita y alli tsarakunqëkita. Musyämi mana alli nunakunata mana chaskinqëkita, y mana apostol këkar apostol+ kayanqanta neqkunata pruëbaman churar, ulikuyanqanta o llullakuyanqanta musyanqëkita.
3 Manam tsëllatsu, alli tsarakurmi këkanki, y jutïrëkurmi imëkata pasarpis alli tsarakurqunki,+ y manam kallpannaqtsu tikrarqunki.+
4 Tsënö kaptimpis, këchö pishipanqëkitam rikä: manam qallananchönönatsu kuyakoq kanki.
5 Tsëmi imanö këkar ishkinqëkita yarpar arrepentikuy,+ y qallananchö ruranqëkikunata rurë. Tsëta mana ruraptiki y mana arrepentikuptikiqa,+ qamman shamurmi candelabruykita sitiumpita jipiskishaq.+
6 Tsënö kaptimpis, këchömi sïqa alli këkanki: noqa chikinqänöllam Nicolaspa grüpunchö* kaqkuna+ rurayanqanta chikinki.
7 Wiyakuyta munaqqa, congregacionchö kaqkunata espïritu kënö ninqanta wiyakutsun:+ venceq kaqqa,+ noqa permitiptïmi Teyta Diospa Shumaq Patsanchö kawatsikoq planta wayunqanta mikunqa’.+
8 Esmirna congregacionchö angelman këta qellqë: Punta kaq y Ultimu kaq,+ y wanushqa këkanqampita kawarimoq kaqmi këta nin:+
9 ‘Musyämi rikënïchö imëkayoq karpis, imëkata sufrinqëkita y waktsa kanqëkita.+ Musyämi mana judïu këkar judïu kayanqanta neqkuna ofendiyäshurniki niyanqanta; pëkunaqa Satanaspa nunankunam kayan.+
10 Ama mantsëtsu ichikllachöna sufrinëkipaq kaqkunata.+ Diabluqa probashqa kayänëkipaqmi wakinnikita prësuyäshurniki sïguinqa, y chunka junaqmi imëkata rurar sufritsiyäshunki. Wanunqëkiyaq alli tsarakuy, y noqapitam kawë premiuta* chaskinki.+
11 Wiyakuyta munaqqa, congregacionchö kaqkunata espïritu kënö ninqanta wiyakutsun:+ venceq kaqtaqa,+ manam ishkë kaq wanuyqa imëpis imananqatsu’.+
12 Pergamu congregacionchö angelman këta qellqë: ishkan lädupa alli afilashqa jatun puntash espädata katseqmi këta nin:+
13 ‘Musyämi Satanaspa gobernar täkunan këkanqanchö kawanqëkita. Tsënö kaptimpis, manam dejamarqunkitsu.+ Manam tsëllatsu, confiakuypaq sirwimaqnï Antïpas+ kawanqan witsampis, manam negarqunkitsu noqaman markäkunqëkita o yärakunqëkita.+ Pëtaqa Satanas kawanqanchömi puntëkikunachö wanutsiyarqan.+
14 Tsënö kaptimpis, këchö pishipanqëkitam rikä: Balaam yachatsikunqanta+ väleqpaq churaqkunatam qamchö katsinki. Balaamqa santukunapaq apayanqan ëtsata mikuyänampaq y oqllanakur melanëpaqkunata rurayänampaqmi,*+ israelïtakunata tentanampaq* Balacta yachatsirqan.+
15 Tsënöllam Nicolaspa grüpunchö* kaqkuna yachatsikuyanqanta väleqpaq churaqkunatapis qamchö katsinki.+
16 Tsëmi arrepentikuy. Mana arrepentikuptikiqa, ichikllachöna qamman shamurmi, shimïpita yarqoq jatun espädawan pëkunawan pelyashaq.+
17 Wiyakuyta munaqqa, congregacionchö kaqkunata espïritu kënö ninqanta wiyakutsun:+ venceq kaqtaqa,+ pakarëkaq manätam qarashaq,+ y ichikllan yuraq rumitam entregashaq. Tsë rumichö qellqarëkaq mushoq jutitaqa manam ni pï musyantsu, sinöqa tsë rumita chaskeq kaqllam’.
18 Tiatïra congregacionchö angelman këta qellqë:+ rawrëkaq o lunyëkaq ninanö nawiyoq+ y alliyätsishqa cobrinö chakiyoq Diospa Tsurinmi këta nin:+
19 ‘Musyämi llapan ruranqëkita, kuyakoq kanqëkita, markäkoq o yärakoq kanqëkita, Teyta Diospaq ruranqëkita y alli tsarakunqëkita. Musyämi ultimuta rurëkanqëkikuna qallananchö ruranqëkipita mas kanqanta.
20 Tsënö kaptimpis, këchö pishipanqëkitam rikä: Diospa willakoqnin kanqanta neq Jezabel warmitam consientinki.+ Pëqa oqllanakur melanëpaqkunata rurayänampaq* y santukunapaq apayanqan ëtsata mikuyänampaqmi,+ yachatsikunqanwan sirwimaqnïkunata engañan.
21 Arrepentikunampaqmi tiempu pasananta dejarqä, peru pëqa manam oqllanakur melanëpaqkunata ruranqampita* arrepentikuyta munantsu.
22 Tsëmi qeshyatsir cämarätsinäpaq këkä, y pë ruratsinqampita mana arrepentikuyaptinqa, jukwan* oqllanakoqnö pëwan këkaqkunatapis, imëkata rurarmi sufritsishaq.
23 Pëpa wamrankunatam wanutsikoq qeshyawan wanutsishaq. Tsënömi congregacionkunachö kaqkuna, mana pï musyanqan pensëkunata* y shonqukunata rikaq kanqäta musyayanqa. Y qamkunataqa cada ünutam rurayanqëkimannö pagayashqëki.+
24 Tsënö kaptimpis, qamkunapita Tiatïrachö këkaqkunataqa, awmi, yachatsikunqanta mana qateqkunata, y “Satanaspa pakaraq yachatsikuyninkuna”+ nir reqiyanqanta mana yachakushqa kaqkunataqa këtam nï: “Manam qamkunataqa ima mastapis mañayaqtsu.
25 Peru imanö kaptimpis, chämunqäyaq ama lograyanqëki imëka allikunata oqrayëtsu.+
26 Venceq kaq y ushananyaq mandakunqäta ruraqqa, nacionkunata rikänampaqmi autoridäta chaskinqa,+
27 noqapis Teytäpita autoridäta chaskinqänö. Y fiërru tukruwan castigaptinmi,*+ nunakunaqa allpapita järranö ushakäyanqa.
28 Tsënöllam patsa waraq estrëllatapis entregashaq.+
29 Wiyakuyta munaqqa, congregacionkunachö kaqkunata espïritu ninqanta wiyakutsun”’.
Nötakuna
^ Kënöpis niyanmi: pullanninchö.
^ O “sectanchö”.
^ Griëgu idiömachöqa “kawë corönata” ninmi.
^ Rikäri “Bibliachö palabrakunata entiendinapaq” neqta.
^ O “israelïtakunapa puntanman trompizatsikoq rumita churanampaq”.
^ O “sectanchö”.
^ Rikäri “Bibliachö palabrakunata entiendinapaq” neqta.
^ Griëgu idiömachö: pornëia. Rikäri “Bibliachö palabrakunata entiendinapaq” neqta.
^ O “mana majankunawan”.
^ O “shonqu rurinchö ima kanqanta”. Griëgu idiömachöqa “riñonninta” ninmi.
^ O “gobernaptinmi”.
