Romänus 16:1-27
16 Cencrëaschö këkaq congregacionchö sirweq panintsik Fëbitam qamkunaman mandëkämü,+
2 tsënöpa creikoq mayintsikkunata* imëpis chaskinqantsiknö Señorpa jutinchö kushishqa chaskiyänëkipaq, y imatapis wananqanchö* yanapayänëkipaq.+ Pëpis pï mëtam yanapashqa y noqatapis yanapamashqam.
3 Priscata y Äquilata+ saludëkuyë, pëkunaqa Cristu Jesuspaq trabajaq mayïkunam kayan.
4 Pëkunaqa noqarëkurmi vïdankunata peligruman churayashqa.+ Noqapis y juk nacion congregacionkunachö kaqkunapis pëkunataqa alläpam agradecikuyä.
5 Tsënölla pëkunapa wayinchö juntakaqkunatapis saludëkuyë.+ Kuyë Epënetuta saludëkuyë, pëqa Asiachö Cristuman puntata creikoqkunapitam.
6 Marïata saludëkuyë, pëqa qamkunarëkurmi alli trabajashqa.
7 Noqawan prësu kashqa kastäkuna Andrönicuta y Juniasta saludëkuyë,+ pëkunaqa noqapitapis mas tiempupam Cristupa qateqnin kayashqa, y pëkunataqa apostolkunapis allim reqiyan.
8 Kuyë wawqï Ampliätuta saludëkuyë, pëpis Señorpa qateqninmi.
9 Cristuta sirwinqantsikchö yanapakoq mayintsik Urbänuta, y kuyë Estäquista saludëkuyë.
10 Cristupa rikëninchö alli këkaq Apëlista saludëkuyë. Aristöbulupa wayinchö kawaqkunata saludëkuyë.
11 Kastä Herodionta saludëkuyë. Narcïsupa wayinchö Señorman creikoqkunata saludëkuyë.
12 Trifënata y Trifösata saludëkuyë, tsë warmikunaqa Señorpaqmi gänas gänaslla trabajëkäyan. Kuyë panintsik Persidata saludëkuyë, pëqa Señorpa kaqchömi alli trabajashqa.
13 Señorta alli sirweq Rüfuta y mamäninta saludëkuyë, pëqa noqapapis mamänï cuentam.
14 Asincrituta, Flegontita, Hermesta, Patröbasta, Hermasta y pëkunawan këkaq wawqikunata y panikunata saludëkuyë.
15 Filöloguta y Juliata, Nerëuta y paninta, Olimpasta y pëkunawan këkaq wawqikunata y panikunata* saludëkuyë.
16 Jukniki juknikikuna limpiu shonquykikunawan cärachö mutsar saludanakuyë. Llapan congregacionkunachö këkaq Cristupa qateqninkunam qamkunata saludayäshunki.
17 Wawqikuna y panikuna, kananqa rakikätsikoqkunapita y wakinkunata creiyanqanta dejatseqkunapita cuidakuyänëkipaqmi rogayaq. Tsëkunaqa yachakuyanqëkipa contranmi këkan, tsëmi pëkunawanqa juntakuyëtsu.+
18 Tsënö nunakunaqa manam Señornintsik Cristupa sirweqnintsu kayan, sinöqa munëninkunapa* sirweqninkunam kayan, y yachëllapa parlar y alabaparmi mana maliciaq shonquyoqkunata engañayan.
19 Qamkuna cäsukoq kayanqëkitaqa llapan nunakunam rikäyashqa, tsëmi qamkunarëkur alläpa kushikü. Tsënö kaptimpis, alli kaqta rurayänëkipaq yachaq kayänëkita, peru mana allikuna rurëpitaqa culpannaq kayänëkitam munä.+
20 Ichikllachönam yamë kanapaq yanapamaqnintsik Teyta Diosqa, Satanasta ushakätsiyänëkipaq+ autoridäyoq kayänëkita permitinqa. Señornintsik Jesus qamkunawan imëpis alläpa alli këkutsun.
21 Yanapamaqnï Timoteum saludayäshunki. Tsënöllam kastä Luciu, Jason y Sosïpatrupis saludayäshunki.+
22 Noqa kë cartata qellqamoq Tercium, Señorpa jutinchö saludayaq.
23 Noqata y congregacionchö kaqkunata posadatsiyämaq Gäyum+ saludayäshunki. Markachö tesorëru Erastu y Cuartu jutiyoq wawqinmi saludayäshunki.
24 *
25 Noqa willakunqä alli noticiakuna y Jesucristupita willakuyanqanqa, Teyta Dios alli tsarakoqta tikratsiyäshuynikita puëdinqantam rikätsikun. Tsë atska tiempupa pakarätsinqan sagrädu noticiatam,+ Teyta Diosqa sirweqninkunata musyatsishqa.
26 Awmi, kananqa musyëmi tikrashqa, y imëyaqpis kawaq Dios mandakunqannömi, llapan nacion nunakuna pëman markäkur o yärakur cäsukoq kayänampaq, Teyta Diospa Palabranchö puntallapitana willakunqanwan llapan nacion nunakuna musyayashqa.
27 Wakimpitapis mas yachaq Teyta Dios,+ Jesucristurëkur imëyaqpis alabashqa katsun. Tsënö kallätsun.*
Nötakuna
^ Griëgu idiömachöqa “limpiu nunakunata” ninmi.
^ Kënöpis niyanmi: necesitanqanchö.
^ Griëgu idiömachöqa “limpiu nunakunata” ninmi.
^ O “pachankunapa”.
^ O “Amen”.
