Lücas 5:1-39
5 Juk kutim Jesusqa Genesaret+ qocha* kuchunchö yachatsikur shëkarqan,* y mëtsikaq nunakunam Diospa palabranta wiyayänampaq lädunman juntakäyarqan.
2 Qocha kuchunchömi ishkë barcukunata rikarqan, y pescaqkunaqa barcunkunapita yarqurmi mällankunata taqshar këkäyarqan.+
3 Simonpa barcunman yëkurirmi qocha kuchumpita ichik mas ruriman yëkatsinampaq nirqan, y jamëkurmi tsëchö mëtsika nunakunata barcupita yachatsir qallëkurqan.
4 Parlar usharirnam Simonta, “mas hondu kaqman yëkur pescayänëkipaq mällëkikunata jitayë” nirqan.
5 Tsënam Simonqa kënö nirqan: “Maestru, entëru paqasmi afanakuyarqö, y manam imatapis pescayarqötsu,+ peru qam nimaptikim mällakunata jitashaq”.
6 Y mällankunata jitarkur mëtsika pescädukunata pescayaptinmi mällankunapis rachikar qallëkurqan.+
7 Tsëmi juknin barcuchö këkaq pescaq mayinkunata yanapaq ëwayänampaq qemllayarqan. Tsënam pëkunaqa ëwayarqan, y ishkan barcu junta pescädukuna kaptinmi barcunkunaqa hundikëtapis munarqan.
8 Tsëta rikëkurmi Simon Pëdruqa Jesuspa puntanman qonqurikuykur kënö nirqan: “Noqapita witikullë Teytë, noqaqa jutsa* ruraqmi kallä”.
9 Mëtsika pescäduta pescashqa karmi, Pëdru y pëwan këkaqkunaqa alläpa espantakur mantsakashqa këkäyarqan.
10 Tsënöllam Simonwan trabajaq Zebedeupa+ tsurinkuna Santiäguwan Juanpis këkäyarqan. Peru Jesusqa Simontam kënö nirqan: “Ama mantsakënatsu. Kanampitaqa nunakunatanam pescanki”.*+
11 Tsëmi barcunkunata qocha kuchunman kutïkatsir, llapanta dejëkur Jesuspa qepanta ëwakuyarqan.+
12 Juk kutinam juk markachö këkaptin, lepra qeshyayoq nuna tsëchö këkarqan, y Jesusta rikëkurmi puntanman qonqurikuykur, “Teytë, noqaqa musyämi qam munarninqa alliyätsimëta* puëdinqëkita” nir rogakurqan.+
13 Tsënam Jesusqa yatëkur, “¡alliyänëkita munämi!” nirqan. Y tsë höram lepra qeshyan ushakärirqan.+
14 Tsëpitanam tsë nunata mandarqan pitapis mana willanampaq, y kënöpis nirqanmi: “Alliyanqëkita musyayänampaq sacerdötikunaman ëwë, y limpiu kanëkipaq Moises mandakunqannö qarëta apë”.+
15 Tsënö kaptimpis mëtsëchömi Jesuspaq willakuyanqanta musyariyarqan, y yachatsikunqanta wiyayänampaq y qeshyankunapita alliyätsinampaqmi mëtsika nunakuna pë këkanqanman juntakäyaq.+
16 Peru pëqa tsunyaq sitiukunamanmi imëpis Teyta Diosman mañakoq ëwaq.
17 Tsë witsan juk wayichö yachatsikuykaptinmi, Galilëa y Judëa provinciapa llapan caserïunkunapita y Jerusalenpita shamushqa fariseukuna y Leyta yachatsikoqkuna tsëchö tëkäyarqan. Y qeshyëkaqkunata alliyätsinampaqmi Teyta Jehoväqa* poderninwan Jesusta yanapëkarqan.+
18 Tsëmannam nunakunaqa kuyukuyta mana puëdeq nunata kirmawan apayarqan, y imëkanöpam Jesus këkanqanman yëkatsir puntanman churëta tïrayarqan.+
19 Peru mëtsikaq nunakuna tsëchö kayaptinmi Jesusman yëkatsita puëdiyarqantsu. Tsëmi wayi jananman ëwar wayipa qataraqninta kichëkur, Jesuspa puntanchö këkaq nunakunapa chowpinman* kirmanwan bajatsiyarqan.
20 Tsë nunakuna markäkoq o yärakoq kayanqanta rikëkurmi Jesusqa kuyukuyta mana puëdeq nunata, “amïgu, jutsëkikunapita perdonashqanam kanki” nirqan.+
21 Tsënam Ley qellqaqkuna y fariseukunaqa kënö ninakur qallëkuyarqan: “¿Pitan kë nunaqa tsënö ofendikur parlanampaq? ¿Manaku Dioslla jutsakunataqa* perdonëta puëdin?”.+
22 Jesusqa imata pensëkäyanqanta cuentata qokurmi, “¿imatataq shonquykikunachö pensayanki? nirqan.
23 Mä niyämë, ¿imatan mas fäcil? ¿‘Jutsëkikunapita* perdonashqanam kanki’ niku, o, ‘sharkur puri’ niku?
24 Tsënö kaptimpis, Nunapa Tsurinqa jutsayoqkunata* perdonanampaq carguta chaskinqanta musyayänëkipaqmi...”. Tsënö nikarmi kuyukuyta mana puëdeq nunata kënö nirqan: “Noqam qamta neq: sharkuy, kirmëkita aparkur wayikita ëwakuy”.+
25 Tsë höram tsë nunaqa llapankuna rikëkäyaptin jitaranqan kirmanta aparkur, Teyta Diosta alabar wayinta ëwakurqan.
26 Tsënam llapankuna alläpa espantakur Teyta Diosta alabayarqan, y alläpa mantsakarmi, “¡kananqa imëka espantëpaqkunatam rikarquntsik!” niyarqan.
27 Tsëpita ëwakuykarnam Levï jutiyoq impuestu cobraq nunata, impuestu cobrakuyänan wayichö tëkaqta rikarqan, tsënam Jesusqa, “qatimaqnï kë” nirqan.+
28 Tsënam pëqa llapanta dejëkurnin sharkur qepanta ëwarqan.
29 Tsëpitanam Levïqa Jesuspaq mëtsika mikuyta wayinchö ruratsirqan, y atskaq impuestu cobraqkuna y juk nunakunam pëkunawan mikur këkäyarqan.+
30 Tsëmi fariseukuna y tsë grüpupita Ley qellqaqkunaqa quejakur Jesuspa qateqninkunata kënö niyarqan: “¿Imanirtan qamkunaqa impuestu cobraqkunawan y jutsata* ruraqkunawan mikur y upur kayanki?”.+
31 Tsëta rikarnam Jesusqa nirqan: “Sänu këkaqkunaqa manam doctorta wanayantsu,* peru qeshyëkaqkunam sïqa.+
32 Noqaqa manam allita ruraqkunarëkurtsu shamurqö, sinöqa jutsata* ruraqkuna arrepentikuyänampaqmi”.+
33 Pëkunam niyarqan: “Juanpa qateqninkunaqa imëpis ayunayanmi y Diosmanmi rogakuyan, y fariseukunapa qateqninkunapis tsënöllam rurayan, peru qamta qatiräyäshoqnikikunaqa mikurtaq y upurtaq kakuyan”.+
34 Tsënam Jesusqa kënö nirqan: “Noviu pëkunawanraq këkaptinqa, manam noviupa amïgunkunata ayunatsita puëdiyankitsu, ¿aw?
35 Peru noviu pëkunawan manana kaptinmi sïqa,+ llakikur ayunayanqa”.+
36 Tsëpitanam juk igualatsikuywan pëkunata kënö yachatsirqan: “Manam pillapis mushoq janan röpanta ruturir makwa röpata remendanmantsu, tsëta ruraptinqa, mushoqwan remendanqan qentikarmi makwa röpata rachiskatsinqa, y mushoq röpapita remienduqa manam makwa röpachö shumaqtsu rikakun.+
37 Tsënöllam llullu vïnutapis makwa qara porongukunamantsu winayan, pillapis tsëta ruraptinqa, qara porongukuna pashtarmi imapaqpis väliyanmannatsu, y vïnupis jichakärinmanmi.
38 Tsëpa rantinqa, llullu vïnutaqa mushoq qara porongumanmi winayänan.
39 Pï nunapis poqu vïnuta upurkurqa, ‘poqu kaq vïnum mas alliqa’ nirmi llullu vïnutaqa upuyta munannatsu”.
Nötakuna
^ Kënöpis niyanmi: ichirëkarqan.
^ Tsënö nirqa, Galilëa qochapaqmi parlëkan.
^ Kënöpis niyanmi: pecädu.
^ O “kawëkaqta pescanki”.
^ Griëgu idiömachöqa “limpiamëta” ninmi.
^ Kënöpis niyanmi: pullanninman.
^ Kënöpis niyanmi: pecädukunataqa.
^ Kënöpis niyanmi: Pecäduykikunapita.
^ Kënöpis niyanmi: pecäduyoqkunata.
^ Kënöpis niyanmi: pecäduta.
^ Kënöpis niyanmi: necesitäyantsu.
^ Kënöpis niyanmi: pecäduta.
