Lücas 22:1-71
-
Jesusta wanutsiyänampaq sacerdötikuna yachatsinakuyan (1-6)
-
Ultimu Pascua Fiestapaq alistapakuyan (7-13)
-
Señorpa Cënanta patsätsin (14-20)
-
“Traicionamaqnïqa mësachömi noqawan këkan” (21-23)
-
Mëqan mas alli kanqampaq fuertipa discutiyan (24-27)
-
Gobiernuchö mandakuyänampaq ruranqan conträtu (28-30)
-
Pëdru neganampaq kaqta Jesus willakun (31-34)
-
Alistakuyänampaq; ishkë espäda (35-38)
-
Olïvus jirkachö Diosman Jesus mañakun (39-46)
-
Jesusta prësuyan (47-53)
-
Jesusta Pëdru negan (54-62)
-
Jesuspita burlakuyan (63-65)
-
Judïukunapa Jatun Cortinchö Jesusta juzgayan (66-71)
22 Ichikllachönam Pascua niyanqan Levadürannaq Tantata Mikuyänan Fiesta kanan karqan.+
2 Y mandakoq sacerdötikuna y Ley qellqaqkunaqa, nunakunata mantsarmi,+ pëta imanö wanutsiyänan mas alli kanqanman pensëkäyarqan.+
3 Tsënam Satanasqa, Iscariöti niyanqan Jüdaspa shonqunman yëkurqan, pëqa döci apostolkunapita juk kaqmi karqan.+
4 Pëmi mandakoq sacerdötikunaman y templuchö guardiakunapa mandaqninman ëwar, Jesusta imanö entreganampaq* kaqta pëkunawan parlarqan.+
5 Tsënam pëkunaqa alläpa kushikur qellëta* pagayänampaq äniyarqan.+
6 Y pëqa acuerdum karqan, y mëtsika nunakuna mana kayanqan höra Jesusta traicionanampaq imë mas alli kanampaq kaqtam pensarqan.
7 Tsëpitanam Levadürannaq Tantata Mikuyänan Fiesta qallëkurqan, tsë junaqqa Pascua Fiestachö mikuyänan animaltam pishtayaq.+
8 Tsëmi Jesusqa Pëdrutawan Juanta kënö nir mandarqan: “Ëwar Pascua Fiestachö mikunapaq mikuyta alistayë”.+
9 Tsënam pëkunaqa, “¿mëchö alistayämunätataq munanki?” nir tapuyarqan.
10 Pënam nirqan: “Rikäyë, markaman yëkurmi jatun cantaruchö yakuta apëkaq nunawan tinkuyanki. Pëpa qepanta ëwar yëkunqan wayiman yëkuyanki.+
11 Y wayiyoqta kënö niyanki: ‘Maestrum këta nishunki: “¿Mëchötan invitädukunapaq cuartu këkan, qatimaqnïkunawan Pascua mikuyta tsëchö mikunäpaq?”’.
12 Tsënam altuschö wananqantsikwan* listu këkaq jatun cuartuta rikätsiyäshunki. Tsëchö Pascua mikuyta mikunapaq alistapakuyanki”.
13 Tsënam pëkunaqa ëwar llapantapis pë ninqantanölla tariyarqan, y Pascua Fiestapaqmi alistapakuyarqan.
14 Mikuyänan höranam apostolninkunawan juntu mësaman jamakurqan.+
15 Pëkunatam kënö nirqan: “Manaraq sufrirmi, kë Pascua Fiestachö qamkunawan mikuyta alläpa munarqö...;
16 Qamkunatam këta nï:* Diospa Gobiernunchö llapan cumplikanqanyaqqa,* manam këta yapë mikushaqtsu”.
17 Y vïnuyoq cöpata aptarkur Diosta agradecikuykurmi kënö nirqan: “Jukniki jukniki makyanakur kë cöpapita upuyë.
18 Qamkunatam këta nï,* kanampitaqa Teyta Diospa Gobiernun chämunqanyaqmi vïnutaqa upushaqnatsu”.
19 Tsëpitanam Jesusqa tantata aptarkur+ Teyta Diosta agradecikuskir pakirirqan, y qateqninkunatam kënö nir qararqan: “Këqa, qamkunarëkur entreganäpaq+ kaq cuerpü cuentam.+ Noqata yarpäyämarnï këta rurar sïguiyë”.+
20 Cenar ushariyaptinnam cöpawampis tsënölla rurarqan, y pëkunatam kënö nirqan: “Kë cöpachö vïnuqa yawarnï välitsinqan+ mushoq acuerdu cuentam,+ y qamkunarëkurmi entregashqa kanqa.+
21 Peru rikäyë, traicionamaqnïqa mësachömi noqawan këkan.+
22 Rasunmi, Nunapa Tsurinqa dispunishqana kanqannömi dejariyäshunki,+ peru ¡allaw, pëta traicionaq nuna!”.+
23 Tsëmi kikinkunapura discutiyarqan pëkunapita mëqan ichikllachöna tsëta ruranampaq kaqta.+
24 Tsëpitanam pëkunapita mëqan mas alli kanqampaq fuertipa discutir qallëkuyarqan.+
25 Tsënam Jesusqa nirqan: “Nacionkunata gobernaqkunaqa munayanqannömi nunakunata gobernayan, y nunakunata mandädunchö katseq autoridäkunataqa, wakinkunata yanapaqkuna nirmi reqiyan.+
26 Tsënö kaptimpis, qamkunaqa manam tsënötsu kayänëki.+ Tsëpa rantinqa, mas reqishqa kaqqa, mas jövin kaqnö katsun,+ y dirigeq kaqqa, sirwipakoqnö katsun.
27 ¿Mëqantan mas väleq? ¿Mikoq kaq, o sirweq kaqku? ¿Manaku mikoq kaq? Tsënö kaptimpis, noqaqa sirwipakoqnömi qamkunachö këkä.+
28 Qamkunaqa imëkata pasanqächömi noqawan këkäyarqunki.+
29 Tsëmi Teytä noqawan acuerduta ruranqannölla, juk gobiernuchö mandakuyänëkipaq noqapis qamkunawan acuerduta rurä,+
30 Gobiernüchö noqawan juntu mësächö mikur y upur kayänëkipaq,+ y gobernar täkunaman jamëkur,+ Israelpa döci kastankunata juzgayänëkipaq.+
31 Simon, Simon, trïgupita päjata rakeqnömi Satanasqa llapëkita probayäshuynikita munan.+
32 Peru noqaqa markäkoq o yärakoq këta mana dejanëkipaqmi qampaq rogakurqö.+ Arrepentikurirqa, creikoq mayikikunata* yanapanki”.+
33 Tsënam pëqa, “Teytë, noqaqa listum këkä qamtawan juntu prësuyämänampaq y wanutsiyämänampaqpis”+ nirqan.
34 Peru pëqa kënömi nirqan: “Pëdru, qamtam këta neq, kananmi kima kuti negaramaptiki gällu cantanqa”.+
35 Y kënöpis pëkunata nirqanmi: “Qellëta y mirkapa* puritsina bolsata, y llanqita mana apayänëkipaq mandaptïqa,+ manam imëkikunapis pishirqantsu, ¿aw?”. Tsënam pëkunaqa, “manam” niyarqan.
36 Tsëpitanam kënö nirqan: “Kananqa, qellë puritsina bolsëkikuna kaptinqa, tsëta apayë; tsënölla mirkapata* puritsina bolsëkikunatapis apayë, y espädëkikuna mana kaptinqa, janan kaq röpëkikunata rantikuykur espädata rantiyë.
37 Qamkunatam këta nï,* kënö qellqarëkaqmi noqachö cumplikanqa: ‘Mana allita ruraq kanqantam niyarqan’.+ Awmi, tsëmi noqachö cumplikëkan”.+
38 Tsënam pëkunaqa, “Teytë, rikë, këchömi ishkë espädakuna kan” niyarqan. Pënam, “tsëllapaqmi kanqa” nir contestarqan.
39 Yarqurirnam imëpis ruranqannölla Olïvus jirkaman ëwarqan, y qateqninkunapis qepantam ëwayarqan.+
40 Tsë sitiuman chäriyaptinnam, “tentacionman mana ishkiyänëkipaq këchö mañakur këkäyë”+ nirqan.
41 Y pëkuna këkäyanqampita mas washaman* ëwëkurmi, qonqurikuykur mañakur qallëkurqan,
42 kënö nir: “Teytallä, qam munarninqa, noqalläpita kë cöpata pasëkatsillë. Peru ama noqa munanqänöqa katsuntsu, sinöqa qam munanqëkinö kallätsun”.+
43 Tsë höram ciëlupita juk angel yurirkur kallpayoq kanampaq yanaparqan.+
44 Tsënö kaptimpis, shonqunchö alläpa yarpachakur llapan shonqunwan masraq mañakuptinmi,+ sudornimpis yawarnöraq patsaman shuturqan.
45 Mañakunqampita sharkur qateqninkunaman kutirmi pëkunata tarirqan alläpa llakishqa karnin punuykaqta.+
46 Tsëmi pëqa kënö nirqan: “¿Imanirtan punuykäyanki? Sharkuyë,* y tentacionman mana ishkiyänëkipaq imëpis mañakur këkäyë”.+
47 Manaraq parlar ushaptinmi, mëtsika nunakuna yurirkuyarqan. Döci apostolkunapita Jüdas jutiyoq kaqmi pëkunata pusharqan, y chëkurmi mutsanampaq Jesusman witirqan.+
48 Tsënam Jesusqa, “Jüdas, ¿mutsarku Nunapa Tsurinta traicionanki?” nirqan.
49 Ima pasanampaq kaqta rikëkurnam pëwan këkaqkunaqa, “Teytë, ¿espädawanku tuksikacharkayämü?” niyarqan.
50 Y juk kaqmi, mas mandakoq sacerdötipa sirweqnimpa derëcha kaq rinrinta walluskapurqan.+
51 Tsënam Jesusqa, “ama tsëta rurayëtsu” nirqan. Y yatëkurmi tsë sirweqpa rinrinta alliyäratsirqan.
52 Tsëpitanam Jesusqa pëta asheq ëwaq mandakoq sacerdötikunata, templuchö guardiakunapa mandaqninta y markachö dirigeqkunata kënö nirqan: “¿Suwakoqtanö ashiyämänëkipaqku espädëkikunawan y garrutikikunawan shayämurqunki?+
53 Waran waran templuchö qamkunawan këkaptïpis,+ manam prësuyämarqëkitsu.+ Peru kananmi imatapis rurayänëki höra, y ampi o tsakë* gobernanan höra”.+
54 Tsënam prësurkur mas mandakoq sacerdötipa wayinmanmi apayarqan,+ y Pëdruqa karu qepankunatam qatir ëwarqan.+
55 Pëkunaqa patiu chowpinchö* ninata tsarirkatsirmi llapankuna juntu jamakuyarqan, y Pëdrupis pëkunawanmi jamarëkarqan.+
56 Tsënam juk sirwipakoq warmiqa, nina aktsiranqanchö jamarëkaqta defrenti rikëkur, “kë nunapis pëwanmi pureq” nirqan.
57 Peru Pëdruqa, “warmi, noqaqa manam pëta reqïtsu” nirmi negarqan.
58 Rätunllatanam juk nuna rikëkur, “qampis qateqninmi kanki” nirqan. Peru Pëdruqa, “nuna, noqaqa manam qateqnintsu kä”+ nirqanmi.
59 Juk höranö pasariptinnam, jukna kutin kutin, “¡kë nunapis pëkunawanmi pureq! Galilëapita kanqanqa clärum rikakun” nirqan.
60 Peru Pëdruqa, “nuna, manam musyätsu imapaq parlëkanqëkita” nirqanmi. Y tsë höram, manaraqpis parlar ushaptin gällu cantarirqan.
61 Tsënam Señor tumëkur defrenti rikëkuptin, Pëdruqa Señor kënö ninqanta yarpaskirqan: “Gällu manaraq cantaptinmi, kanan kima kuti negamanki”.+
62 Y waqtaman yarqurmi llakikur alläpa waqarqan.
63 Jesusta täpaq nunakunaqa pëpita burlakurmi+ maqar qallëkuyarqan.+
64 Y cäranta tsaparkurmi, “Diospa willakoqnin karqa, mä niyämë, ¿pitan maqashurqunki?” nir kutin kutin tapuyarqan.
65 Y insultarmi maskunata niyarqan.
66 Patsa waräriptinnam, markachö llapan dirigeqkuna juntakäyarqan. Tsëchömi mandakoq sacerdötikuna y Ley qellqaqkunapis këkäyarqan.+ Pëkunam Judïukunapa Jatun Cortimpa sälanman apëkur Jesusta kënö niyarqan:
67 “Niyämë, ¿Cristuku kanki”.+ Peru pëqa kënömi nirqan: “Niptïpis,* manachi imëpis creiyankimantsu.
68 Y qamkunata imata tapuptïpis, qamkunaqa manachi contestayämankimantsu.
69 Tsënö kaptimpis, kanampitaqa llapanta puëdeq Diospa derëcha lädunchömi+ Nunapa Tsurin tëkanqa”.+
70 Tsënö niptinnam llapankuna, “tsëqa, ¿qamku Diospa Tsurin kanki?” ni tapuyarqan. Tsënam pëqa, “awmi, qamkunam tsënö kanqanta niyanki” nir contestarqan.
71 Tsënö niptinnam pëkunaqa, “¿imapaqnatan mas testïgukunata ashishun? Llapantsikmi kikin ninqanta wiyarquntsik”+ niyarqan.
Nötakuna
^ O “traicionanampaq”.
^ Griëgu idiömachöqa “plätata” ninmi.
^ Kënöpis niyanmi: necesitanqantsikwan.
^ Kënöpis niyanmi: niyaq.
^ O “Pascua Fiesta imëkata rikätsikunqan Diospa Gobiernunchö cumplikanqanyaqqa”.
^ Kënöpis niyanmi: niyaq.
^ O “wawqikikunata”.
^ Kënöpis niyanmi: millkapa.
^ Kënöpis niyanmi: millkapata.
^ Kënöpis niyanmi: niyaq.
^ O “rumita qompayaptin o saqmayaptin chanqanmannö”.
^ Kënöpis niyanmi: Ichïyë.
^ Kënöpis niyanmi: tutapë.
^ Kënöpis niyanmi: pullanninchö.
^ Kënöpis niyanmi: Niyapteqpis.
