Lücas 21:1-38
21 Tsënam ñukirkur* rïcu nunakunata rikarqan qellë winayänan cäjakunaman qellëninkunata winëkäyaqta.+
2 Tsëpitanam waktsa viudata rikarqan ishkë ichikllan y mana alläpa väleq qellëta* winaqta,+
3 y kënömi nirqan: “Noqam qamkunata nï,* kë waktsa viudaqa, wakimpitapis mastam winashqa.+
4 Llapan winaqkunaqa sobrayäpunqantam winëkäyan, peru pëqa, waktsa këkarpis, kawanampaq llapan kapunqantam llapanta winashqa”.+
5 Tsëpitanam shumaq rumikunawan y Teyta Diospaq apayanqan qarëkunawan templu imanö adornashqa këkanqampaq wakinkuna parlëkäyaptin,+
6 kënö nirqan: “Ichikllachönam kë rikëkäyanqëki rumikunaqa perqarëkartsu quedayanqa, sinöqa llapanmi patsachö ushanqa”.+
7 Tsënam kënö nir tapuyarqan: “Maestru, rasumpa kaqchöqa, ¿imëtan tsëkuna pasanqa, y ima señaltan tsëkuna pasanampaqna kaqta rikätsikunqa?”.+
8 Pënam nirqan: “Cuidädu kayanki mana ni pï engañayäshunëkipaq.*+ Atskaqmi jutïchö shamur kënö niyanqa: ‘Noqam pë kä’ o ‘dispunishqa tiempuqa chëkämunnam’. Peru ama pëkunapa qepanta ëwayankitsu.+
9 Guërrakuna kanqanta y nunakuna juntakëkur imëka mana allikunata rurayanqanta* wiyarqa, ama mantsakäyankitsu. Tsëkunaran puntataqa pasanqa, peru manam tsë höratsu ushakë chämunqa”.+
10 Tsëpitanam nirqan: “Juk nacionmi juk nacionwan guërrata ruranqa,+ y juk gobiernum juk gobiernuwan pelyanqa.+
11 Terremötukunam kanqa, y wakchö këchömi mallaqë y muyakoq* qeshyakuna kanqa. Imëka espantëpaqkunam pasanqa, y ciëlupitam jatun señalkuna kanqa.+
12 Peru tsëkuna manaraq pasaptinmi, prësuyäshunki y imëkata rurar sufritsiyäshunki.+ Juzgayäshunëkipaqmi Diosta adorayänan wayikunaman apayäshunki, y carcelatsiyäshunkim. Qatimaqnïkuna kayaptikim gobernadorkunaman y gobernaqkunaman apayäshunki.+
13 Tsëchömi pëkunata noqapita musyatsiyanki.
14 Tsëqa, shonquykikunachö churapakäyë imanö defendikuyänëkipaq kaqta puntallapitana mana yachakuyänëkipaq.+
15 Noqam imata niyänëkipaq kaqta musyayänëkipaq y yachëyoq kanëkipaq yanapashqëki, tsëmi llapan contrëki këkaqkunapis ima nita ni contradeciyäshuynikita puëdiyanqatsu.+
16 Papänikikuna, wawqikikuna, kastëkikuna y amïguykikunam traicionayäshunki, y wakinnikitam wanutsiyäshunki o wañutsiyäshunki.+
17 Qatimaqnïkuna kayaptikim llapan nunakuna chikiyäshunki.+
18 Tsënö kaptimpis, manam juk aqtsëkikunallapis shikwanqatsu.+
19 Alli tsarakurmi vïdëkikunata salvayanki.+
20 Jerusalenpa entëru lädunchö mëtsika soldädukuna këkaqta rikarqa,+ musyayë ichikllachöna ushakänampaq kaqta.+
21 Judëa provinciachö këkarqa jirkakunaman qeshpir ëwakuyanki,+ Jerusalenchö këkarqa yarqur ëwakuyanki, y amänun caserïukunachö këkarqa ama Jerusalenta ëwayankitsu.
22 Tsë junaqkunaqa Teyta Diosmi justiciata ruranqa,* y llapan qellqarëkaqmi cumplikanqa.
23 ¡Allaw tsë witsanchö qeshyaq këkaq y chichikaq* llulluyoq warmikuna!+ Kë kinrëchöqa alläpa sufrimientum kanqa, y këchö nunakunam castigashqa kayanqa.
24 Espädawanmi wanutsir ushayanqa, y llapan nacionkunamanmi prësu apayanqa;+ y nacionkunapaq* dispunishqa tiempu cumplikanqanyaqmi juk nacionkuna* Jerusalenta jarur ushayanqa.+
25 Intichö o rupaychö, killachö y estrëllakunachömi señalkuna kanqa,+ y patsachönam lamar büllaptin y laqcheqsaptin, llapan nacionpita nunakuna alläpa mantsakäyanqa.
26 Ciëluchö kaqkuna kuyutsishqa kayaptinmi, entëru patsaman shamunampaq kaqkunata shuyarar y alläpa mantsakar nunakuna desmayayanqa.
27 Tsënam pukutë jananchö mëtsika poderyoq y chipapäkur shamuykaqta+ Nunapa Tsurinta rikäyanqa.+
28 Peru tsëkuna pasakur qallëkuptinqa, ichikllachöna salvakuyänëkipaq kaqta yarpar, kallpata tsarir valienti kayanki”.*
29 Tsëpitanam juk igualatsikuyta pëkunata nirqan: “Rikäyë hïgus plantata y wakin plantakunatapis.+
30 Tseqllikämunqanta rikarqa, kikikikunam musyayanki ichikllachöna usya witsan qallanampaqna kaqta.
31 Tsënöllam tsëkuna pasakunqanta rikarpis, Diospa Gobiernun chämunampaqna këkanqanta musyayanki.
32 Noqam qamkunata nï,* tsë llapankuna manaraq pasakuptinqa, manam kanan witsan nunakuna imanöpapis wanuyanqatsu.+
33 Ciëluwan patsa ushakaptimpis, ninqäkunaqa manam imëpis ushakanqatsu.+
34 Peru cuidakuyë mëtsikata mikuypaq, mëtsikata upuypaq+ y kë vïdachö imëkapaq shonquykikunachö yarpachakuypita.+ Cuidädu tsëkunapaq yarpachakur këkäyaptiki, tsë junaq illaqpita janëkikunachöna këkanman
35 imëka trampanö.+ Tsë junaqqa entëru patsachö këkaqkunamanmi chämunqa.
36 Tsëmi alkäbu alkäbu këkäyänëki,+ y llapan pasakunampaq kaqpita salvakuyänëkipaq, y Nunapa Tsurimpa puntanchö shëkäyänëkipaq,*+ Teyta Diosman imëpis mañakur këkäyë”.+
37 Awmi, junaqpaqa templuchömi yachatsikoq, peru paqaspaqa tsëpita ëwakurmi Olïvus niyanqan jirkachö posadakoq.
38 Y patsa waräriptinqa, llapan nunakunam yachatsikunqanta wiyaq templuman ëwayaq.
Nötakuna
^ Kënöpis niyanmi: peqanta pallarkur; umanta pallarkur.
^ Griëgu idiömachöqa “2 leptonta” ninmi. Rikäri “Masllata musyanapaq” neqchö B14 kaqta.
^ Kënöpis niyanmi: niyaq.
^ O “mana alliman chätsiyäshunëkipaq”.
^ O “desordinta rurayanqanta”.
^ Kënöpis niyanmi: shukukoq.
^ O “vengakunqa”.
^ Kënöpis niyanmi: chuchuykaq.
^ Tsënö nirqa, judïu nunakunapaqmi parlëkan.
^ Tsënö nirqa, judïu nunakunapaqmi parlëkan.
^ O “sharkur peqëkikunata o umëkikunata pallariyë”.
^ Kënöpis niyanmi: niyaq.
^ Kënöpis niyanmi: ichirëkäyänëkipaq.
