Juëces 18:1-31
18 Tsë witsankunaqa manam Israelchö gobernaq karqantsu.+ Y Danpa+ kastankunaqa manam Israel kastakunachö llapan herenciankunaman yëkushqaraqtsu kayarqan, tsëmi kawakuyänampaq juk sitiuta* ashir purikäyarqan.+
2 Danpa kastankunaqa markakunata rikapakuyänampaq y musyapakuyänampaqmi, Zorä y Estaol+ markakunapita pitsqa valienti ollqukunata kënö nir mandayarqan: “Ëwar markakunata rikapakayämuy”. Tsënam pëkunaqa ëwar, Efrainpa jirkankunaman chäriyarqan, Miquëaspa+ wayin këkanqanman, tsëchömi tsë paqas quedakuyarqan.
3 Miquëaspa wayin lädunchö këkarninmi, levïta jövinpa vozninta wiyaskir reqiriyarqan, tsëmi ëwar kënö tapuyarqan: “¿Pitan këman pushamushurqunki? ¿Këchöqa imatataq ruranki? ¿Imanirtan këchö quedakurqunki?”.
4 Tsënam jövinqa pëpaq Miquëas imakunata ruranqanta willarqan y “sacerdötin kanäpaqmi contratamashqa”+ nirqan.
5 Tsënam pëkunaqa niyarqan: “Teyta Diosta tapuykallämuy kë viäjichö alli o mana alli kayänäpaq kaqta musyayänäpaq”.
6 Tsënam tsë sacerdötiqa nirqan: “Ama yarpachakuyëtsu, tranquïlu ëwakuyë. Jehovä Diosqa kë viäjikikunachö yanapayäshunkim”.
7 Tsënömi pitsqan nunakunaqa viajayarqan, y Läis+ markamanmi chäriyarqan. Tsëchö kawaqkunaqa, Sidon nunakunanömi pï yanapanantapis wanayaqtsu. Mana yarpachakuypam kushishqa kawakuyaq,+ manam pillapis markankunapita duëñu tukuyta munar achäkita ashipaqtsu. Sidon nunakunapitaqa karuchöran kayarqan, y manam juk markachö nunakunawanqa juntakuyaqtsu.
8 Zorä y Estaol+ markakunaman kutiskiyaptinnam, “rikapakur puriyämunqëkichö, ¿imanötan kayämurqunki?” nir tapuyarqan.
9 Pëkunanam kënö niyarqan: “Tsë markachöqa alli chakrakunatam rikäyämurqö. Ëwar tsëchö nunakunata qarqushun. Jinan höra ëwar tsë markapa duëñun tikrashun. Ama qelanäyëtsu.
10 Chëkurqa, tranquïlu kawakuyanqantam rikäshun,+ y mëtsika chakrakunatam tarishun. Imampis mana pisheq markatam Teyta Diosqa entregamarquntsik”.+
11 Tsënam Danpa kastankunaqa Zorä y Estaol+ markakunapita ëwayarqan. Guërrapaq listullanam seiscientus ëwayarqan.
12 Judäman witsarmi Quiryat-Jearim lädunmampa campamentunkuna rurayarqan. Tsëmi Quiryat-Jearim+ markapa inti o rupay jeqanan lädunmampa këkaq sitiutaqa, Mahanë-Dan+ nir kananyaq reqiyan.
13 Tsëpitanam Efrainpa jirkankunapa ëwar Miquëas+ kaqman chäyarqan.
14 Tsënam Läis+ markata rikapakoq ëwashqa pitsqa rikapakoqkunaqa, wakinkunata kënö niyarqan: “¿Musyayarqëkiku kë wayikunachö,* juk tallashqa santu, metalpita juk santu, juk sagrädu mandil y mas santukuna* kanqanta?+ Qamkuna rikäyë imata rurayänëkipaq kaqta”.
15 Tsëmi pëkunaqa tsëchö jamayarqan, y pitsqan rikapakoqkunam, Miquëaspa wayin lädunchö täkoq* levïta+ jövinman chäyarqan imanö këkanqanta tapuyänampaq.
16 Tsëyaqnam Danpa+ kastankunaqa, guërrapaq listullana wayi punkunchö seiscientus shëkäyarqan.*
17 Markata rikapakoq ëwashqa pitsqan rikapakoqkunam+ tallashqa santuta,+ metalpita santuta,+ sagrädu mandilta*+ y mas santukunata apakuyänampaq yëkuyarqan. (Sacerdötiqa+ guërrapaq armayoq seiscientus nunakunawanmi punkuchö shëkarqan*).
18 Miquëaspa wayinman yëkuskirmi tallashqa santuta, metalpita santuta, sagrädu mandilta y mas santukunata apakuyarqan. Tsëmi tsë sacerdötiqa, “¿imatataq rurëkäyanki?” nirqan.
19 Pëkunanam niyarqan: “¡Upälla kë!* Ama imatapis parlamuytsu. Consejamaqnïkuna* y sacerdötïkuna kanëkipaq noqakunawan ëwashun. Qampaqqa imatan mas alli kanman, ¿juk nunapa familianllapaq* sacerdötin këku+ o Israelchö juk kastapaq y juk familiapaq sacerdötin këku?”.+
20 Tsënö niyanqanqa sacerdötipaq allinömi karqan. Tsëmi tallashqa santuta,+ metalpita santuta, sagrädu mandilta y mas santukunata aparkur pëkunawan ëwakurqan.
21 Tsënam Danpa kastankunaqa wamrankunata, animalninkunata y väleq cösasninkunata puntankunaman churarkur ëwakuyarqan.
22 Miquëaspa vecïnunkuna juntakarkur qatipar ëwayänampaqqa, Danpa kastankunaqa Miquëaspa wayimpita karutanam ëwëkäyarqan. Tsënö kaptimpis taripäyarqanmi.
23 Danpa kastankunata fuertipa qayëkuyaptinmi, pëkunaqa Miquëasta niyarqan: “¿Imanankitaq? ¿Imanirtaq tsë llapan nunakunawan shamurqunki?”.
24 Miquëasnam nirqan: “Qamkunam rurakunqä santukunata y sacerdötïtapis apakuyarqunki. Manam imapis quedashqatsu, tsënö këkaptinku ‘¿imanankitaq?’ nir tapuyämanki”.
25 Danpa kastankunanam niyarqan: “Ama noqakunataqa ollqutupäyämëtsu. Tsënö ollqutupäyämaptikiqa, këchö cölerashqa këkaqkunam qamta y familiëkitapis wanuratsiyäshunkiman”.
26 Tsënömi Danpa kastankunaqa ëwakuyarqan. Y mas puëdeq kayanqanta rikarmi Miquëasqa kutikurqan.
27 Miquëas ruratsikunqan santunkunata y sacerdötinta aparkurmi, Läis+ markata ëwakuyarqan. Tsëchö nunakunaqa imamampis mana yarpachakuypam alli kawakuyaq.+ Tsëchö llapan nunakunatam espädawan wanutsiyarqan y tsë markamanmi ninata prendïkuyarqan.
28 Tsë markachö nunakunataqa manam ni pillapis salvarqantsu. Pëkunaqa Sidonpita karuchö këkaq Bet-Rehobpa+ pampanchö kawakurmi, juk marka nunakunawanqa tinkuyaqtsu. Tsëpitanam Danpa kastankunaqa tsë markata yapë sharkatsiyarqan, y tsëchömi kawakur qallëkuyarqan.
29 Tsë markapa unë jutin Läis+ kashqa kaptimpis, pëkunaqa Dan nirmi jutin churayarqan. Danqa+ papäninkunapa jutinmi karqan, y pëqa Israelpa tsurinmi+ karqan.
30 Tsëpitanam Danpa kastankunaqa tallashqa santuta+ tsë markaman churayarqan. Tsëchömi Danpa kastankuna juk markaman prësu apashqa kayanqan junaqyaq, Moisespa tsurin Guersompa+ familiampita Jonatan+ y familiankuna sacerdötinkuna kayarqan.
31 Pëkunaqa Miquëas ruranqan tallashqa santutam tsë markaman churayarqan adorayänampaq. Tsë santuqa tsëchö karqan, Diospa Sagrädu Cäjan Silö markachö+ kanqan witsanmi.
Nötakuna
^ Hebreu idiömachöqa “herenciata” ninmi.
^ Rikäri “Bibliachö palabrakunata entiendinapaq” neqta.
^ Hebreu idiömachöqa “terafimkuna” ninmi. Rikäri “Bibliachö palabrakunata entiendinapaq” neqta.
^ Kënöpis niyanmi: täraq; päraq.
^ Kënöpis niyanmi: ichirëkäyarqan.
^ Hebreu idiömachöqa “efodta” ninmi. Rikäri “Bibliachö palabrakunata entiendinapaq” neqta.
^ Kënöpis niyanmi: ichirëkarqan.
^ Hebreu idiömachöqa “wayinllapaq” ninmi.
^ Hebreu idiömachöqa “Papänïkuna” ninmi.
^ Hebreu idiömachöqa “Shimikiman makikita churë” ninmi.
