Juëces 1:1-36
1 Josuë wanuskiptinnam,+ israelïtakunaqa* Jehovä Diosman mañakur kënö tapuyarqan:+ “¿Mëqäkunatan cananeu nunakunawan pelyayänäpaq puntata ëwayäshaq?”.
2 Jehovä Diosnam, “Judäpa kastankunam puntata ëwayanqa.+ Y noqam ushakätsiyänëkipaq yanapayashqëki” nirqan.
3 Tsënam Judäpa kastankunaqa, wawqin Simeonpa kastankunata niyarqan: “Aku tocamanqan markakunaman ëwar+ tsëchö cananeu nunakunawan pelyashun. Tsëpitanam qamkunata tocayäshunqëki markakunamampis ëwashun”. Tsëmi Simeonpa kastankunaqa Judäpa kastankunawan ëwayarqan.
4 Judäpa kastankuna ëwayaptinmi, cananeu nunakunata y perizïta nunakunata+ venciyänampaq Jehovä Dios yanaparqan. Bëzec sitiuchömi diez mil soldädukunata ushakätsiyarqan.
5 Adoni-Bëzectam, Bëzec sitiuchö tariyarqan, tsëchömi pëwan pelyayarqan, y cananeu+ y perizïta nunakunatam+ ushakätsiyarqan.
6 Adoni-Bëzec qeshpir ëwakuptinnam, taripëkurnin chakimpa y makimpa maman dëdunkunata roqupuyarqan.
7 Tsënam Adoni-Bëzecqa nirqan: “Setenta gobernantikunapa makimpa y chakimpa maman dëdunkunatam roqupurqä, y pëkunam mësäpita shikwaq mikuyta mikuyaq. Pëkunata ruranqänöllam, Diosqa noqatapis kanan ruramashqa”. Tsëpitanam Adoni-Bëzectaqa Jerusalen markata apayarqan+ y tsëchömi wanurqan.
8 Judäpa kastankunaqa, Jerusalen markachö nunakunawanmi pelyayarqan.+ Llapanta vencirmi espädawan wanutsiyarqan. Y Jerusalen markamanmi ninata prendïkuyarqan.
9 Tsëpitanam Judäpa kastankunaqa jirkakunachö, Nëguebchö y Sefelächö cananeu nunakunawan pelyaq ëwayarqan.+
10 Tsënömi Judäpa kastankunaqa Hebron markachö cananeu nunakunawan pelyaq ëwayarqan y Sesäita, Ahimanta y Talmäitam+ venciyarqan (Hebronpa unë jutinqa Quiryat-Arbämi karqan).
11 Tsëpitanam Debir markachö nunakunawan pelyaq ëwayarqan+ (Debir markapa unë jutinqa, Quiryat-Sëfermi+ karqan).
12 Tsënam Calebqa,+ “Quiryat-Sëfer markachö nunakunata ushakätseqtam, Acsä jutiyoq wamrätawan casatsishaq”+ nirqan.
13 Y Quenazpa+ tsurin Otnielmi+ tsë markachö nunakunata ushakätsirqan, tsëmi Calebqa wamran Acsätawan casatsirqan. Quenazqa Calebpa menor wawqinmi karqan.
14 Wayinkunaman kutikarnam, Acsäqa qowan o runan* Otnielta rogarqan Calebta chakrata mañakunampaq. Tsëpitanam Acsäqa montarëkanqan ashnupita bajarirqan.* Y papänin Calebnam, “¿imata munëkanki?” nir tapurqan.
15 Tsënam pëqa nirqan: “Papä, mas chakrallä qarëkamë. Nëguebchö qaramanqëkinölla, Gulot-Mäim kaqtapis qarëkamë”. Tsëmi papänin Calebqa Uma kaq Gulotchö y Ura kaq Gulotchö chakrata rikätsirqan.
16 Moisespa suegrumpa+ familiankunam, quenïta kastakuna,+ palmërakunayoq markapita*+ Judäpa kastankunawan witsäyarqan y Judäpa tsunyaq sitiunmanmi ëwayarqan, tsëqa Arad markapa+ sur kaq lädunmampam karqan. Y tsëchö täkoqkunawanmi* quedakuyarqan.+
17 Peru Judäpa kastankunawan wawqin Simeonpa kastankunaqa, Zefat markachö cananeu nunakunawan pelyaqmi ëwayarqan, y tsë markatapis ushakätsiyarqanmi.+ Tsëmi tsë markataqa Hormä* nir jutin churayarqan.+
18 Tsëpitanam Judäpa kastankunaqa, Gäza+ markapa y llapan sitiunkunapa, Asquelon+ markapa y llapan sitiunkunapa, Ecron+ markapa y llapan sitiunkunapa duëñun tikrayarqan.
19 Jehovä Diosmi Judäpa kastankunata yanaparqan, tsëmi jirkakunachö kawaqkunata llapanta venciyarqan. Y lamar lädun pampakunachö kawaq nunakunataqa manam venciyarqantsu, pëkunapaqa guërrapaq carrëtankunapa ruëdankunachömi jatusaq höcikuna* kaq.+
20 Moises äninqannömi, Calebtaqa+ Hebron markata entregayarqan, y pëmi Anacpa+ kiman tsurinkunata qarqurqan.
21 Peru Benjaminpa kastankunaqa manam Jerusalen markachö kawaq jebuseu nunakunata qarquyarqantsu. Tsëmi jebuseukunaqa Benjaminpa kastankunawan Jerusalenchö kananyaq kawakuyan.+
22 Josëpa familiankunanam+ Betel markaman pelyaq ëwayarqan, y Teyta Jehovämi pëkunata yanaparqan.+
23 Josëpa familiankunaqa, rikapakoqkunatam Betel markaman mandayarqan (tsë markataqa Luz nirmi unëqa reqiyaq).+
24 Tsë rikapakoqkunam tsë markapita juk nuna yarqëkämoqta rikëkur niyarqan: “Kë markaman mëpa yëkuyänäpaq kaqta willayämaptikiqa manam imanäyashqëkitsu”.
25 Tsënam pëqa mëpa yëkuyänampaq kaqta willarqan. Tsëmi Josëpa familiankunaqa tsë markaman espädankunawan pelyaq yëkuyarqan, peru tsë nunatawan familiantaqa ëwakuyänantam dejayarqan.+
26 Tsë nunaqa, hitïta nunakuna täkuyanqanmanmi* ëwakurqan, tsëchömi juk markata sharkatsirqan y Luz nirmi jutin churarqan, kananyaqpis tsënömi reqiyan.
27 Manasespa kastankunaqa manam Bet-Seanpa ni ichik markankunapa, Taanacpa+ ni ichik markankunapa, Dorpa ni ichik markankunapa, Ibleampa ni ichik markankunapa, Meguidöpa ni ichik markankunapa duëñun tikrëta puëdiyarqantsu.+ Cananeu nunakunaqa manam tsë markakunapita yarquyta munayarqantsu.
28 Israelïtakuna mas puëdeq tikrarqa, cananeukunatam esclävunkunaman tikratsiyarqan,+ peru manam llapantaqa ushakätsiyarqantsu.+
29 Efrainpa kastankunapis manam Guëzer markachö kawaq cananeukunata qarquyarqantsu. Cananeukunaqa pëkunawan juntum Guëzerchö kawakuyarqan.+
30 Zabulonpa kastankunaqa manam Quitronchö ni Nahalolchö+ kawaqkunata qarquyarqantsu. Cananeukunaqa pëkunawan juntum kawakuyarqan y esclävunkunam tikrayarqan.+
31 Aserpa kastankunaqa manam Akkö, Sidon,+ Ahlab, Aczib,+ Helbä, Afic,+ ni Rehob+ markakunachö nunakunata qarquyarqantsu.
32 Tsëmi cananeukunata ushakätsita mana puëdir, Aserpa kastankunaqa pëkunawan juntu kawakuyarqan.
33 Neftalïpa kastankunaqa manam Bet-Sëmes ni Bet-Anat+ markakunachö nunakunata qarquyarqantsu, tsëmi cananeukunawan juntu kawakuyarqan.+ Y Bet-Sëmes y Bet-Anat markakunachö nunakunaqa esclävunkunam kayarqan.
34 Amorreu nunakunaqa, manam Danpa kastankunata permitiyarqantsu pampakunaman uräyänanta, tsëmi pëkunaqa jirkakunallachö kawakuyarqan.+
35 Amorreu nunakunaqa Hëres jirkakunachö, Ayalonchö+ y Saalbimchönam+ kawakuyarqan. Peru Josëpa familiankuna puëdeq tikrarqa, amorreukunatam esclävunkunaman tikratsiyarqan.
36 Amorreu nunakunapa markankunaqa, Acrabim+ witsëpita y Sëlapitam witsaq.
Nötakuna
^ Hebreu idiömachöqa “Israelpa tsurinkuna” ninmi.
^ Kënöpis niyanmi: ollqun.
^ O capazchi “ashnuta montarëkarnin cäsuyänampaq paqchirirqan o taqllaskirqan”.
^ Tsënö nirqa, Jericö markapaqmi parlëkan.
^ Kënöpis niyanmi: täraqkunawanmi; päraqkunawanmi.
^ Tsëqa “ushakëman yëkuna” ninanmi.
^ Hebreu idiömachöqa “fiërrupita carrëtakuna” ninmi.
^ Kënöpis niyanmi: täräyanqanmanmi; pärayanqanmanmi.
