Josuë 8:1-35
8 Tsëpitanam Jehovä Diosqa Josuëta kënö nirqan: “Valientim kanëki y manam mantsapakunëkitsu.+ Llapan soldädukunata pusharkur Hai markaman witsë. Hai markata, gobernaqninta, tsëchö kawaqkunata y llapan chakrankunatam qamta entregarqoq.+
2 Jericö markata y gobernaqninta ushakätsinqëkinömi, Hai markata y gobernaqnintapis ushakätsinëki.+ Kë kutichömi sïqa cösasninkunata y animalninkunatapis apakuyta puëdiyanki. Kananqa markapa qepanman churakäyänampaq wakin soldädukunata mandë”.
3 Tsënam Josuëwan llapan soldädukunaqa, Hai markaman witsäyarqan guërrata rurayänampaq. Josuëqa treinta mil valienti soldädukunatam akrarqan y paqaspa ëwayänampaqmi nirqan.
4 Kënö nirmi mandarqan: “Ëwarnin markapa qepanman churakäyë. Ama alläpa karumanqa churakäyankitsu y markata ushakätsiyänëkipaqmi listullana këkäyänëki.
5 Noqakunanam marka frentimpa shayämushaq. Puntatanölla noqakunaman shayämuptinqa,+ qeshpirmi ëwakuyäshaq.
6 Y qatipayämaptinqa, masmi qeshpir ëwakuyäshaq markankunapita karuyaq yarqayämunqanyaq. Tsëmi, ‘puntatanöllam noqantsikpita qeshpir ëwakuykäyan’+ nir pensayanqa.
7 Jehovä Diosnintsikmi ushakätsiyänëkipaq tsë markata entregayäshunki. Tsëmi markapa qepanchö këkäyanqëkipita jinan höra markaman yëkuyänëki.
8 Tsë markaman yëkuskirqa tsë höram ninata prendïkuyänëki.+ Jehovä Dios ninqannömi llapanta rurayänëki. Noqam tsëta rurayänëkipaq mandëkäyaq”.
9 Tsëpitanam Josuëqa soldädukunata witsäyänampaq mandarqan, y pëkunaqa ëwarmi Hai markapa qepanman* churakäyarqan, Betel marka këkanqan läduman. Josuëwan wakin soldädukunaqa këkäyanqanllachömi tsë paqas quedakuyarqan.
10 Waränin junaqnam, patsa waräriptinlla shärikurir Josuëqa soldädukunata qayatsirqan, tsëpitanam Israelchö dirigentikunawan Hai markaman pushayarqan.
11 Llapan soldädukunawanmi+ witsäyarqan y Hai markapa frentinmanmi churakäyarqan.* Juk jatun pampam pëkunata y Hai markata rakirqan.
12 Peru tsëpaqqa, Hai markapa qepanman* churakäyänampaqmi+ Josuëqa cincu mil soldädukunata mandashqana karqan, y tsëpam Betel markapis+ karqan.
13 Tsënömi Josuëqa wakin soldädukunata tsë markapa qepanman* churakäyänampaq mandarqan.+ Pëwan këkaq soldädukunaqa markapa juk kaq lädunmampam* campamentunkuna rurayarqan.+ Tsë paqasqa pampapa* pullanninyaqmi ëwayarqan.
14 Tsëta rikëkurmi Hai markachö gobernaqqa, patsa waräriptinlla soldädunkunawan yarqamurqan, y pampaman ëwaq nänichömi israelïtakunawan pelyarqan. Peru manam musyarqantsu wakin israelïta soldädukuna markampa qepanchö këkäyanqantaqa.
15 Hai soldädukuna pëkunawan pelyar qallëkuyaptinmi, Josuëwan soldädunkunaqa tsunyaq sitiuman ëwaq nänipa qeshpir ëwakuyarqan.+
16 Tsënam Hai markachö nunakunaqa juntakäyarqan, Josuëta qatipar ëwayänampaq. Qatipar ëwarmi markankunapita karupäkuriyarqan.
17 Llapanmi israelïtakunata qatipar ëwayarqan, tsëmi Hai markachö y Betel markachöqa ni juk soldädullapis quedarqantsu. Markankunapa punkunkunatapis kicharëkaqtam dejariyarqan.
18 Tsëpitanam Jehovä Diosqa Josuëta nirqan: “Këkätsinqëki lanzawan* Hai markata apuntë,+ kananmi tsë markata entregashqëki y vencinkim”.+ Tsënam Josuëqa këkätsinqan lanzawan Hai markata apuntarqan.
19 Y lanzawan* apuntanqan höram, tsë markapa qepanchö këkaq soldädukunaqa, markaman jinan höra yëkurir ninata prendïkuyarqan.+
20 Hai soldädukuna rikäriyänampaqqa, entëru markankunam pasëpa* qoyëkarqan o qoshnïkarqan, tsëmi mëpa qeshpiyänampaqpis valorninkuna karqannatsu. Tsënam israelïtakunaqa tsunyaq sitiuman qeshpir ëwëkäyanqampita, qatipëkaq soldädukunawan pelyar qallëkuyarqan.
21 Awmi, marka qepanchö këkaq soldädukuna markaman yëkurishqa kayanqanta y entëru marka pasëpa* qoyëkanqanta o qoshnïkanqanta rikarmi, Josuëwan soldädunkunaqa, qeshpir ëwëkäyanqampita kutïkur Hai soldädukunawan pelyar qallëkuyarqan.
22 Hai markaman yëkushqa israelïta soldädukunapis pëkunata yanapaqmi yarqayämurqan, tsënöpam Hai soldädukunaqa chowpichö* quedariyarqan. Y israelïta soldädukunaqa llapankunatam wanuratsiyarqan y manam jukllëllatapis kawëkaqtaqa dejayarqantsu.+
23 Hai markachö gobernaqtaqa kawëkaqtam prësuyarqan,+ tsëpitanam Josuëman apayarqan.
24 Tsunyaq sitiupa qatipaq Hai soldädukunata espädawan llapanta wanuratsirmi, israelïtakunaqa Hai markaman kutiyarqan. Tsëchö quedaqkunatam espädawan llapanta wanutsiyarqan.
25 Tsë junaqmi Hai markachö llapan ollqukunata y warmikunata wanutsiyarqan. Wanoqkunaqa döci milmi kayarqan.
26 Hai nunakunata llapanta ushakätsiyanqanyaqmi+ Josuëqa lanzanwan apuntararqan.+
27 Israelïtakunaqa, Josuëta Jehovä Dios mandanqannömi Hai marka nunakunapa cösasninkunata y animalninkunata kikinkunapaq apakuyarqan.+
28 Tsëpitanam Josuëqa Hai markata ninawan ushakätsirqan, tsëmi rumillana qoturëkar quedarqan.+ Kananyaqpis tsënömi këkan.
29 Tsëpitanam Hai markapa gobernaqnimpa ayanta qeruman warkutsirqan, y tsëchömi tardiyanqanyaq katsirqan. Tardiyäriptinnam ayata bajatsiyänampaq mandakurqan.+ Tsëpitanam markapa punkunman jitëkur atska rumikunata jananman qotuyarqan. Tsë rumikunaqa kananyaqmi tsëchö qoturëkan.
30 Tsëpitanam Josuëqa, Israelpa Diosnin Jehoväpaq Ebal jirkachö+ juk altarta perqatsirqan.
31 Jehovä Diospa sirweqnin Moises israelïtakunata mandanqannö y Moises qellqanqan Leychö+ ninqannömi rurayarqan. Tsë Leychöqa, “entëru rumikunawanmi juk altarta ruranëki, y manam labrashqa rumikunata utilizänëkitsu”+ ninmi. Tsë altarchömi pishtashqa animalkunata y Dioswan amïgu kayanqanta rikätsikoq* qarëkunata Jehovä Diospaq rupatsiyarqan.+
32 Tsëpitanam Josuëqa, llapan israelïtakuna rikarëkäyaptin Moises qellqanqan Leyta+ tsë rumikunaman copiarqan.+
33 (Jehoväpa sirweqnin Moises mandakushqa kanqannömi)+ Bendicishqa kayänampaq llapan israelïtakuna, tsëchö dirigentikuna, mandakoqkuna, juezkuna y forastërukunapis+ Jehovä Diospa Sagrädu Cäjampa ishkan lädunchö y Levïta sacerdötikunapa frentinchö këkäyarqan. Pullan kaq israelïtakunam Guerizim jirkapa chakinchö këkäyarqan y pullan kaq israelïtakunanam Ebal jirkapa+ chakinchö këkäyarqan.
34 Tsëpitanam Josuëqa Ley libruchö llapan ninqanta,+ bendicionkunapaq+ y maldicionkunapaq+ ninqantapis fuertipa leyirqan.
35 Llapan israelïtakuna wiyëkäyaptinmi, Josuëqa Moises llapan mandakunqanta fuertipa leyirqan.+ Tsëtaqa wiyayarqan warmikuna, wamrakuna y pëkunawan juntu+ këkaq forastërukunam.+
Nötakuna
^ O “inti o rupay jeqanan läduman”.
^ O “Hai markapa norti kaq lädunman”.
^ O “inti o rupay jeqanan läduman”.
^ O “ruri pampapa”.
^ O “norti kaq lädunmampam”.
^ O “inti o rupay jeqanan läduman”.
^ O “jabalïnawan”.
^ O “jabalïnawan”.
^ Kënöpis niyanmi: jankat.
^ Kënöpis niyanmi: jankat.
^ Kënöpis niyanmi: pullanchö.
^ Rikäri “Bibliachö palabrakunata entiendinapaq” neqta.
