Josuë 7:1-26
7 Tsënö kaptimpis, israelïtakunaqa manam ushakätsiyänampaq kaq cösaskunapaq Teyta Dios mandakunqanta cäsukuyarqantsu. Acanmi+ tsë ushakätsiyänampaq kaq cösaskunata juk ishkëta kikimpaq apakurqan.+ Tsëmi Jehovä Diosqa israelïtakunawan alläpa cölerarqan.+ Acanqa Carmïpa tsurinmi karqan, Carmïnam Zabdïpa tsurin karqan, Zabdïnam Zërahpa tsurin karqan, y Zërahqa Judäpa kastampitam karqan.
2 Tsëpitanam Josuëqa Jericöpita Hai markaman+ rikapakoqkunata mandarqan. Hai markaqa Bet-Även markapa amänunchö y Betel markapa lädunchömi* karqan.+ Tsë rikapakoqkunatam, “witsarnin Hai markata y chakrakunata rikapakayämuy” nirqan. Tsënam rikapakoqkunaqa, witsarnin Hai markata rikapakuyarqan.
3 Tsëpita kutirnam Josuëta kënö niyarqan: “Manam llapan soldädukunaraqtsu witsäyänan. Hai markachö nunakunaqa wallkaqllam kayan, dos mil o tres mil soldädukunallam ushakäratsiyanqa. Ama envänuqa llapan soldädukunata mandëtsu”.
4 Tsëmi tres milnö soldädukuna witsäyarqan, peru Hai markapita nunakuna yarqarayämuptinmi mantsakar qeshpir ëwakuyarqan.+
5 Hai nunakunaqa treinta y seis israelïta soldädukunatam wanutsiyarqan. Y markankuna punkupita hasta Sebarim* sitiuyaqmi qatipayarqan. Tsë urëchömi israelïtakunata wanutsiyarqan. Tsëmi israelïtakunaqa alläpa mantsakäyarqan y valorninkunapis manam karqannatsu.
6 Tsëta rikëkurmi Josuëqa llakikur röpanta rachirqan, y Teyta Jehoväpa Sagrädu Cäjan puntanmanmi patsamampis urkun chanqanyaq qonqurikurqan. Y tardiyanqanyaqmi Israelchö dirigentikunawan qonquriräyarqan y peqankunamampis o umankunamampis allpata jicharmi kayarqan.
7 Josuëqa kënömi nirqan: “¡Llapanta Gobernaq Teytallä Jehovä! Amorreu nunakuna ushakätsiyämänan këkaptinqa, ¿imapaqraq Jordan mayutapis* tsimpatsiyämar këyaq pushayämarqëki? ¡Mejorqa Jordan mayupa wak tsimpanchö* quedakuyäman karqan!
8 Perdonëkamë Teyta Jehovä, israelïtakuna chikeqninkunapita qeshpir ëwakushqa kayaptinmi ima nitapis puëdïtsu.
9 Cananeu nunakuna y wakin markakunachö nunakuna tsëta musyaskirqa, wakpa këpa shamuykurchi ushakätsiyämanqa.* Qamqa, ¿imataraq ruranki alläpa respetashqa jutikita defendinëkipaq?”.+
10 Tsënam Jehovä Diosqa Josuëta kënö nirqan: “¿Imanirtan patsamampis urkuyki chanqanyaq qonqurikushqa këkanki? ¡Shäri!
11 Israelïtakunam jutsata* rurayashqa. Pëkunaqa manam unë ruranqä acuerduta cumpliyashqatsu.+ Ushakätsiyänampaq ninqä cösaskunatam juk ishkëta apakuyashqa.+ Awmi, suwëkurmi+ cösasninkunatawan juntu pakarëkätsiyan.+
12 Tsëmi israelïtakunaqa ushakäyänampaq condenakäriyashqa, tsëmi chikeqninkunata vencita puëdiyanqatsu. Tsëpa rantinqa chikeqninkunapitam qeshpir ëwakuyanqa. Manam qamkunata yapë yanapayashqëkitsu, tsë jutsa* ruraq nunata mana wanutsiyaptikiqa.+
13 ¡Shäri! Israelïtakunata warëpaq alistakuyänampaq+ kënö nï: ‘Warëpaq alistakuyë, Israelpa Diosnin Jehovämi kënö nin: “Israel nunakuna, jutsata* rurashqa nunam qamkunawan juntu këkan. Tsë nunata mana wanutsirqa, manam chikeqnikikunata vencita puëdiyankitsu.
14 Tempränullam cada kasta shayämunëki. Y noqa Jehovä akranqä kastapitam+ mas atska kaq familiakuna shayämunan. Noqa Jehovä akranqä mas atska kaq familiakunapitanam, mas wallka kaq familiakuna shayämunan. Noqa Jehovä akranqä mas wallka kaq familiakunapitanam llapan ollqukuna shayämunan.
15 Y ushakänampaq cösaskunata katseq nunataqa, wanuykatsirmi ninawan rupatsiyänëki,+ tsë nunata y llapan kapunqankunata. Tsë nunaqa, Israelwan noqa Jehovä ruranqan acuerdutam cumplishqatsu+ y Israelchömi penqakuypaq rurëta rurashqa”’”.
16 Waränin junaqnam, Josuëqa patsa waräriptinlla shärikuskir llapan israelïtakunata cada kastapa qayatsirqan, y Judäpa kastankunam akrashqa kayarqan.
17 Tsëpitanam Judäpa kastankunapita llapan familiakunata qayatsirqan, y zerahïta familiakunam+ akrashqa kayarqan. Tsëpitanam zerahïta familiapita cada ollquta qayatsirqan, y Zabdïmi akrashqa karirqan.
18 Tsëpitanam Zabdïpa familiampita cada ollquta qayatsirqan y Acanmi akrashqa karqan. Acanqa Carmïpa tsurinmi karqan, Carmïnam Zabdïpa tsurin karqan, Zabdïnam Zërahpa tsurin karqan, y Zërahqa Judäpa kastampitam karqan.+
19 Tsëpitanam Josuëqa Acanta kënö nirqan: “Hïju, Israelpa Diosnin Jehoväpa autoridäninta respetë y jutsallakunqëkita* willë. Llapan ruranqëkita willëkamë, ama wakin wakinllataqa”.
20 Tsënam Acanqa Josuëta kënö nirqan: “Awmi, noqam Israelpa Diosnin Jehoväpa contran jutsallakurqö,* y ruranqäta willarishqëki:
21 cösaskuna këkanqanchömi rikarqä Sinar*+ markachö rurashqa mas alli kaq* träjita, ishkë kïlu pullan* lasaq pläta metalta y mediu kïlu* mas lasaq juk bärra öruta. Kuyarninmi apakurqö. Kanan höraqa carpächömi* pamparëkan y pläta metalwan öruqa mas rurinchömi këkan”.
22 Tsënam Josuëqa Acanpa carpanman* ëwayänampaq nunakunata mandarqan, y pëkunaqa jinan höram ëwayarqan. Tsëchömi tsë shumaq träjita tariyarqan, y mas rurinchönam pläta metaltawan örutapis tariyarqan.
23 Y jinan höram, Josuëman y israelïtakunaman apayarqan, y Jehovä Diospa rikëninman churayarqan.
24 Tsëpitanam Josuëwan israelïtakunaqa, Zërahpa familian Acanta,+ apanqan pläta metalta, shumaq träjita, öru bärrata,+ ollqu wamrankunata, warmi wamrankunata, törunta, ashnunta, üshankunata, carpanta* y llapan kapunqanta aparkur Acor sitiuman*+ witsäyarqan.
25 Tsëchömi Josuëqa Acanta kënö nirqan: “¿Imanirtaq kë desgraciaman chätsiyämarqunki?+ Kananmi Jehovä Diosqa qamtapis desgraciaman chätsishunki”. Tsënam llapan israelïtakuna rumiwan* wanutsiyarqan o wañutsiyarqan,+ tsëpitanam ninawan rupatsiyarqan.+ Llapankunatam rumiwan wanutsiyarqan.
26 Tsëpitanam atska rumikunata jananman qotuyarqan, y tsë rumikunaqa kananyaqmi tsëchö qoturëkan. Tsëta rurariyaptinran Jehovä Diospa cöleranqa pasarirqan.+ Tsëmi tsë sitiutaqa Acor* sitiu* nir kananyaqpis reqiyan.
Nötakuna
^ O “inti o rupay yarqamunan läduchömi”.
^ Tsëqa, “rumi jipina” ninanmi.
^ Kënöpis niyanmi: riutapis.
^ O “inti o rupay yarqamunan läduchö”.
^ Hebreu idiömachöqa “jutïkunata patsapita ushakätsiyanqa” ninmi.
^ Kënöpis niyanmi: pecäduta.
^ Kënöpis niyanmi: pecädu.
^ Kënöpis niyanmi: pecäduta.
^ Kënöpis niyanmi: pecäduta ruranqëkita.
^ Kënöpis niyanmi: pecäduta rurarqö.
^ Tiempu pasariptinnam, Babilonia nir reqiyarqan.
^ O “shumaq”
^ Hebreu idiömachöqa “200 siclus” ninmi. 1 sicluqa 11,4 grämusmi lasaq. Rikäri “Masllata musyanapaq” neqchö B14 kaqta.
^ Hebreu idiömachöqa “50 siclus” ninmi. 1 sicluqa 11,4 grämusmi lasaq. Rikäri “Masllata musyanapaq” neqchö B14 kaqta.
^ Kënöpis niyanmi: toldüchömi.
^ Kënöpis niyanmi: toldunman.
^ Hebreu idiömachöqa “pampaman” ninmi.
^ Kënöpis niyanmi: toldunta.
^ O “tsampir o saqmar”.
^ Tsëqa ‘sufrimientuman chë; mana alliman chë’ ninanmi.
^ Hebreu idiömachöqa “pampa” ninmi.
