Jeremïas 46:1-28
46 Tsëpitanam Teyta Jehoväqa, mëtsë nacionkunapaq willakoqnin Jeremïasta parlaparqan.+
2 Josïaspa tsurin Jehoiaquim+ Judächö chusku watapana gobernëkaptinmi, Babiloniachö gobernaq Nabucodonosorqa, Eufratis mayupa* amänunchö këkaq, Egiptuchö gobernaq+ Neköpa soldädunkunata+ Carquemis markachö ushakätsirqan. Y Egiptu nacionpita nunakunapaqmi Teyta Dios këta nin:
3 “Ichiktapis* jatuntapisescüduykikunata alistarkur guërraman ëwayë.
4 Cawalluta montashqa pureq soldädukuna, cawalluykikunata sillarkur montayë.
Cascuykikunata cascukurkur pelyayänëkipaq listu këkäyë.
Lanzëkikunata afilayë, y guërrapaq chalëkuykikunata chalëkukuyë.
5 ‘¿Imanirtan pëkunaqa alläpa mantsakashqa këkäyan? Qeshpirmi ëwakuykäyan.
Pelyëta yachaq, puëdeq soldädunkunatapis venciyashqam.
Alläpa mantsakarmi, qepamampis mana rikëpa qeshpir ëwakuyashqa.
Mëtsëchömi alläpa mantsakashqa këkäyan’ ninmi Teyta Jehovä.
6 ‘Alli cörreqkunapis y alli pelyëta yachaq puëdeq soldädukunapis,manam qeshpir ëwakuyta puëdiyantsu.
Norti läduchö këkaq Eufratis mayupa* kuchunchömi, ishkir ushayashqa’.+
7 ¿Pitan Nïlu mayunö*y laqcheqyëkaq mayunö shamuykan?
8 Egiptupita nunakunam, Nïlu mayunöraq*+y laqcheqyëkaq mayunöraq shamuykäyan.
Y kënömi niyan: ‘Ëwarmi entëru markaman juntashuny kikin markata y tsëchö nunakunatam ushakätsishun’.
9 Cawallunkuna montashqa soldädukuna, guërraman witsäyë.
Carrëta manejaqkuna, ras o sas cörriyë.
Cus y Put nunakuna, qamkunaqa escüdutam alli manejëta yachayanki.+
Lud nunakuna,+ qamkunaqa flechakuna alistëta+ y alli manejëtam yachayanki.
Llapëki pelyëta yachaq, puëdeq soldädukuna, guërraman ëwayë.
10 Tsë junaqmi noqa Llapanta Gobernaq angelkunata mandaq Jehoväqa, chikimaqnïkunapita vengakushaq. Awmi, noqa Llapanta Gobernaq angelkunata mandaq Jehoväqa, Eufratis mayupa* amänun norti läduchö mëtsikaqta wanutsiyänampaqmi, imëkata alistarqö. Y mëtsika nunakunata wanutsishqa karmi, espädäpis tsë nunakunapa yawarninllana kanqa.+
11 Shipash wamranö Egiptupita nunakuna,balsamuta asheq Galaad kinrëman ëwayë.+
Ardëllam* imëka jampita ashiyarqunki,qamkunapaqqa manam jampi kannatsu.+
12 Pelyëta yachaq puëdeq soldäduykikunapis,soldädu mayinkunawan tanqanakurmi ishkir ushayashqa.
Tsënö penqakuychö ushayanqëkitaqa, mëtsëchömi musyayashqa.+
Y fuertipa büllayanqëkiqa, entëru patsachömi wiyakashqa”.
13 Babiloniachö gobernaq Nabucodonosor Egiptu nacionchö nunakunawan pelyaq shamunqampaq parlarmi, Teyta Jehoväqa willakoqnin Jeremïasta këkunata nirqan:+
14 “Egiptuchö willakuyë, y Migdolchö+ musyatsikuyë.
Tsënölla Nof y Tahpanhes+ markakunachöpis willakuyë.
Kënö niyë: ‘Espädawanmi lädunkunachö këkaqkunata ushakätsiyanqa.
Tsëmi alistakur sitiuykikunaman churakäyë.
15 ¿Imanirtan puëdeq soldäduykikunata ushakätsiyashqa?
Teyta Jehovä ushakätsishqa kaptinmi,pëkunaqa tsarakuyta puëdiyashqatsu.
16 Mëtsikaqmi ishkir ushëkäyan.
Y kikinkunapuram kënö ninakuyan:
“Espädawan mana ushakätsimänapaq,aku, markantsikman y nacionnintsikman kutikushun”’.
17 Tsëchömi kënö niyashqa,‘Egiptuchö gobernaq faraonqa shimillam,y manam alli tiemputa provechashqatsu’.+
18 ‘Noqa rasumpa kawanqänöllam, ninmi angelkunata mandaq Gobernaq Jehovä.
Egiptuchö nunakunata ushakätseqqa, jirkakuna chowpinchö* Tabor jirkanö+y lamar kuchunchö Carmëlu jirkanömi+ shamunqa.
19 Nof markataqa ninawanmi ushakätsiyanqa,*y manam ni pï tsëchö kawanqanatsu.+
Tsë markata pasanqanta rikarmi, mëtsë nacionpita nunakuna alläpa mantsakäyanqa.
Tsëmi Egiptuchö kawaq warmi wamra, juk nacionman apashqa kanëkipaq alistakuy.
20 Egiptupita nunakunaqa, kuyëllapaq ternëranömi kayan.
Peru norti lädupita shamoq chuspikunam kanir ushayanqa.
21 Nacionninkunachö këkaq minkakuyanqan soldädukunapis,mallwa torunömi wira* kayan.
Peru pëkunapis tumaskirmi, qeshpir ëwakuyashqa.
Castigashqa kayänan tiempu chämushqa kaptin,y imëka mana allikuna pëkunaman chashqa kaptinmi, alli tsarakuyta puëdiyantsu’.+
22 ‘Pëkunaqa qeruta mutuykaq* nunakunanömi,hächankunata aparkur pëpa qepanta ëwayanqa.
Y pë büllanqanqa, lätëpa pureq venënuyoq culebra büllanqannömi wiyakanqa.
23 Mana yupëtapis puëdipaq mëtsika chukllushkunanö* karmi,mana ni pï yëkuyta puëdikaptin,montinkunaman yëkuykur qerunkunata mutur ushayanqa’ ninmi Teyta Jehovä.
24 ‘Egiptupa warmi wamrannö kaqmi penqakuychö ushanqa,y norti lädupita nunakunapa makinmanmi entregashqa kanqa’.+
25 Israel nunakunapa Diosnin angelkunata mandaq Teyta Jehovämi këta nin: ‘Nö markapita*+ nunakuna adorayanqan Amon+ santuta, Egiptuchö gobernaqta, Egiptupita nunakunata, santunkunata+ y gobernaqninkunatam, awmi, Egiptuchö gobernaqta y llapan pëman confiakoqkunatam castigashaq’.+
26 ‘Wanutsita munaqkunapa makinmanmi entregashaq. Awmi, Babiloniachö gobernaq Nabucodonosorpa+ y sirweqninkunapa makinmanmi entregashaq. Peru tsëpita tiemputaqa, unënöllam nunakuna tsëchö kawayanqa’ ninmi Teyta Jehovä.+
27 ‘Peru qamkuna, sirwimaqnï Jacobpa kastankunaqa, ama imatapis mantsayëtsu.
Y qamkuna Israel nunakunaqa, ama mantsakäyëtsu.+
Karu sitiuman y juk nacionman apayäshunqëkipitam,qamkunata y kastëkikunata salvayashqëki.+
Qamkuna Jacobpa kastankunaqa, markëkikunaman kutimurmi, yamë y tranquïluna kawakuyanki.
Manam ni pï mantsakätsiyäshunkitsu.+
28 Tsëmi sirwimaqnï Jacobpa kastankuna, ama imatapis mantsayëtsu,noqam qamkunawan këkä.
Noqa permitiptï nacionninkunaman apayäshoqniki nunakunatam ushakätsishaq.+
Peru qamkunataqa, manam ushakätsiyashqëkitsu.+
Tsënö kaptimpis, qamkunatapis castigayashqëkim,y wanayanqëkimannömi* corregiyashqëki’+ ninmi Teyta Jehovä”.
Nötakuna
^ Kënöpis niyanmi: riupa.
^ O “Broqueltapis”. Tsëtaqa flechaqkunam utilizäyaq.
^ Kënöpis niyanmi: riupa.
^ Kënöpis niyanmi: riunö.
^ Kënöpis niyanmi: riunöraq.
^ Kënöpis niyanmi: riupa.
^ Kënöpis niyanmi: Yaptallam.
^ Kënöpis niyanmi: pullanninchö.
^ O capazchi “tsunyaq quedanqa”.
^ Kënöpis niyanmi: wera.
^ O “yantata juntëkaq”.
^ Kënöpis niyanmi: churqapikunanö.
^ Tsënö nirqa, Tëbas markapaqmi parlëkan.
^ Kënöpis niyanmi: necesitäyanqëkimannömi.
