Isaïas 4:1-6
4 Tsë tiempuqa, qanchis warmikunam juk ollqullata niyanqa:+
“Kikïkunam mikuynïkuna y röpäkuna ashiyäshaq.
Nunakuna mana penqapäyämänampaq*y warmikikuna kayanqäta niyänanllapaq noqakunawan casakuykullë”.+
2 Tsë tiempuchöqa, Teyta Jehovä jeqatsimunqanqa alläpa shumaq y kuyëllapaqmi kanqa, y kawëkar quedaq israelïtakunaqa markankunachö imëka wayunqampitam alläpa kushikuyanqa y reqishqa kayanqa.+
3 Sionchö y Jerusalenchö kawëkar quedaqkunaqa, limpiu nunakuna nirmi reqishqa kayanqa, y llapankunam Jerusalenchö kawayanqa. Tsënöqa kanqa, mana wanuyänampaq o wañuyänampaq jutinkuna libruchö qellqashqa kaptinmi.+
4 Teyta Jehoväqa Jerusalenpita nunakunawan alläpa cölerarmi pëkunata juzganqa.+ Tsëta rurarmi, Sionpita nunakunata mana allita rurayanqampita limpiuyätsinqa,+ y nuna mayinkunata wanutsir culpayoq tikrayanqampitam Jerusalen nunakunata limpiuyätsinqa.
5 Tsë tiempullam Teyta Jehoväqa, entëru Sion jirka jananchö y alabayänampaq juntakäyanqan sitiu jananchö, pukutëta y ninata yuritsinqa. Junaqpam pukutëta yuritsinqa y paqaspanam atsikyëkaq ninata yuritsinqa.+ Tsënömi tsë alläpa shumaq sitiuta imëkapita tsapanqa.
6 Y achachëkaq intipita o rupaypita tsapanampaq+ y vientuntin tamyapita tsapanampaqmi, ramädapis kanqa.+
Nötakuna
^ Tsënö nirqa, mana qowayoq o runayoq kanqampita o mana wamrayoq kanqampita mana penqapäyänampaqmi parlëkan.
