Hebrëus 7:1-28
7 Salemchö gobernaq y Llapanta Gobernaq Poderösu Diosta adoraq sacerdöti Melquisedecqa, gobernaqkunata wanutsinqampita kutikaptinmi Abrahanwan tinkoq ëwar bendicirqan,+
2 y Abrahanqa llapan kutitsimunqampitam diezmuta entregarqan. Jutinqa “allita ruraq gobernaq” ninanmi. Pëqa Salemta gobernaqmi, tsëqa, “yamë këta apamoq gobernaq” ninanmi.
3 Papänin, mamänin y kastankuna pikuna kashqa kayanqan, y imë yurinqan y imë wanunqan o wañunqan mana musyë kaptimpis, Teyta Diospa Tsurinnö kanampaq rurashqa karmi, imëyaqpis sacerdöti këkan.+
4 Rikäyë familiata dirigeq Abrahan, llapan logranqampita mas alli kaqta entreganqan nuna, awmi, diezmuta entreganqan nuna, imanö puëdeq kashqanta.+
5 Rasunmi, Ley mandakunqannöqa, sacerdöti kayänampaq carguta chaskeq Levïpa+ tsurinkunam nunakunata, awmi, wawqinkunata diezmuta cobrayänampaq mandakuyta chaskiyashqa,+ pëkuna Abrahanpa kastankuna këkäyaptimpis.
6 Peru kë nunaqa Levïpa tsurinkunapita mana këkarmi, Abrahanpita diezmukunata chaskirqan, y änikuykunata chaskishqa kaqta bendicirqan.+
7 Mayor kaqta menor kaq bendicinqanqa clärum këkan.
8 Diezmuta chaskeq levïtakunaqa wanoqllam o wañoqllam kayan, peru diezmuta chaskeq juknin nunapaqqa, kawëkanqantam qellqarëkaqkuna musyatsikuyan.+
9 Y diezmuta chaskeq Levïpis, Abrahanwan diezmuta pagashqa kanqanta nita puëdintsikmi,
10 Melquisedec tinkoq ëwanqan witsanqa Levï manaraqmi Abrahanpa kastampita yurishqaraqtsu karqan.+
11 Tsëqa, Levï+ kastapita sacerdötikuna yanapayaptin nunakuna jutsannaq* këman chëta puëdiyaptinqa (tsë kastapita sacerdötikuna kanampaqmi Leyqa mandakurqan), ¿allitsuraq kanman karqan Melquisedecnö+ juk sacerdöti kanan y Aaron kanqanmannö mana?
12 Sacerdöti kë cargu cambiëkaptinqa, Leypis cambiananmi.+
13 Tsë parlëkanqantsik nunaqa juk kastapitam karqan, y tsë kastapitaqa manam ni pï altarchö sirwishqatsu.+
14 Judä+ kastapita Señornintsik kanqanqa clärum këkan, y tsë kastapita sacerdötikuna kanampaqqa Moisesqa manam nirqantsu.
15 Tsëmi mas cläru këkan Melquisedecnö+ juk sacerdöti+ yurimunqan,
16 pëqa manam Ley mandakunqan kastapita kartsu sacerdöti carguta chaskishqa, sinöqa mana ushakaq kawëman chätseq poderpitam.+
17 Pëpaq musyatsikurmi, “qammi Melquisedecnö imëyaqpis sacerdöti kanki”+ nin.
18 Tsëmi punta kaq mandakuyqa, mana alläpa yanapakur juk kuchuman churashqa quedan.+
19 Leyqa manam pitapis jutsannaq* këman chätsishqatsu,+ peru Teyta Diospita chaskinqantsik änikuyqa lograshqam,+ y tsëwanmi Diosman witita puëdintsik.+
20 Manam tsëllatsu, tsëqa manam juramentuwantsu rurakarqan.
21 (Rasumpa kaqchöqa, kanmi mana juramentuta rurarlla sacerdöti këman chashqa nunakuna, peru kë nunaqa, kënö neqpa juramentunwanmi sacerdöti këman chashqa: “Teyta Jehovämi* kënö nishurqëki: ‘Qammi imëyaqpis sacerdöti kanki’. Tsë änishunqëkitaqa imëpis cumplinqam”).+
22 Tsëmi Jesusqa mas alli acuerdupa garantïan këman chashqa.+
23 Sacerdötikuna wanukurqa manam cargunkunachö sïguita puëdiyaqtsu, tsëmi pëkunapa rantin jukkunana yëkur trabäjunkunata rurayaq.+
24 Peru Jesus mana imëpis wanuptinmi o wañuptinmi,+ ni pï pëpa rantin sacerdöti këman yëkuntsu.
25 Tsëmi pëqa, pëkunarëkur Teyta Diosta rogakunampaq imëpis kawar, Teyta Diosman witikaqkunata salvëta puëdin.+
26 Pënö mana dejakoq, culpannaq, limpiu, jutsata* ruraqkunapita rakikashqa+ y ciëlukuna janampa churashqa mandakoq sacerdöti kapamanqantsikqa, noqantsikpaq alläpa allim.+
27 Pëqa manam tsë mandakoq sacerdötikunanötsu cada junaq pishtashqa qarëkuna rupatsinan,+ puntata kikimpa jutsampita* y tsëpitana nunakunapa jutsampita.+ Pëqa imëyaqpis tsënö kanampaqmi juk kutilla kikin tsëta rurarqan.+
28 Leyqa pishipaq* nunakunatam mandakoq sacerdöti kayänampaq churan,+ peru Leyta entregaramarnintsikmi Teyta Diosqa jurarqan,+ sacerdöti kanampaq imëyaqpis alliyätsishqa Tsurinta churanampaq.+
Nötakuna
^ Kënöpis niyanmi: pecädunnaq.
^ Kënöpis niyanmi: pecädunnaq.
^ Kënöpis niyanmi: pecäduta.
^ Kënöpis niyanmi: pecädumpita.
^ O “debilidäyoq”.
