Hebrëus 3:1-19
3 Tsëmi ciëlupaq akrashqa* limpiu wawqikuna+ y panikuna, apostoltanö y mandakoq sacerdötitanö chaskinqantsik Jesus+ imanö kanqanman pensayë.
2 Moises Teyta Diospa wayinchö* confiakuypaq kanqannömi,+ pëpis tsë carguman churaqnimpaq confiakuypaq karqan.+
3 Jesusqa Moisespitapis mas alabashqam kanan.*+ Awmi, wayita ruraqmi kikin wayipitapis mas respetashqaqa.
4 Rasunmi, wayikunaqa pï nunapis rurashqa kaptinmi kan, peru llapanta ruraqqa Teyta Diosmi.
5 Teyta Diospa wayinta cuidanqanchömi Moisesqa confiakuypaq karqan, y tsëmi tiempu pasariptin parlayänampaq kaqpita musyatsikurqan,
6 peru Cristuqa tsurinömi Teyta Diospa wayinchö confiakuypaq karqan.+ Y mana mantsakushpa parlar y kushitsimanqantsikta shuyarëta mana dejarqa, noqantsikmi pëpa wayin kantsik.+
7 Tsëmi, santu espïrituwan kënö ninqannöpis:+ “Kanan parlapëkanqaqta wiyamarqa,
8 ama tsunyaq sitiuchö pruëbaman churamar cöleratsiyämanqëkinö chukru shonqu tikrayëtsu.+
9 Tsëchömi unë kastëkikunaqa pacienciäta ushakätsita munayarqan. Cuarenta watapa imëka ruranqäta rikëkarpis, mana kaqpaqmi churayämarqan.+
10 Tsërëkurmi tsë witsan nunakunata melanar kënö nirqä: ‘Kë nunakunaqa shonqunkuna munanqanllatam rurakuyta munayan, y manam yachatsinqätaqa cäsuyämantsu’.
11 Tsëmi cölerar nirqä: ‘Pëkunaqa manam jamanqä junaq jamayanqatsu’”.+
12 Cuidakuyë wawqikuna y panikuna, kawëkaq Teyta Diosta dejayanqëkirëkur, mëqëkipis mana alli y mana markäkoq o yärakoq shonquyoq mana tikrayänëkipaq.+
13 Tsëpa rantinqa, jukniki juknikikuna alli aguantayänëkipaq yanapanakur sïguiyë, “kanan”+ nita puëdina tiempu kanqanyaq. Tsënöpa engañakoq jutsa* puëdeq kanqan shonquykikunata chukruyätsinanta mana dejayänëkipaq.
14 Rasumpa kaqchöqa, Cristu chaskinqantaqa chaskishun, qallananchö confiakunqantsikpita ushananyaq alli aguantarllam.+
15 Kënö ninqannö: “Kanan parlapëkanqaqta wiyamarqa, ama tsunyaq sitiuchönö chukru shonqu tikrar cöleratsiyämëtsu”.+
16 ¿Pikunatan wiyëkarpis alläpa cöleratsiyarqan? ¿Manaku Moises pushamuptin Egiptupita llapan yarqamoqkuna tsëta rurayarqan?+
17 ¿Pikunawantan Teyta Diosqa cuarenta watapa cölerashqa karqan?+ ¿Manaku tsunyaq sitiuchö ayankuna quedaq jutsata* ruraqkunawan?+
18 ¿Pikunatataq jurarqan jamana junaqchö mana jamayänampaq kaqta? ¿Manaku mana cäsukoqkunata?
19 Tsëchömi rikantsik mana markäkoq o yärakoq kayanqanrëkur jamanan sitiuman yëkuyta mana puëdiyanqanta.+
Nötakuna
^ O “invitashqa”.
^ O “Diospa creikoqninkunachö”.
^ O “mas puntamanmi churashqa kanan”.
^ Kënöpis niyanmi: pecädu.
^ Kënöpis niyanmi: pecäduta.
