Hëchus 13:1-52
13 Kikin Antioquïachö këkaq congregacionchömi, Teyta Diospa willakoqninkuna y yachatsikoqkuna kayarqan:+ Bernabë, Niger niyanqan Symeon, Cirëni markapita Luciu, Galilëa provinciata gobernaq Herödiswan juntu estudiashqa Manaen y Saulu.
2 Teyta Jehoväta* sirwir y ayunar këkäyaptinmi, santu espïrituqa kënö nirqan: “Juk trabäjuta rurayänampaq akranqä Bernabëtawan Sauluta+ noqapaq rakiyë”.+
3 Tsënam Teyta Diosta mañakur y ayunar pëkunaman makinkunata churarkur ishkampita despidikuyarqan.
4 Tsëmi santu espïritu mandanqan nunakunaqa, Seleucia markaman urar Chipri islaman barcuwan ëwayarqan.
5 Salamïna markaman chëkurnam, judïukuna Teyta Diosta adorayänan wayikunachö, Teyta Diospa palabrampita yachatsikur qallëkuyarqan. Juanpis pëkunata yanaparmi ëwarqan.+
6 Tsë entëru islapa pasar Päfus markaman chëkurmi brüju y Teyta Diospa willakoqnin tukoq Bar-Jesus niyanqan judïuta tariyarqan.
7 Pëqa alli yachaq provinciata gobernaq* Sergiu Pauluwanmi këkarqan. Tsë gobernadorqa, Diospa palabrampita wiyakuyta munarmi, Bernabëtawan Sauluta qayatsirqan.
8 Peru Elimas brüjuqa (awmi, jutinqa brüju ninanmi) pëkunapa contranmi churakar qallëkurqan y gobernador Señorman creikunantam michëta tïrarqan.
9 Tsënam Pablu niyanqan Sauluqa, santu espïrituta chaskir defrenti rikëkurnin
10 kënö nirqan: “Tukuynöpa engañakoq y imëka mana allikunata ruraq, Diablupa tsurin+ y alli kaq rurëta chikeq nuna, ¿imëyaqraq Teyta Jehoväpa* alli yachatsikuyninta cambiar këkanki?
11 ¡Rikë! Teyta Jehoväpa* makinmi janëkichö këkan, tsëmi wisku tikrar intipa o rupaypa aktsinta juk tiempupa rikankitsu”. Tsë höram yana pukutënö y ampeqnö o tsakënö* nawinta tsaparkurqan, y wakpa këpam janchanampaq pillatapis ashir purirqan.
12 Tsë pasakunqanta rikëkurnam, tsë gobernadorqa Teyta Jehovä* yachatsikunqampita alläpa espantakur creikoq tikrarqan.
13 Päfus markapita yarqurnam, Pablu y pëwan ëwëkaqkunaqa, Panfiliachö Perga jutiyoq markaman chäyarqan. Peru Juanqa+ pëkunata dejëkurmi Jerusalenman kutikurqan.+
14 Tsënö kaptimpis, Perga jutiyoq markapita ëwakurmi, Pisidiachö Antioquïa markaman chäriyarqan. Tsëchömi säbadu junaq Diosta adorayänan wayiman yëkur+ jamakuyarqan.
15 Leyta y Diospa Willakoqninkuna Qellqayanqanta tsëchö këkaqkunapaq leyir ushariyaptinnam,+ Diosta adorayänan wayita rikaqkunaqa, pëkunata kënö niyänampaq mandakuyarqan: “Wawqikuna, nunakuna kallpata tsariyänampaq parlakaramuyta munarqa, parlakarayämuy”.
16 Tsënam Pabluqa sharkur makinwan sëñasta rurar kënö nirqan:
“Wiyarayämë, Israel ollqukuna y llapëki Teyta Diosta respetaqkuna.
17 Kë Israel markachö nunakunapa Diosninmi unë kastantsikkunata akrarqan, y Egiptu nacionchö forastëru kayanqan witsan pëkunata yanaparmi, puëdeq rikranwan tsë nacionpita salvamurqan.+
18 Y cuarenta watapanömi tsunyaq sitiuchö pëkunata aguantarqan.+
19 Tsëpitanam Canaanchö qanchis nacionkunata ushakätsir, tsë nunakunapa markankunata herenciatanö entregarqan.+
20 Tsë llapanqa cuatrocientus cincuenta watachönömi pasarqan.
Tsëpitanam Diospa willakoqnin Samuelpa tiempunyaq pëkunapaq juezkunata churarqan.+
21 Peru tsëpitaqa juk gobernaqtam mañakuyarqan,+ tsëmi Teyta Diosqa Benjamin kastapita Quis nunapa tsurin Saulta, cuarenta watapa pëkunata gobernanampaq churarqan.+
22 Pëta cargumpita qarqurnam, Davidtana pëkunata gobernanampaq churarqan,+ pëpaqmi, ‘Jesëpa tsurin Davidtam+ shonqüpaqtanö tarirqö.+ Pëmi llapan munanqäta ruranqa’ nirqan.
23 Tsë nunapa kastampitam Teyta Diosqa, änikunqannölla Israelpaq juk salvakoqta apamushqa, Jesusta.+
24 Pë manaraq chämuptinmi, Juanqa Israelchö nunakunata willarqan jutsankunapita* arrepentikur bautizakuyänampaq.+
25 Tsënö kaptimpis, ruranampaq kaqta ushëkarmi Juanqa nirqan: ‘¿Pï kanqätataq pensayanki? Noqaqa manam pëtsu kä. Peru cläru musyayë juk nuna qepäta shamunqanta, y noqaqa manam llanqinllatapis jipitsita puëdïtsu’.+
26 Wawqikuna, Abrahanpa kastampita kaqkuna y llapëki Teyta Diosta respetaqkuna, salvacionpaq willakuytam Diosqa noqantsikman mandamurqan.+
27 Jerusalenchö kawaqkuna y gobernadorninkunaqa manam tsë salvakoqta chaskiyarqantsu, peru pëta juzgarqa, llapan säbadukuna fuertipa leyiyanqan Diospa Willakoqninkuna Qellqayanqantam cumpliyarqan.+
28 Wanutsiyänampaq mana ima culpata tarirpis,+ wanutsinampaqmi Pilätuta exigiyarqan.+
29 Pëpaq llapan qellqaranqan cumpliriptinnam qerupita bajatsir sepultüraman churayarqan.+
30 Peru Teyta Diosqa wanunqampitam kawatsimurqan,+
31 y atska junaqmi, Galilëa provinciapita Jerusalenman pëwan juntu ëwaqkunata yuripurqan. Pëkunam kananqa nunakunata pëpita musyatseq testïgukuna kayan.+
32 Tsëmi noqakunaqa, unë kastantsikkunata äninqampita alli noticiakunata qamkunata willëkäyaq.
33 Tsëtam Teyta Diosqa, noqantsik tsurin kaqkunapaq, Jesusta kawaritsimur llapanta cumplimushqa.+ Tsëqa ishkë kaq Salmuschö kënö qellqarëkanqannömi: ‘Qammi tsurï kanki y noqam kanampitaqa teytëki kashaq’.+
34 Teyta Diosqa wanunqampita kawaritsimunampaq y yapëqa manana ismur ushakänampaqmi, ‘Davidta imëpis mana dejanäpaq aninqäta yarparmi, pëta äninqä bendicionkunata qamkunaman chätsimushaq. Tsë änikunqankunaqa confiakuypaqmi kayan’ nir willakurqan.+
35 Juk Salmuschöpis kënömi nikan: ‘Manam permitinkitsu llapan shonqunwan sirwishoqniki ismur ushakänanta’.+
36 Kawanqan witsanqa David Teyta Diostam sirwirqan,* wanukuptinnam unë kastankunatanölla pampayarqan y ismurmi ushakarqan.+
37 Peru Teyta Dios kawatsimunqan nunaqa, manam ismurtsu ushakarqan.+
38 Tsëmi wawqikuna, përëkur jutsëkikunapita* perdonashqa kayänëkipaq willëkäyanqaqta musyayë+
39 y Moises qellqanqan Leyta cäsukur culpannaq këta mana puëdiyanqampita,+ llapan creikoqkuna përëkur culpannaq tikrayanqanta.+
40 Tsëqa cuidädu kayë, Diospa Willakoqninkuna Qellqayanqanchö kënö ninqan qamkunachö mana cumplikänampaq:
41 ‘Rikäyë qamkuna burlakoqkuna y mantsakar wanuyë o wañuyë. Kawëkäyanqëki tiempuchömi mana ichikllapis pensayanqëkita rurashaq. Imanö pasanqanta willayäshuptikipis, tsëtaqa manachi creiyankimantsu’”.+
42 Pëkuna yarquykäyaptinnam, nunakunaqa qateqnin säbadupis tsëkunapita parlayänampaq rogayarqan.
43 Diosta adorayänan wayichö reunion ushariptinnam, Diosta adoraq judïukuna y judaismu religionman yëkushqakunaqa, Pablutawan Bernabëta qatir ëwayarqan. Tsënam pëkunaqa, Teyta Dios pëkunawan imëpis alläpa alli kanampaq pëta mana dejayänampaq niyarqan.+
44 Qateqnin säbaduqa, tsë markapita cäsi llapan nunakunam, Teyta Jehoväpa* palabranta wiyakuyänampaq juntakäyarqan.
45 Mëtsikaq nunakunata rikëkurnam, judïukunaqa chikikur Pabluta contradecir y ninqankunapaq mana allita parlar qallëkuyarqan.+
46 Tsënam Pabluwan Bernabëqa mana mantsakushpa kënö niyarqan: “Qamkunataran Diospa palabrantaqa puntata willayänaq karqan.+ Peru mana chaskikuyaptiki y imëyaqpis kawëta chaskiyänëkipaqnö mana kayanqëkita pensayaptikim... , juk nacion nunakunatana tsëkunata willayäshaq.+
47 Tsëta rurayänäpaqmi Teyta Jehoväqa* kënö nir mandayämashqa: ‘Patsapa mas karu kuchunchö nunakuna salvashqa kayänampaqmi, nacionkunachö nunakunapaq aktsinö kanëkipaq churarqoq’”.+
48 Tsëta wiyëkurnam, juk nacion nunakunaqa alläpa kushikur Teyta Jehoväpa* palabranta alabar qallëkuyarqan, y imëyaqpis kawëta chaskiyänampaqnö kaqkunam creikoq tikrayarqan.
49 Tsëpitaqa, Teyta Jehoväpa* palabranqa tsë kinrëchö llapan nunakunamanmi charqan.
50 Peru judïukunaqa, Teyta Diosta respetaq reqishqa warmikunata y tsë markachö reqishqa nunakunatam inkitayarqan, Pablutawan Bernabëta imëkata rurar sufritsiyänampaq+ y markankunapita qarquyänampaq.
51 Tsëmi pëkunaqa mana culpayoq kayanqanta rikätsikur, chakinkunachö allpata tapsikur Iconiu markaman ëwakuyarqan.+
52 Cristiänukunaqa mëtsika santu espïrituyoq y alläpa kushishqam këkäyarqan.+
Nötakuna
^ O “proconsul”. Rikäri “Bibliachö palabrakunata entiendinapaq” neqta.
^ Kënöpis niyanmi: tutapënö.
^ Kënöpis niyanmi: pecädunkunapita.
^ O “Dios munanqannömi kawarqan”.
^ Kënöpis niyanmi: pecäduykikunapita.
