1 Corintius 9:1-27
9 ¿Manaku noqaqa libri kä? ¿Manaku apostol kä? ¿Manaku Señornintsik Jesusta rikashqa kä?+ ¿Manaku qamkunaqa Señorta sirwir logranqä kayanki?
2 Wakinkunapaq mana apostol karpis, qamkunapaqqa rasumpam apostol kä. Awmi, qamkunaqa sëllu cuentam Señorpa apostolnin kanqäta rikätsikuyanki.
3 Juzgamaqnïkunapita defendikurmi këta nï.
4 Mikuyänäpaq y upuyänäpaqpis derëchuyoqmi kayä, ¿aw?
5 Wakin apostolkunanö, Señorpa wawqinkunanö+ y Cëfasnöpis,*+ derëchuyoqmi kayä creikoq warmïkunawan juntu puriyänäpaq,*+ ¿aw?
6 ¿O Bernabëwan+ noqallaku mantenikuyänäpaq trabajayänä?
7 ¿Pitan soldädu këkar gastunkunata kikin pagakun? ¿Pitan üvasta plantëkar wayunqanta mikuntsu?+ ¿O pitan animalkunata mitsikar mitsinqan animalkunapa lichinta ichikllatapis upuntsu?
8 ¿Nunakuna pensayanqannöku tsëkunata nikä? ¿Manaku Leypis tsëkunata nin?
9 Moises Qellqanqan Leychömi kënö qellqarëkan: “Ërachö imatapis cosecharqa, ama töruman bozalta churayankitsu”.+ ¿Törukunapaqku Teyta Diosqa yarpachakun?
10 ¿O noqantsikrëkurku tsënö nin? Rasumpa kaqchöqa, noqantsikrëkurmi tsënö qellqashqa këkan. Awmi, yapyaq* nunaqa y gränu trillaq nunaqa, gränuta chaskita shuyararmi trabajayänan.
11 Teyta Diospa palabran ninqankunata qamkunachö murushqa këkäyaptïqa, ¿mana alliku këkan wanayanqäkunawan* yanapayämanqëki?+
12 Wakin nunakunapis tsë derëchuyoq këkäyaptinqa, ¿manaku noqakunanäqa mas derëchuyoqraq kayä? Tsënö kaptimpis, manam tsë derëchükunata välitsiyarqötsu,+ sinöqa Cristupita alli noticiakunaman creikuyänampaq ima atäjutapis mana churayänäpaqmi, imëkata aguantar këkäyä.+
13 ¿Manaku musyayanki sagrädu rurëyoq nunakunaqa templuman apayanqanta mikuyanqanta, y altarchö imëpis sirweqkunaqa altarchö rupatsiyanqampita wakinta chaskiyanqanta?+
14 Tsënöllam Señorpis mandakurqan, alli noticiakunata willakoqkunaqa alli noticiakunapita kawayänampaq.+
15 Peru noqaqa manam tsëkunapaq derëchuyoq kanqäpita provechakurqötsu.+ Rasumpa kaqchöqa, manam noqapaq rurayämunëkipaqtsu tsëkunata qellqëkämü. Tsëta ruranqäpitaqa wanukunqämi o wañukunqämi mas alliqa kanman. ¡Manam pï nunapis tsëpita alabakunäta michämanqatsu!+
16 Tsënö kaptimpis, alli noticiakunata willakurqa, tsëta ruranä kaptinmi, tsëpitaqa alabakuyta puëdïtsu. Tsë alli noticiakunata mana willakuptïqa, ¡allaw noqallä!+
17 Tsëkunata gänas gänaslla rurarqa, premiutam chaskishaq; peru mana munëkar rurarpis, tsëta ruranäpaqmi carguta chaskirqö.*+
18 Tsëqa, ¿imatan premiü? Premiüqa alli noticiakunata willakur tsëta debaldilla ruranqämi, tsënöpa alli noticiakunata willakunqärëkur derëchuyoq* kanqäpita mana provechakunäpaq.
19 Libri nuna karpis, llapan puëdinqä nunakunata yanapanäpaqmi, llapankunapa esclävun tikrarqö.
20 Judïukunapaqqa, judïukunata yanapanäpaqmi judïunö tikrarqä.+ Ley ninqannö kawaqkunapaqqa, ley ninqannö kawaqkunata yanapanäpaqmi, ley ninqannö mana kawëkarpis, ley ninqannö kawaqkunanö tikrarqä.+
21 Ley ninqannö mana kawaqkunapaqqa, ley ninqannö mana kawaqkunata yanapanäpaqmi, ley ninqannö mana kawaqkunanö tikrarqä. Tsënö kaptimpis, Diospa rikëninchöqa manam leyninnaqtsu këkä, sinöqa Cristupa leynin ninqannömi kawëkä.+
22 Manaraq alli këkaqkunapaqqa, manaraq alli këkaqkunata yanapanäpaqmi, manaraq alli këkaqkunanö tikrarqä.+ Tukuyläya nunakunarëkurmi imëkaman tikrarqö, tsënöpa wakinkunata imëkanöpa salvanäpaq.
23 Peru alli noticiakunarëkurmi tsë llapantaqa rurä, tsënöpa wakinkunatapis willanäpaq.+
24 ¿Manaku musyayanki carrërachö llapan cörreqkuna cörriyaptimpis, jukllëlla premiuta chaskinqanta? Tsëqa tsëta ganayänëkipaqnö cörriyë.+
25 Carrërachö* cörreqkunaqa, llapanchömi controlakuyta yachayan. Rasunmi pëkunaqa ushakäreqlla corönata chaskiyänampaqmi tsëta rurayan,+ peru noqantsikqa mana ushakaq corönata chaskinapaqmi.+
26 Tsëmi mëman chänäpaq kaqta mana musyartsu cörrikä+ ni vientuta kutëkaqnötsu pelyëkä.
27 Tsëpa rantinqa, wakinkunata willashqa këkar, imanöpapis Diospa rikëninchö mana alli rikashqa* mana kanäpaqmi, cuerpüta corregï*+ y esclävü tikratsï.
Nötakuna
^ Pëtaqa Pëdru nirpis reqiyaqmi.
^ O “creikoq pani warmïkuna kanampaq”.
^ Kënöpis niyanmi: jarukoq.
^ Kënöpis niyanmi: necesitäyanqäkunawan.
^ O “mayordömu carguta chaskirqö”.
^ O “autoridäyoq”.
^ Griëgu idiömachö tsënö nirqa, manam cörriyanqanllapaqtsu parlëkan, sinöqa mas competenciakunapaqmi.
^ O “qarqushqa”.
^ O “maqä; castigä”.
