1 Crönicas 16:1-43
16 Diospa Sagrädu Cäjantaqa David alistanqan carpa* wayimanmi churayarqan.+ Tsëpitanam Davidqa pishtashqa animalkunata y Teyta Dioswan amïgu kayanqanta* rikätsikoq qarëkunata Diospaq+ rupatsirqan.
2 Pishtashqa animalkunata+ y Dioswan amïgu kayanqanta* rikätsikoq qarëkunata+ ruparatsirnam, Davidqa Jehovä Diosman mañakurqan llapankunata yanapëkunampaq.
3 Tsëpitanam Davidqa tsëchö llapan israelïtakunata warmitapis ollqutapis, rosca tantata, palmërapa frütampita rurashqa tortillata y päsaspita rurashqa tortillata qararqan.
4 Tsëpitanam wakin levïtakunata churarqan Jehoväpa Sagrädu Cäjan+ churaranqanchö sirwiyänampaq, agradecikuyänampaq y Israelpa Diosnin Jehoväta alabayänampaq.*
5 Pëkunapa dirigeqninkunaqa Asafmi+ karqan y yanapaqninnam Zacarïas karqan. Cuerdayoq instrumentukunata y arpakunata+ tocaqkunaqa kayarqan Jeiel,+ Semiramot, Jehiel, Matitïas, Eliab, Benäya, Obed-Edom y Jeiel. Asafnam platïlluta+ tocaq,
6 sacerdöti Benäyawan Jahazielnam Diospa Sagrädu Cäjan puntanchö imëpis trompëtata tocayaq.
7 Tsë junaqmi Davidqa Asafwan+ y wakin levïtakunawan Jehovä Diosta agradecikur kënö cantarqan:
8 “¡Teyta Jehoväta agradecikuyë,+ jutinchö mañakuyë!
¡Imëkata ruranqankunapita mëtsë markakunachö willakuyë!+
9 Alabarnin cantayë,+imëkata ruranqankunaman pensayë.+
10 Llapan shonquykikunawan respetashqa jutimpaq parlayë.+
Teyta Jehoväta sirweqkuna* kushishqa kayätsun.+
11 Poderösu Jehovä Diosta sirwiyë.*+
Yanapayäshunëkipaq pëta ashiyë.+
12 Imëkatapis alläpa shumaqta ruranqanta, milagrukuna ruranqantay imanö juzganqanta yarpäyë,+
13 qamkuna Israelpa+ kastankuna,Jacobpa tsurinkuna tsëta yarpäyë, sirweqninkuna y akrashqankunam kayanki.+
14 Pëmi Diosnintsik Jehovä.+
Entëru patsachö nunakunatam juzgan.+
15 Ama imëpis qonqayëtsu ruranqan acuerduta,sirweqninta äninqankunataqa imëpis yarparanmi.+
16 Abrahantawan+ Isaacta+ äninqantaqa yarpanmi.
17 Pëqa Jacobtam änirqan imëpis cumplinampaq,+ Israeltam änirqan ruranqan acuerdu imëyaqpis kanampaq.
18 Kënömi nirqan: ‘Entëru Canaantam+ entregayashqëki,qamkunapa herenciëkikunam kanqa’.+
19 Tsë witsanqa wallkaqllam kayarqëki, awmi,wallkaqllam kayarqëki y tsë markakunachömi forastërulla kayarqëki.+
20 Pëkunaqa nacionnin nacionninmi puriyarqan,y gobernantikunapa markankunachömi puriyarqan.+
21 Tsënö këkäyaptimpis nunakuna sufritsiyänantaqa manam munarqantsu,+y gobernantikunatam kënö qayaparqan:+
22 ‘Ama imanöpapis akranqä nunakunata yatayëtsu,ni willakoqnïkunatapis imanäyëtsu’.+
23 ¡Entëru Patsachö nunakuna Jehovä Diosta cantapäyätsun!
¡Salvakoq kanqanta cada junaq willakuyë!+
24 Puëdeq kanqanta entëru nacionkunachö willakuyë,imëka rurashqankunata entëru markakunachö willakuyë.
25 Teyta Jehovällam puëdeq Diosqa, pëllatam alabanantsik.
Pëwanqa manam ni ima diospis igualantsu, tsëmi pëllata respetanantsik.+
26 Wakin markakunapa diosninkunaqa manam imapaqpis välintsu,+peru ciëluchö imëka kaqkunataqa Jehovä Diosmi kamashqa.+
27 Pëllam respetashqa Dios y imëkata ruranqampis alläpa shumaqmi,+Pë kanqanchöqa alläpa kallpayoq y kushishqam kayan.+
28 Mëtsë markachö familiakuna Jehovä Diosta alabayë,puëdeq y kallpayoq kanqampita Jehovä Diosta alabayë.+
29 Teyta Jehoväpa jutinta alabayë,+Imëka qarëkunata aparkur puntanman yëkuyë.+
Jehovä Diospa puntanman alli vistishqa qonqurikuyë.+
30 Patsachö llapan nunakuna puntanchö mantsakar karkaryäyë,kë patsaqa alli segürum këkan y manam kuyutsita puëdiyantsu.+
31 Ciëlupis patsapis kushikuyätsun,+llapan nacionkunachö willakuyë, ‘kananqa Jehovä Diosmi gobernamäshun’ nir.+
32 Lamarpis y tsëchö këkaqkuna kushikurnin bunrurüyätsun,chakrakunapis y tsëchö kaqkunapis kushikuyätsun.
33 Montikunapis Jehovä Diospa puntanchö kushikur cantayätsun.
Pëmi shamuykan patsachö nunakunata juzganampaq.
34 Allillata ruranqampita Teyta Jehoväta agradecikuyë,+Pëqa imëpis alläpa kuyakoqllam këkan.+
35 Mañakurnin kënö niyë: ‘Teyta Dios qamqa salvakoq Diosmi kanki, salvëkayämë.+
Mëtsë nacionchömi rakikar ushashqa këkäyä, markäkunaman kutïkatsiyämë.
Tsënöpam sagrädu jutikipita agradecikur+ kushishqa alabayashqëki.+
36 Israelpa Diosnin Jehovä,imëyaqpis alabashqa këkullätsun’”.
Tsënö nir cantayaptinmi llapan nunakunapis, “¡tsënö kallätsun!”* niyarqan, y Jehovä Diostam alabayarqan.
37 Tsëpitanam Davidqa, Asaftawan+ familiankunata churarqan Jehoväpa Sagrädu Cäjan churaranqanchö+ imëpis rurayanqannö cada junaq imëkata rurayänampaq.+
38 Obed-Edomta, sesenta y öchu nunakunata, Jedutunpa tsurin Obed-Edomta y Hosätam churarqan punkuchö täpakuyänampaq.
39 Gabaonchö këkaq+ Jehovä Diospa carpa* wayinchö yanapakuyänampaqmi sacerdöti Sadocta+ y yanapaqnin sacerdötikunata churarqan.
40 Pëkunam patsa waraptin y patsa tardiyaptin Jehovä Diospaq altarchö qarëkunata rupatsiyaq. Y Jehovä Dios israelïtakunata Leyninchö mandanqannömi llapanta rurayaq.+
41 Heman, Jedutun+ y jutipa akrayanqan wakin nunakunapis tsë carpa* wayichömi Jehovä Diosta agradecikurnin+ kënö niyaq: “Pëqa imëpis alläpa kuyakoqllam këkan”.+
42 Hemanwan+ Jedutunqa tsëchö këkaqkunawanmi Teyta Diosta alabarnin trompëtakunata, platïllukunata y mas instrumentukunata tocayaq. Y Jedutunpa+ tsurinkunam punkuchö täpakuyarqan.
43 Tsëpitanam llapan nunakuna wayinkunata kutikuyarqan. Davidpis familiankunapaq Teyta Diosman mañakunampaqmi wayinta kutikurqan.
Nötakuna
^ Rikäri “Bibliachö palabrakunata entiendinapaq” neqta.
^ Kënöpis niyanmi: toldu.
^ Rikäri “Bibliachö palabrakunata entiendinapaq” neqta.
^ Hebreu idiömachöqa “yarpäyänampaq” ninmi.
^ Hebreu idiömachöqa “asheqkuna” ninmi.
^ Hebreu idiömachöqa “ashi” ninmi.
^ O “¡amen!”.
^ Kënöpis niyanmi: toldu.
^ Kënöpis niyanmi: toldu.
